ಆಪರೇಶನ್ ಕಮಲ ವಿಫಲಗೊಳ್ಳುವ ಸಾಧ್ಯತೆ-ಜಾರಕಿಹೊಳಿ ಜೊತೆ ಅತೃಪ್ತ ಶಾಸಕರು ರಾಜಿನಾಮೆ ನೀಡಲ್ಲ?

•   Tue, May 21 2019 09:30:30 AM



• ಬೆಂಗಳೂರು,ಮೇ21(DaijiworldNews/AZM):ಕಾಂಗ್ರೆಸ್ ನ ಅತೃಪ್ತ ಶಾಸಕ ರಮೇಶ್ ಜಾರಕಿಹೊಳಿ ಜೊತೆ ಉಳಿದ ಅತೃಪ್ತ ಶಾಸಕರು ರಾಜಿನಾಮೆಗೆ ಮುಂದಾಗಿದ್ದಾರೆ ಎಂದು ಹೇಳಿದ್ದು, ಇದೀಗ ಹಿಂದೇಟು ಹಾಕಿದ್ದಾರೆ.ಈ ಹಿನ್ನಲೆ ಬಿಜೆಪಿ ರೂಪಿಸಿರುವ ಆಪರೇಷನ್​ ಕಮಲ ಯೋಜನೆ ಸಫಲಗೊಳ್ಳುವ ಲಕ್ಷಣಗಳು ಕಂಡುಬರುತ್ತಿಲ್ಲ. 

  

  ಕಾಂಗ್ರೆಸ್​​-ಜೆಡಿಎಸ್​ ಸರ್ಕಾರ ರಚನೆ ಆದ ಬೆನ್ನಲ್ಲೇ ಆಪರೇಷನ್​ ಕಮಲದ ಭೀತಿ ಮೈತ್ರಿಯನ್ನು ಕಾಡಿತ್ತು. ಒಂದೆರಡು ಅತೃಪ್ತರು ಬಹಿರಂಗವಾಗಿಯೇ ಬಂಡಾಯ ವ್ಯಕ್ತಪಡಿಸಿದ್ದರು. ಆದರೆ, ಕೆಲ ರೆಬೆಲ್​ ಶಾಸಕರು ಈವರೆಗೆ ಬಹಿರಂಗವಾಗಿ ಪಕ್ಷ ಬಿಡುವ ಬಗ್ಗೆ ಹೇಳಿಕೆ ನೀಡಿಲ್ಲ. ಈಗ ಅವರು ಪಕ್ಷ ಬಿಡಬಾರದು ಎನ್ನುವ ನಿರ್ಧಾರಕ್ಕೆ ಬಂದಿದ್ದಾರೆ ಎನ್ನುವ ಮಾತುಗಳು ಕೇಳಿಬರುತ್ತಿದೆ.

  ಮುಂದಿನ 20 ವರ್ಷಗಳ ರಾಜಕೀಯ ಭವಿಷ್ಯ ದೃಷ್ಟಿಯಲ್ಲಿಟ್ಟುಕೊಂಡು ರಾಜೀನಾಮೆ ನೀಡಲು ರೆಬೆಲ್​ಗಳು ಹಿಂಜರಿಯುತ್ತಿದ್ದಾರಂತೆ. ಇತ್ತೀಚೆಗೆ ನಾಗೇಂದ್ರ, ಭೀಮಾನಾಯ್ಕ್, ಮಹೇಶ ಕಮಠಳ್ಳಿ, ಪ್ರತಾಪಗೌಡ ಪಾಟೀಲ್, ಬಿ ಸಿ ಪಾಟೀಲ, ಶಿವರಾಮ ಹೆಬ್ಬಾರ್ ಸೇರಿ ಇತರೆ ನಾಯಕರು ರಮೇಶ್​ ಜಾರಕಿಹೊಳಿ ಜೊತೆ ಚರ್ಚೆ ನಡೆಸಿದ್ದಾರೆ. ಈ ವೇಳೆ ಹೀಗೊಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ ಎನ್ನಲಾಗಿದೆ. ಕಾಂಗ್ರೆಸ್​ ಅತೃಪ್ತರ ಈ ನಡೆ ರಮೇಶ್​ ಜಾರಕಿಹೊಳಿಯನ್ನು ಏಕಾಂಗಿ ಮಾಡಿದೆ.

  ಬಿಜೆಪಿ ರಾಜ್ಯಾಧ್ಯಕ್ಷ ಯಡಿಯೂರಪ್ಪ ಆಪರೇಷನ್​ ಕಮಲದ ರುವಾರಿ ಎನ್ನಲಾಗುತ್ತಿದೆ. ಆದರೆ, ಪಕ್ಷದಲ್ಲಿ ಇವರ ವರ್ಚಸ್ಸು ಕಡಿಮೆ ಆಗುತ್ತಿದೆ ಎನ್ನುವ ಮಾತಿದೆ. ಒಂದೊಮ್ಮೆ ಅವರನ್ನು ನಂಬಿ ಬಿಜೆಪಿಗೆ ಸೇರಿ ಅತಂತ್ರವಾಗಿಬಿಟ್ಟರೆ ಎನ್ನುವ ಭಯ ಉಳಿದ ಅತೃಪ್ತ ಶಾಸಕರನ್ನು ಕಾಡುತ್ತಿದೆ ಎನ್ನಲಾಗಿದೆ.