ಶ್ರೀಲಂಕಾ ವಿರುದ್ಧ ಜಯಭೇರಿ ಬಾರಿಸಿದ ಅಫ್ಘಾನಿಸ್ತಾನ್

•   Mon, Oct 30 2023 11:29:41 PM



• ಪುಣೆ,ಅ. 30 (DaijiworldNews/AK): ಎಂಸಿಎ ಸ್ಟೇಡಿಯಂನಲ್ಲಿ ನಡೆದ ಏಕದಿನ ವಿಶ್ವಕಪ್​ನ 30ನೇ ಪಂದ್ಯದಲ್ಲಿ ಶ್ರೀಲಂಕಾ ವಿರುದ್ಧ ಅಫ್ಘಾನಿಸ್ತಾನ್ ತಂಡ ಭರ್ಜರಿ ಜಯ ಸಾಧಿಸಿದೆ.

  ಈ ಪಂದ್ಯದಲ್ಲಿ ಟಾಸ್ ಗೆದ್ದ ಅಫ್ಘಾನಿಸ್ತಾನ್ ಮೊದಲು ಬೌಲಿಂಗ್ ಆಯ್ಕೆ ಮಾಡಿತು. ಅದರಂತೆ ಇನಿಂಗ್ಸ್ ಆರಂಭಿಸಿದ ಶ್ರೀಲಂಕಾ ತಂಡ ಉತ್ತಮ ಆರಂಭ ಪಡೆದಿರಲಿಲ್ಲ. ಆರಂಭಿಕ ಆಟಗಾರ ದಿಮುತ್ ಕರುಣರತ್ನೆ ಕೇವಲ 15 ರನ್​ಗಳಿಸಿ ಔಟ್‌ ಆದರು. ಬಳಿಕ ಜೊತೆಯಾದ ಪಾತುಮ್ ನಿಸ್ಸಂಕಾ (46) ಹಾಗೂ ಕುಸಾಲ್ ಮೆಂಡಿಸ್ (39) ರನ್‌ ಪಡೆದರು.

  ಇನ್ನು ಸದೀರ ಸಮರವಿಕ್ರಮ 36 ರನ್ ಬಾರಿಸಿದರೆ, ಅಂತಿಮ ಹಂತದಲ್ಲಿ ಬಿರುಸಿನ ಬ್ಯಾಟಿಂಗ್ ಪ್ರದರ್ಶಿಸಿದ ಮಹೀಶ್ ತೀಕ್ಷಣ 29 ರನ್​ಗಳ ಕೊಡುಗೆ ನೀಡಿದರು. ಇದರ ಪರಿಣಾಮ ಶ್ರೀಲಂಕಾ ತಂಡವು 49.3 ಓವರ್​ಗಳಲ್ಲಿ 241 ರನ್​ಗಳಿಸಿ ಆಲೌಟ್ ಆಯಿತು.

  242 ರನ್​ಗಳ ಸುಲಭ ಗುರಿ ಪಡೆದ ಅಫ್ಘಾನಿಸ್ತಾನ್ ತಂಡ ಕೂಡ ಆರಂಭದಲ್ಲಿ ಎಡವಿತ್ತು. ದಿಲ್ಶನ್ ಮಧುಶಂಕ ಎಸೆತದಲ್ಲಿ ಕ್ಲೀನ್ ಬೌಲ್ಡ್ ಆಗುವ ಮೂಲಕ ರಹಮಾನುಲ್ಲಾ ಗುರ್ಬಾಝ್ ಶೂನ್ಯಕ್ಕೆ ಔಟಾದರು.

  ಆದರೆ ಇಬ್ರಾಹಿಂ ಝದ್ರಾನ್ 39 ರನ್ ಬಾರಿಸಿದರೆ, ರಹಮತ್ ಶಾ 62 ರನ್​ಗಳಿಸಿದರು ಇದಾದ ಬಳಿಕ ಕಣಕ್ಕಿಳಿದ ನಾಯಕ ಹಶ್ಮತ್ ಶಾಹಿದಿ 58 ಹಾಗೂ ಅಝ್ಮತ್ ಒಮರ್​ಝಾಹಿ73 ಅರ್ಧಶತಕ ಬಾರಿಸಿ ಮಿಂಚಿದರು. ಹೀಗಾಗಿ 45.2 ಓವರ್​ಗಳಲ್ಲಿ ಗೆಲುವಿನತ್ತ ಮುಖ ಮಾಡಿದರು. ಅಫ್ಘಾನಿಸ್ತಾನ್ ತಂಡ 7 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿದೆ.