ಅಮಿತ್ ಶಾ ಕೊಲೆ ಆರೋಪಿ ಎಂದ ರಾಹುಲ್ ಗೆ ಚುನಾವಣಾ ಆಯೋಗ ಕ್ಲೀನ್ ಚಿಟ್

•   Thu, May 02 2019 11:45:42 PM



• ನವದೆಹಲಿ,ಮೇ02(DaijiworldNews/AZM): ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್​​ ಶಾ ಅವರನ್ನು ಲೋಕಸಭಾ ಚುನಾವಣಾ ಪ್ರಚಾರದ ವೇಳೆ ಕಾಂಗ್ರೆಸ್​​ ಅಧ್ಯಕ್ಷ ರಾಹುಲ್ ಗಾಂಧಿಯವರು 'ಕೊಲೆ ಆರೋಪಿ' ಎಂದು ಪ್ರಸ್ತಾಪಿಸಿದ್ದ ಪ್ರಕರಣದಲ್ಲಿ ಕೇಂದ್ರ ಚುನಾವಣೆ ಆಯೋಗ ರಾಹುಲ್ ಅವರಿಗೆ ಕ್ಲೀನ್​​ ಚಿಟ್​​ ನೀಡಿದೆ.

  

  ಕಳೆದ ತಿಂಗಳು ಏಪ್ರಿಲ್​​​ 23ರಂದು ಮಧ್ಯಪ್ರದೇಶದ ಜಬಲ್‌ಪುರ ಜಿಲ್ಲೆಯಲ್ಲಿ ಚುನಾವಣಾ ಪ್ರಚಾರದ ಭಾಗವಾಗಿ ಕಾಂಗ್ರೆಸ್​​ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ "ಅಮಿತ್​ ಶಾ ಕೊಲೆ ಪ್ರಕರಣವೊಂದರಲ್ಲಿ ಪ್ರಮುಖ ಆರೋಪಿ. ಜೈ ಶಾ ಎಂಬ ಹೆಸರು ಕೇಳಿದ್ದೀರಾ? ಅವರೇ 50 ಸಾವಿರವನ್ನು 80 ಕೋಟಿಯನ್ನಾಗಿ ಪರಿವರ್ತಿಸಿದವರು. ಶಾ ಒಬ್ಬ ಜಾದೂಗಾರ" ಎಂದು ರಾಹುಲ್​​ ವ್ಯಂಗ್ಯವಾಡಿದ್ದರು.

  ರಾಹುಲ್​​ ಅಮಿತ್​​ ಶಾ ಅವರನ್ನು ಕೊಲೆ ಪ್ರಕರಣದ ಆರೋಪಿ ಎಂಬುದನ್ನು ಪ್ರಶ್ನಿಸಿ ಆಯೋಗಕ್ಕೆ ದೂರು ನೀಡಲಾಗಿತ್ತು. ಸದ್ಯ ಈ ಪ್ರಕರಣ ವಿಚಾರಣೆ ನಡೆಸಿದ ಆಯೋಗ ರಾಹುಲ್​​ ಯಾವುದೇ ರೀತಿ ನೀತಿ ಸಂಹಿತೆ ಉಲ್ಲಂಘನೆ ಮಾಡಿಲ್ಲ ಎಂದು ಕೇಂದ್ರ ಚುನಾವಣಾ ಆಯೋಗ ಸ್ಪಷ್ಟಪಡಿಸಿದೆ.

  ಈ ಹಿಂದೆ 2015 ಜನವರಿಯಲ್ಲಿಯೇ ಸೊಹ್ರಾಬುದ್ದೀನ್ ಶೇಕ್‌ ನಕಲಿ ಎನ್‌ಕೌಂಟರ್ ಪ್ರಕರಣದಲ್ಲಿ ಅಮಿತ್ ಶಾ ಅವರನ್ನು ನಿರ್ದೋಷಿ ಎಂದು ಸಿಬಿಐ ನ್ಯಾಯಾಲಯ ತೀರ್ಪು ನೀಡಿತ್ತು. ಈ ಪ್ರಕರಣದಲ್ಲಿ ಅಮಿತ್​ ಶಾ ಆರೋಪಿ ಎಂದು ರಾಹುಲ್​​ ಪ್ರಚಾರದ ವೇಳೆ ಪ್ರಸ್ತಾಪಿಸಿದ್ದರು ಎಂದು ಕೃಷ್ಣವದನ್ ಬ್ರಹ್ಮಭಟ್ ಎಂಬುವವರು ಆಯೋಗಕ್ಕೆ ದೂರು ನೀಡಿದ್ದರು.