ಐಪಿಎಲ್ 2019: ಆರ್‌ಸಿಬಿ ವಿರುದ್ಧ ಮುಂಬೈಗೆ ರೋಚಕ ಜಯ - 2ನೇ ಬಾರಿ ಸೋಲಿಗೆ ಶರಣಾದ ಕೊಹ್ಲಿ ಪಡೆ

•   Fri, Mar 29 2019 06:41:25 AM



• ಬೆಂಗಳೂರು, ಮಾ29(SS): ಇಂಡಿಯನ್ ಪ್ರೀಮಿಯರ್ ಲೀಗ್ 2019ನೇ ಆವೃತ್ತಿಯ ಗುರುವಾರದ (ಮಾ28) ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ತಂಡ ಆರ್‌ಸಿಬಿ ವಿರುದ್ಧ 6 ರನ್‌ಗಳ ರೋಚಕ ಜಯ ಸಾಧಿಸಿದೆ.

  

  ಐಪಿಎಲ್ ಹನ್ನೆರಡನೇ ಆವೃತ್ತಿಯಲ್ಲಿ ಕೊಹ್ಲಿ ಪಡೆ ಸತತ ಎರಡನೇ ಬಾರಿ ಸೋಲು ಕಂಡಿದೆ. ಮುಂಬೈ ನೀಡಿದ್ದ 188 ರನ್ ಗುರಿ ಬೆನ್ನತ್ತಿದ ಕೊಹ್ಲಿ ಪಡೆ ಇಪ್ಪತ್ತು ಓವರ್ ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 181  ರನ್ ಗಳಿಸಿದೆ. ಈ ಮೂಲಕ ಹೋಂ ಪಿಚ್ ನಲ್ಲಿ ಸಹ ರಾಯಲ್ ಚಾಲೆಂಜರ್ಸ್ ತಂಡಕ್ಕೆ ಗೆಲುವು ಸಿಗಲಿಲ್ಲ.

  ಆರ್‌ಸಿಬಿ ಪರವಾಗಿ ನಾಯಕ ವಿರಾಟ್ ಕೊಹ್ಲಿ (46), ವಿಲ್ಲಿಯರ್ಸ್ (70), ಪಾರ್ಥಿವ್ ಪಟೇಲ್ (31), ಮೊಯೀನ್ ಅಲಿ (13) ರನ್ ಗಳಿಸಿ ಗಮನ ಸೆಳೆದರು.

  ಇದರಲ್ಲಿಯೂ ಡೆವಿಲ್ಲಿಯರ್ಸ್ 6 ಸಿಕ್ಸರ್ ಹಾಗೂ 4 ಬೌಂಡರಿಗಳು ಸೇರಿ 41 ಎಸೆತಕ್ಕೆ 70 ರನ್ ಕಲೆ ಹಾಕಿದ್ದರು. ಇನ್ನು ನಾಯಕ ಕೊಹ್ಲಿ 6 ಬೌಂಡರಿ ಸಿಡಿಸಿ 32 ಬಾಲ್ ಗಳಿಗೆ 46 ರನ್ ಗಳಿಸಿದ್ದರು.

  ಮುಂಬೈ ಪರ ಬುಮ್ರಾ 3, ಮಯಾಂಕ್ 1 ವಿಕೆಟ್ ಪಡೆದು ಮಿಂಚಿದ್ದರು. ಇದಕ್ಕೆ ಮುನ್ನ ಬ್ಯಾಟಿಂಗ್ ನಡೆಸಿದ್ದ ಮುಂಬೈ ನಿಗದಿತ ಇಪ್ಪತ್ತು ಓವರ್ ನಲ್ಲಿ ಎಂಟು ವಿಕೆಟ್ ನಷ್ಟಕ್ಕೆ 187 ರನ್‌ ಗಳಿಸಿತ್ತು.

  ಒಟ್ಟಿನಲ್ಲಿ ಆರ್‌ಸಿಬಿ ಐಪಿಎಲ್ 12ರಲ್ಲಿ ಸತತ ಎರಡನೇ ಸೋಲಿಗೆ ಶರಣಾಗಿದೆ. ಅತ್ತ 41 ಎಸೆತಗಳಲ್ಲಿ ಅಜೇಯ 70 ರನ್ ಗಳಿಸಿದ ವಿಲಿಯರ್ಸ್ ಹೋರಾಟ ವ್ಯರ್ಥವೆನಿಸಿದೆ.

  ಕೊಹ್ಲಿ 5000 ರನ್ ಮೈಲುಗಲ್ಲು 

  ಐಪಿಎಲ್ ನಲ್ಲಿ ಸುರೇಶ್ ರೈನಾ ಬಳಿಕ 5000 ರನ್ ಸಾಧನೆ ಮಾಡಿದ ಎರಡನೇ ಆಟಗಾರನಾಗಿ ವಿರಾಟ್ ಕೊಹ್ಲಿ ಹೆಸರಾಗಿದ್ದಾರೆ. ರಾಯಲ್ ಚಾಲೆಂಜರ್ಸ್ ನಾಯಕ ವಿರಾಟ್ ಕೊಹ್ಲಿ ಐಪಿಎಲ್ ನಲ್ಲಿ 5 ಸಾವಿರ ರನ್  ದಾಖಲೆ, ನಿರ್ಮಿಸುವಲ್ಲಿ ಯಶಸ್ವಿಯಾದರೂ ಆರ್‌ಸಿಬಿ  ಮಾತ್ರ ಸೋಲಿನ ದವಡೆಯಿಂದ ಪಾರಾಗಲು ಸಾಧ್ಯವಾಗಿಲ್ಲ.