ಅಬುಧಾಬಿ: ಅಭಿಮಾನಿಗಳ ಚಿತ್ತ ಸೋಮವಾರದ ಆರ್ ಸಿಬಿ ಪಂದ್ಯದತ್ತ

•   Sun, Sep 20 2020 11:03:54 PM



• ಅಬುಧಾಬಿ, ಸೆ. 20 (DaijiworldNews/SM): ಐಪಿಎಲ್ ಟೂರ್ನಿ ಆರಂಭಗೊಂಡಿದ್ದು, ಸೋಮವಾರದಂದು ವಿರಾಟ್ ನೇತೃತ್ವದ ಆರ್ ಸಿಬಿ ತಂಡ ಮೊದಲ ಪಂದ್ಯವನ್ನಾಡಲಿದೆ. ಅಭಿಮಾನಿಗಳ ಚಿತ್ತ ಸೋಮವಾರದ ಪಂದ್ಯದತ್ತ ನೆಟ್ಟಿದೆ.

  

  ಈ ಕಾದಾಟದಲ್ಲಿ ಆರ್‌ಸಿಬಿ ತಂಡಕ್ಕೆ ಮುಖಾಮುಖಿಯಾಗುತ್ತಿರುವುದು ಡೇವಿಡ್ ವಾರ್ನರ್ ನೇತೃತ್ವದ ಸನ್ ರೈಸರ್ಸ್ ಹೈದರಾಬಾದ್ ತಂಡದ ಜೊತೆ. ಸ್ಪೋಟಕ ಆಟಗಾರರನ್ನು ಹೊಂದಿರುವ ಈ ಎರಡೂ ತಂಡಗಳ ನಡುವಿನ ಪಂದ್ಯ ಅಭಿಮಾನಿಗಳಿಗೆ ರೋಚವಾಗಿರಲಿದೆ. ಈಗಾಗಲೇ ಕೊಹ್ಲಿ ಅಭಿಮಾನಿಗಳು ವಿರಾಟ ಪ್ರದರ್ಶನಕ್ಕಾಗಿ ಕಾಯುತ್ತಿದ್ದಾರೆ. ಮತ್ತೊಂದೆಡೆ ಆರ್ ಸಿಬಿ ತಂಡ ಪ್ರಶಸ್ತಿ ಗೆಲ್ಲುವುದನ್ನು ನೋಡಬೇಕೆಂದು ಅಭಿಮಾನಿಗಳು ಕಾತರಲಿದ್ದಾರೆ. ಈ ಹಿನ್ನೆಲೆ ಮೊದಲ ಪಂದ್ಯ ಅಭಿಮಾನಿಗಳಿಗೆ ಕುತೂಹಲದ ಕಣವಾಗಲಿದೆ.

  ಎರಡೂ ತಂಡಗಳ ನಾಯಕರು ಐಪಿಎಲ್‌ನಲ್ಲಿ ಕೆಲ ಪ್ರಮುಖ ದಾಖಲೆಗಳನ್ನು ಹೊಂದಿದ್ದಾರೆ. ಸನ್ ರೈಸರ್ಸ್ ಹೈದರಾಬಾದ್ ನಾಯಕ ವಾರ್ನರ್ ಮೂರು ಬಾರಿ ಆರೆಂಜ್ ಕ್ಯಾಪ್ ಪಡೆದುಕೊಂಡಿದ್ದಾರೆ. ಮತ್ತೊಂದೆಡೆ ಆರ್ ಸಿಬಿ ನಾಯಕ ಕೊಹ್ಲಿ ದಾಖಲೆಗಳ ಪಟ್ಟಿಯನ್ನೇ ಹೊಂದಿದ್ದಾರೆ. ಈ ಹಿನ್ನೆಲೆ ಈ ಇಬ್ಬರ ನಾಯಕತ್ವ ಮಹತ್ವ ಪಡೆದುಕೊಂಡಿದೆ. ಇನ್ನು ಈ ಹಿಂದಿನ ಆವೃತ್ತಿಗಳಲ್ಲಿ ಹೈದರಾಬಾದ್ ತಂಡ ಆರ್ ಸಿ ಬಿ ವಿರುದ್ಧ 7 ಪಂದ್ಯಗಳಲ್ಲಿ ಜಯ ಸಾಧಿಸಿದ್ದರೆ, ಆರ್ ಸಿ ಬಿ ಆರು ಪಂದ್ಯ ಗೆದ್ದುಕೊಂಡಿರುವುದು ಇತಿಹಾಸ. ಆದರೆ, ವಿದೇಶಿ ಅಂಗಳದಲ್ಲಿ ನಡೆಯುವ ಈ ಟೂರ್ನಿಯಲ್ಲಿ ಯಾವ ಫಲಿತಾಂಶ ಬರಲಿದೆ ಎನ್ನುವುದು ಕುತೂಹಲ.