ಸನ್‌ರೈಸರ್ಸ್ ಹೈದರಾಬಾದ್‌ಗೆ ಎರಡನೇ ಸೋಲು - ನೈಟ್‌ ರೈಡರ್ಸ್‌ಗೆ ಸುಲಭ ಗೆಲುವು ತಂದ ಶುಭಮನ್

•   Sat, Sep 26 2020 11:28:52 PM



• ದುಬೈ, ಸೆ. 26 (DaijiworldNews/MB) : ಶನಿವಾರ ಸನ್‌ರೈಸರ್ಸ್ ಹೈದರಾಬಾದ್ ಹಾಗೂ ಕೋಲ್ಕತ್ತಾ ನೈಟ್‌ ರೈಡರ್ಸ್‌ ನಡುವೆ ನಡೆದ ಐಪಿಎಲ್‌ 2020 ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್‌ ರೈಡರ್ಸ್‌ 3 ವಿಕೆಟ್‌ಗೆ 145 ರನ್‌ ಪಡೆದು ಗೆಲುವು ದಾಖಲಿಸಿಕೊಂಡಿದೆ.

  

  ಟಾಸ್‌ ಗೆದ್ದ ಸನ್‌ರೈಸರ್ಸ್ ತಂಡದ ನಾಯಕ ಡೇವಿಡ್‌ ವಾರ್ನರ್‌ ಬ್ಯಾಟಿಂಗ್‌ ಆರಿಸಿಕೊಂಡು ನಿಗದಿತ 20 ಓವರ್‌ಗಳಲ್ಲಿ 4 ವಿಕೆಟ್‌ ಕಳೆದುಕೊಂಡು 142 ರನ್‌ ಗಳಿಸಿ ನೈಟ್‌ ರೈಡರ್ಸ್‌ಗೆ 143 ರನ್‌ಗಳ ಗುರಿ ನೀಡಿತ್ತು. ರೈಡರ್ಸ್‌ ಪಡೆಯ ಬಾಲಿಂಗ್‌ನ್ನು ಎದುರಿಸಿ ಬ್ಯಾಟಿಂಗ್‌ ಮಾಡಿದ ಕನ್ನಡಿಗ ಮನೀಷ್‌ ಪಾಂಡೆ (51), ನಾಯಕ ಡೇವಿಡ್‌ ವಾರ್ನರ್‌ (36) ಮತ್ತು ವೃದ್ಧಿಮಾನ್‌ ಸಾಹ (30) ಮೊತ್ತವನ್ನು ಪಡೆದಿದ್ದರು. ರೈಡರ್ಸ್‌ ಪರ ಪ್ಯಾಟ್‌ ಕಮಿನ್ಸ್‌, ವರುಣ್‌ ಚಕ್ರವರ್ತಿ ಮತ್ತು ಆಂಡ್ರೆ ರಸೆಲ್‌ ತಲಾ ಒಂದೊಂದು ವಿಕೆಟ್‌ ಪತನಗೊಳಿಸಿದರು.

  ಬಳಿಕ ಸನ್‌ರೈಸರ್ಸ್ ನೀಡಿದ 142 ರನ್‌ಗಳ ಗುರಿಯನ್ನು ಸುಲಭವಾಗಿ ಬೆನ್ನತ್ತಿದ ನೈಟ್‌ ರೈಡರ್ಸ್‌ 3 ವಿಕೆಟ್‌ಗೆ 145 ರನ್‌ ಪಡೆದು ಗೆಲುವು ದಾಖಲಿಸಿಕೊಂಡಿದೆ. ಸನ್‌ರೈಸರ್ಸ್‌ ಹೈದರಾಬಾದ್‌ ನೀಡಿದ್ದ ಸಾಧಾರಣ ಗುರಿ ಎದುರು ಉತ್ತಮ ಬ್ಯಾಟಿಂಗ್‌ ಮಾಡಿದ ಶುಭಮನ್‌ ಗಿಲ್‌ ಕೋಲ್ಕತ್ತಾ ನೈಟ್‌ರೈಡರ್ಸ್‌ಗೆ ಸುಲಭ ಜಯ ತಂದುಕೊಟ್ಟರು. 62 ಎಸೆತಗಳನ್ನು ಎದುರಿಸಿದ ಶುಭಮನ್‌ ಗಿಲ್‌ 5 ಬೌಂಡರಿ ಮತ್ತು 2 ಸಿಕ್ಸರ್‌ ಸಹಿತ 70 ರನ್‌ ಗಳಿಸಿದ್ದು ಇವರಿಗೆ ಉತ್ತಮ ಬೆಂಬಲ ನೀಡಿದ ಮಾರ್ಗನ್‌ ತಮ್ಮ ತಂಡಕ್ಕೆ ಗೆಲುವಿನ ರನ್‌ ಹೊಡೆದರು. ಹೈದರಾಬಾದ್‌ ಪರ ಖಲೀಲ್‌ ಅಹಮದ್‌, ಟಿ ನಟರಾಜನ್‌ ಮತ್ತು ರಶೀದ್‌ ಖಾನ್‌ ತಲಾ ಒಂದೊಂದು ವಿಕೆಟ್ ಪತನಗೊಳಿಸಿದರು.