ರಸ್ತೆ ಮದ್ಯೆ ನಿದ್ರಿಸಿದ ಪಾನಮತ್ತ ಬೈಕ್ ಸವಾರ, ಇಂಡಿಕೇಟರ್‌ ಉಳಿಸಿತು ಪ್ರಾಣ.!

•   Tue, Oct 10 2023 12:19:46 PM



• ಚಿಕ್ಕಮಗಳೂರು, ಅ 10 (DaijiworldNews/MS): ಕುಡಿತದ ಅಮಲಿನಲ್ಲಿ ವ್ಯಕ್ತಿಯೋರ್ವ ರಸ್ತೆ ಮದ್ಯದಲ್ಲೇ ತನ್ನ ಬೈಕ್ ಪಕ್ಕ ಮಲಗಿದ್ದು, ಬೈಕ್‌ ಇಂಡಿಕೇಟರ್‌ ಆನ್‌ ಆಗಿದ್ದರಿಂದ ಕುಡುಕ ಸವಾರನ ಜೀವ ಉಳಿದಿದೆ.

  ಈ ಘಟನೆ ಚಿಕ್ಕಮಗಳೂರಿನ ಮೂಡಿಗೆರೆ ತಾಲೂಕಿನ ಸಬ್ಬೇನಹಳ್ಳಿ ಗ್ರಾಮದ ಸಮೀಪ ನಡೆದಿದೆ. ಹಾಸನದಿಂದ ಸಂಬಂಧಿಕರ ಮನೆಗೆ ಬಂದಿದ್ದ ಸವಾರ, ಕುಡಿದ ಮತ್ತಿನಲ್ಲಿ ಬೈಕ್ ಓಡಿಸಲು ಮುಂದಾಗಿದ್ದಾನೆ. ಆದರೆ ಬೈಕ್‌ ಕಂಟ್ರೋಲ್‌ಗೆ ಸಿಗದೆ ಅತ್ತಿಂದಿತ್ತ ಓಡಿಸಿ ರಸ್ತೆ ಪಕ್ಕಕ್ಕೆ ಬಿದ್ದಿದೆ. ಬೈಕ್‌ ಪಕ್ಕದಲ್ಲೇ ಕುಡುಕ ಸವಾರ ಮಲಗಿ ಬಿಟ್ಟಿದ್ದ.

  ರಾತ್ರಿ ಸುಮಾರು 11 ಗಂಟೆ ರಸ್ತೆಯಲ್ಲಿ ಬೈಕ್ ಬಿದ್ದಿರುವುದನ್ನು ಕಂಡು ಬೈಕ್‌ ಆಕ್ಸಿಡೆಂಟ್‌ ಆಗಿರಬೇಕು ಇತರ ವಾಹನ ಸವಾರರು ಅಂದಾಜಿಸಿ ಆ್ಯಂಬುಲೆನ್ಸ್‌ಗೆ ಕರೆ ಮಾಡಿದ್ದಾರೆ. ಇತ್ತ ಆ್ಯಂಬುಲೆನ್ಸ್‌ ಬರುತ್ತಿದ್ದಂತೆ ಸೈರನ್ ಶಬ್ದಕ್ಕೆ ಕುಡುಕ ದಿಢೀರ್‌ ಎದ್ದು ಕುಳಿತಿದ್ದಾನೆ. ಆಗ ಆತ ಕಂಠ ಪೂರ್ತಿ ಕುಡಿದು ಬೈಕ್‌ ಓಡಿಸಲು ಆಗದೆ ರಸ್ತೆಯಲ್ಲೇ ಮಲಗಿ ಬಿಟ್ಟಿದ್ದ ಎನ್ನುವುದು ಸೇರಿದ್ದ ಜನರಿಗೆ ಅರಿವಾಗಿತ್ತು

  ಈತ ರಸ್ತೆ ಮದ್ಯೆ ಮಲಗಿದ್ದಾಗ ನೂರಾರು ವಾಹನಗಳು ಆದೇ ಮಾರ್ಗವಾಗಿ ಸಂಚರಿಸಿದ್ದು, ಪಕ್ಕದಲ್ಲಿದ್ದ ಬೈಕ್‌ ಇಂಡಿಕೇಟರ್‌ ಆನ್‌ ಆಗಿದ್ದರಿಂದ ಈತನ ಜೀವ ಉಳಿದಿದೆ. ವಿಚಾರ ತಿಳಿಯುತ್ತಿದ್ದಂತೆ ಬಣಕಲ್ ಠಾಣಾ ಪೊಲೀಸರು ಸ್ಥಳಕ್ಕಾಗಮಿಸಿ ಬೈಕ್ ಸವಾರನ ವಶಕ್ಕೆ ಪಡೆದು ವಿಚಾರಣೆ ನಡೆಸಿದ್ದಾರೆ.