ಉಡುಪಿ - ಚಿಕ್ಕಮಗಳೂರು ಕ್ಷೇತ್ರವನ್ನು ಇನ್ನಷ್ಟು ಪ್ರಗತಿ ಪಥದತ್ತ ಕೊಂಡೊಯ್ಯುವ ಕನಸಿದೆ - ಶೋಭಾ

•   Mon, Apr 15 2019 07:11:53 AM



• ಚಿಕ್ಕಮಗಳೂರು, ಎ15(SS): ನರೇಂದ್ರ ಮೋದಿ ಭಾರತವನ್ನು ವಿಶ್ವಗುರುವನ್ನಾಗಿಸುವ ಛಲ ತೊಟ್ಟ ಏಕೈಕ ಪ್ರಧಾನಿ ಎಂದು ಉಡುಪಿ - ಚಿಕ್ಕಮಗಳೂರು ಲೋಕಸಭಾ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಶೋಭಾ ಕರಂದ್ಲಾಜೆ ಹೇಳಿದ್ದಾರೆ. 

  

  ಚುನಾವಣಾ ಪ್ರಚಾರ ಸಭೆಯಲ್ಲಿ ಮಾತನಾಡಿದ ಅವರು, ಪ್ರಧಾನಿ ಮೋದಿಯವರು ಯಾವುದೇ ತಾರತಮ್ಯಗಳನ್ನು ಮಾಡದೆ ದೇಶವನ್ನು ಏಕರೂಪವಾಗಿ ಕಂಡಿದ್ದಾರೆ. ರಾಜ ತಾಂತ್ರಿಕ ಮೌಲ್ಯಗಳನ್ನೇ ಎತ್ತಿ ಹಿಡಿದು ಭಾರತವನ್ನು ವಿಶ್ವ ಗುರುವನ್ನಾಗಿಸುವ ಛಲ ತೊಟ್ಟ ಪ್ರಧಾನಿ ನರೇಂದ್ರ ಮೋದಿ ಎಂದು ಹೇಳಿದರು.  
  
  ದೇಶವನ್ನು ಸಮಗ್ರವಾಗಿ ಅಭಿವೃದ್ಧಿಪಡಿಸಿ ನೆರೆಯ ರಾಷ್ಟ್ರಗಳು ಅದನ್ನು ಮೆಚ್ಚಿ ಅನುಸರಿಸಬೇಕೆಂಬ ಇರಾದೆ ಬಿಜೆಪಿಯವರದು. ಆದರೆ ಖುರ್ಚಿಯ ರಕ್ಷಣೆಗಾಗಿ ಮಾತ್ರ ಸರಕಾರಗಳು ಜೀವಂತವಾಗಿರಬೇಕು ಎಂಬ ನೀತಿಯನ್ನು ಕಾಂಗ್ರೆಸ್ ಅನುಸರಿಸುತ್ತಿದೆ ಎಂದು ದೂರಿದರು.

  ಕೇಂದ್ರದ ಸಾಧನೆಯನ್ನು ಸಹಿಸಲಾರದೆ ಪ್ರತಿಪಕ್ಷಗಳು ಹುರುಳಿಲ್ಲದ ಆರೋಪ ಮಾಡುತ್ತಿದೆ. ದೇಶದ ಸೈನ್ಯ ಸೇರಿದಂತೆ ಸೈನಿಕರಿಗೆ ಆನೆಬಲ ತುಂಬುವ ಕೆಲಸ ಮಾಡಿದ್ದು ಕೇಂದ್ರ ಸರ್ಕಾರ. ಇದರ ಜೊತೆಗೆ ಗ್ಯಾಸ್‌ ಸಿಲಿಂಡರ್‌, ಶೌಚಾಲಯ, ಆರೋಗ್ಯ ವಿಮೆ, ಆಯುಷ್ಮಾನ್‌ ಭಾರತ, ಆತ್ಮಸ್ಥೈರ್ಯವನ್ನು ತುಂಬುವ ಕೆಲಸವನ್ನೂ ನಮ್ಮ ಸರ್ಕಾರ ಮಾಡಿದೆ ಎಂದು ತಿಳಿಸಿದರು.

  ಚಿಕ್ಕಮಗಳೂರು – ಉಡುಪಿ ಕ್ಷೇತ್ರಕ್ಕೆ ಕೇಂದ್ರದಿಂದ 560 ಕೋಟಿ ರೂ ತಂದು ರಸ್ತೆ ಅಭಿವೃದ್ಧಿಪಡಿಸಲಾಗಿದೆ.ಮುಂದಿನ ದಿನಗಳಲ್ಲಿ ಕ್ಷೇತ್ರವನ್ನು ಇನ್ನಷ್ಟು ಪ್ರಗತಿ ಪಥದತ್ತ ಕೊಂಡೊಯ್ಯುವ ಕನಸಿದೆ ಎಂದು ಭರವಸೆಯನ್ನು ನೀಡಿದರು.