ಸತತ ಎರಡು ಪಂದ್ಯಗಳಲ್ಲಿ ಯುಪಿ ಯೋಧಗೆ ಫಲಿತಾಂಶವಿಲ್ಲ

•   Thu, Aug 08 2019 09:21:54 AM



• ಬಿಹಾರ, ಆ 08 (DaijiworldNews/SM): ಪಾಟಲಿಪುತ್ರದಲ್ಲಿ ನಡೆದ ಯುಪಿ ಯೋಧಾ-ತಮಿಳ್‌ ತಲೈವಾಸ್‌ ನಡುವಿನ ಪ್ರೋ ಕಬಡ್ಡಿ ಪಂದ್ಯ 28-28 ರೋಚಕ ಟೈನಲ್ಲಿ ಅಂತ್ಯಗೊಂಡಿದೆ.

  

  ಗಮನಾರ್ಹ ವಿಚಾರವೆಂದರೆ, ಯುಪಿ ಯೋಧಾ ತಂಡ ಸತತ ಎರಡನೇ ಪಂದ್ಯವನ್ನು ಟೈ ಮಾಡಿಕೊಂಡಿರುವುದು. ಈ ಹಿಂದಿನ ಪಂದ್ಯದಲ್ಲಿ ತೆಲುಗು ಟೈಟಾನ್ಸ್‌ ವಿರುದ್ಧವೂ ಕೂಡ 20-20 ಅಂಕಗಳ ಟೈ ಸಾಧಿಸಿತ್ತು.

  ತಮಿಳ್‌ ತಲೈವಾಸ್‌ ವಿರುದ್ಧದ ಪಂದ್ಯವನ್ನು ಯುಪಿ ಯೋಧಾ ತಂಡ ಗೆಲ್ಲುವ ಲಕ್ಷಣಗಳಿದ್ದವು. ಆದರೆ, ಅಂತಿಮ ಹಂತದಲ್ಲಿ ಎಲ್ಲಾ ಲೆಕ್ಕಾಚಾರಗಳು ತಲೆಕೆಳಗಾದವು. ಕೊನೆಯ ರೈಡ್‌ನ‌ಲ್ಲಿ ತಮಿಳ್‌ ತಲೈವಾಸ್‌ ತಂಡದ ರೈಡರ್‌ ಅಜಯ್‌ ಠಾಕೂರ್‌, ನಿತೀಶ್‌ ಕುಮಾರ್‌ ಅವರನ್ನು ಔಟ್ ಮಾಡುತ್ತಿದ್ದಂತೆ 28-28ರಿಂದ ಪಂದ್ಯ ಟೈ ಆಯಿತು.

  ಇದಕ್ಕೂ ಮೊದಲು ಯುಪಿ ಯೋಧಾ ಕೇವಲ ಒಂದು ಅಂಕದಿಂದ ಮುನ್ನಡೆಯನ್ನು ಕಾಯ್ದುಕೊಂಡಿತ್ತು. ಆದರೆ ಠಾಕೂರ್‌ ಅವರು ತಂಡವನ್ನು ಸೋಲಿನ ಸುಳಿಯಿಂದ ತಪ್ಪಿಸಿದರು. ಠಾಕೂರ್ ತಂಡಕ್ಕೆ ಆಪತ್ ಬಾಂದವಂತಾದರು. ಅವರ ಮಿಂಚಿನ ರೈಡ್‌ ತಂಡದ ಸೋಲನ್ನು ತಪ್ಪಿಸಿತು. ತಲೈವಾಸ್‌ ಪರ ರಾಹುಲ್ ಚೌಧರಿ ಮತ್ತು ಶಬ್ಬೀರ್‌ ಬಾಪು ಉತ್ತಮ ರೈಡಿಂಗ್‌ನಿಂದ ಗಮನ ಸೆಳೆದರು. ಯುಪಿ ಪರ ರಿಷಾಂಕ್‌ ದೇವಾಡಿಗ ರೈಡಿಂಗ್ ನಲ್ಲಿ ಹಾಗೂ ಸುಮಿತ್‌ ಟ್ಯಾಕಲ್ ನಲ್ಲಿ ಮಿಂಚಿದರು.