ಕಳಪೆ ಬ್ಯಾಟಿಂಗ್ ಬೆನ್ನಲ್ಲೇ ಬ್ಯಾಟ್ ತಯಾರಿಕಾ ಕಂಪೆನಿಗೆ ರಾಹುಲ್ ಭೇಟಿ

•   Thu, Feb 23 2023 03:07:04 PM



• ಮೀರತ್, ಫೆ 23 (DaijiworldNews/DB): ಬ್ಯಾಟಿಂಗ್ ವೈಫಲ್ಯದ ಮೂಲಕ ಕ್ರಿಕೆಟ್ ಪ್ರೇಮಿಗಳ ಅಸಮಾಧಾನಕ್ಕೆ ಕಾರಣರಾಗಿರುವ ಟೀಂ ಇಂಡಿಯಾ ಆಟಗಾರ ಕೆ.ಎಲ್. ರಾಹುಲ್ ಇದೀಗ ಬ್ಯಾಟ್ ತಯಾರಿಕಾ ಕಂಪೆನಿಗೆ ಭೇಟಿ ನೀಡಿದ್ದಾರೆ. ಈ ಭೇಟಿ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ನೆಟ್ಟಿಗರು ನಾನಾ ರೀತಿಯಲ್ಲಿ ಕಮೆಂಟ್ ಮಾಡುತ್ತಿದ್ದಾರೆ.

  ಸತತ ಬ್ಯಾಟಿಂಗ್ ವೈಫಲ್ಯಗಳಿಂದಲೇ ಕೆ.ಎಲ್. ರಾಹುಲ್ ಆಗಾಗ ಟೀಕೆಗೆ ಗುರಿಯಾಗುತ್ತಲೇ ಇದ್ದಾರೆ. ಇತ್ತೀಚೆಗೆ ಅವರು ಫಾರ್ಮ್‌ನಲ್ಲಿ ಕಳಪೆ ಪ್ರದರ್ಶನ ತೋರುತ್ತಿರುವ ಬಗ್ಗೆ ಕ್ರಿಕೆಟ್ ಪ್ರೇಮಿಗಳು ಸಿಡಿಮಿಡಿಗೊಂಡಿದ್ದಾರೆ. ಈ ನಡುವೆ ಆಸ್ಟ್ರೇಲಿಯಾ ವಿರುದ್ದ ನಡೆಯುತ್ತಿರುವ ಬಾರ್ಡರ್-ಗವಾಸ್ಕರ್ ಟೆಸ್ಟ್ ಸರಣಿಯ ಮೊದಲೆರಡು ಪಂದ್ಯಗಳಲ್ಲಿ ರಾಹುಲ್ ಪ್ರದರ್ಶನ ತೀರಾ ಕಳಪೆಯಾಗಿತ್ತು. ಅದಕ್ಕಾಗಿಯೇ ಉಪ ನಾಯಕನ ಸ್ಥಾನದಿಂದ ರಾಹುಲ್‌ರನ್ನು ಕೆಳಗಿಳಿಸಲಾಗಿದೆ.

  ಇನ್ನು ಆಸ್ಟೇಲಿಯಾ ವಿರುದ್ದದ ಮೂರನೇ ಟೆಸ್ಟ್ ಪಂದ್ಯದಲ್ಲಿ ಅವರಿಗೆ ಅವಕಾಶ ಸಿಗುವುದು ತೀರಾ ಜಟಿಲವಾಗಿದೆ. ಈ ಎಲ್ಲಾ ಬೆಳವಣಿಗೆಗಳ ನಡುವೆಯೂ ಮೀರತ್‌ನಲ್ಲಿರುವ ಪ್ರಸಿದ್ದ ಬ್ಯಾಟ್ ತಯಾರಿಕಾ ಕಂಪೆನಿಗೆ ರಾಹುಲ್ ಭೇಟಿ ನೀಡಿ ಸುದ್ದಿಯಾಗಿದ್ದಾರೆ. ಆದರೆ ಬ್ಯಾಟ್ ತಯಾರಿಕಾ ಕಂಪೆನಿಗೆ ರಾಹುಲ್ ಯಾಕಾಗಿ ಹೋದರು ಎಂಬುದು ತಿಳಿದು ಬಂದಿಲ್ಲ.