ಟಿ-20 ಪಂದ್ಯದಲ್ಲಿ ವಿಶ್ವ ದಾಖಲೆ ಬರೆದ ಅಪ್ಘಾನಿಸ್ತಾನ, ಆಸ್ಟ್ರೇಲಿಯಾದ ದಾಖಲೆ ಉಡೀಸ್

•   Sat, Feb 23 2019 11:46:07 PM



• ಡೆಹರಡೂನ್, ಫೆ 23(SM)​: ಟಿ-20 ಪಂದ್ಯದಲ್ಲಿ ಅಫ್ಘಾನಿಸ್ತಾನ ಹೊಸ ದಾಖಲೆ ನಿರ್ಮಿಸಿದೆ. ಐರ್ಲೆಂಡ್​ ವಿರುದ್ಧದ 2ನೇ ಟಿ-20 ಪಂದ್ಯದಲ್ಲಿ 278 ರನ್​ ಗಳಿಸುವ ಮೂಲಕ ಟಿ-20 ಕ್ರಿಕೆಟ್​ ಇತಿಹಾಸದಲ್ಲಿ ವಿಶ್ವದಾಖಲೆ ನಿರ್ಮಿಸಿದೆ.

  

  ಟಾಸ್​ ಗೆದ್ದು ಮೊದಲು ಬ್ಯಾಟಿಂಗ್ ಗೆ ಇಳಿದ ಅಫ್ಘಾನ್​ ತಂಡ 20 ಓವರ್​ಗಳಲ್ಲಿ 278 ರನ್​ಗಳ ಬೃಹತ್​ ಮೊತ್ತ ಕಲೆಹಾಕಿ ವಿಶ್ವದಾಖಲೆ ನಿರ್ಮಿಸಿತು. ಈ ಹಿಂದೆ ಆಸ್ಟ್ರೇಲಿಯಾ ತಂಡ ಶ್ರೀಲಂಕಾ ವಿರುದ್ಧ 263 ರನ್ ​ಗಳಿಸಿದ್ದ ಇಲ್ಲಿ ತನಕ ಇದ್ದಂತಹ ವಿಶ್ವದಾಖಲೆಯಾಗಿತ್ತು. ಆದರೆ ಅಫ್ಘಾನಿಸ್ತಾನ ಆ ದಾಖಾಲೆಯನ್ನು ಮುರಿದಿದ್ದು ಹೊಸ ದಾಖಲೆ ನಿರ್ಮಿಸಿದೆ.

  ಆರಂಭಿಕರಾದ ಹಜರತ್ಹುಲ್ಲಾ ಝಾಝೈ ಹಾಗೂ ಉಸ್ಮಾನ್​ ಘಾನಿ ಮೊದಲ ವಿಕೆಟ್​ಗೆ ದಾಖಲೆಯ 236 ರನ್​ಗಳ ಜೊತೆಯಾಟವಾಡಿದರು. ಝಾಝೈ 62 ಎಸೆತಗಳಲ್ಲಿ 16 ಸಿಕ್ಸರ್​ ಹಾಗೂ 11 ಬೌಂಡರಿ ನೆರವಿನಿಂದ 162 ರನ್​ ಕಲೆಹಾಕಿದರು. ಉಸ್ಮಾನ್​ 48 ಎಸೆತಗಳಲ್ಲಿ 7 ಬೌಂಡರಿ 3 ಸಿಕ್ಸರ್​ ನೆರವಿನಿಂದ 73 ರನ್ ​ಗಳಿಸಿದರು.

  ಈ ಮೂಲಕ 2016ರಲ್ಲಿ ಐಪಿಎಲ್ ನಲ್ಲಿ ಕೊಹ್ಲಿ-ಎಬಿಡಿ ನಿರ್ಮಿಸಿದ್ದ 229 ರನ್​ಗಳ ವಿಶ್ವದಾಖಲೆಯನ್ನು ಈ ಜೋಡಿ ಅಳಿಸಿ ಹಾಕಿದೆ.