ಮನ್‌ ಕೀ ಬಾತ್‌, ಭಾಯಿಯೊ ಬೆಹನೊ ಎಂಬ ಭಾಷಣ ಬಿಟ್ಟು ಮೋದಿ ಬೇರೇನೂ ಮಾಡಿಲ್ಲ - ಸಿದ್ದರಾಮಯ್ಯ

•   Tue, Apr 09 2019 08:58:50 AM



• ಬೆಂಗಳೂರು, ಎ09(SS): ಮನ್‌ ಕೀ ಬಾತ್‌, ಭಾಯಿಯೊ ಬೆಹನೊ ಎಂಬ ಭಾಷಣ ಬಿಟ್ಟು ಪ್ರಧಾನಿ ನರೇಂದ್ರ ಮೋದಿ ಐದು ವರ್ಷಗಳಲ್ಲಿ ಬೇರೇನೂ ಮಾಡಿಲ್ಲ ಎಂದು ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ವ್ಯಂಗ್ಯವಾಡಿದರು.

  

  ಚುನಾವಣಾ ಪ್ರಚಾರದ ವೇಳೆ ಮಾತನಾಡಿದ ಅವರು, ವಿದೇಶ ಪ್ರವಾಸ, ಮನ್‌ ಕೀ ಬಾತ್‌, ಭಾಯಿಯೊ ಬೆಹನೊ ಎಂಬ ಭಾಷಣ ಬಿಟ್ಟು ಬೇರೆ ಏನನ್ನೂ ಮೋದಿ ಮಾಡಿಲ್ಲ. ಮೋದಿಯವರ ಬಾಯಿ ಕೇವಲ ಬಡಾಯಿ ಕೊಚ್ಚಿಕೊಳ್ಳುತ್ತದೆ, ಆದರೆ ಸಾಧನೆ ಮಾತ್ರ ಶೂನ್ಯವಾಗಿರುತ್ತದೆ. ಜನರಿಗೆ ಕೊಟ್ಟ ಮಾತನ್ನು ಈಡೇರಿಸದ ಅವರಿಗೆ ಏಕೆ ಮತ ಹಾಕಬೇಕು ಎಂದು ಪ್ರಶ್ನಿಸಿದ್ದಾರೆ.

  ಬಿಜೆಪಿಯವರೆಲ್ಲರೂ ಭ್ರಷ್ಟಾಚಾರದ ಭಾಗಿದಾರ್‌ ಆಗಿದ್ದಾರೆ. ಮೋದಿಯವರು ಸ್ವಿಸ್‌ ಬ್ಯಾಂಕ್‌ನಲ್ಲಿನ ಕಪ್ಪು ಹಣವನ್ನು ತಂದು ಪ್ರತಿಯೊಬ್ಬರ ಬ್ಯಾಂಕ್‌ ಖಾತೆಗೆ 15 ಲಕ್ಷ ರೂ. ಹಾಕುವುದಾಗಿ ಹೇಳಿದ್ದರು. ಆದರೆ 15 ಪೈಸೆಯನ್ನೂ ಜನರಿಗೆ ನೀಡಲಿಲ್ಲ ಎಂದು ಟೀಕಿಸಿದರು.

  ಕೇವಲ ಚುನಾವಣೆಯ ಸಮಯದಲ್ಲಿ ಮಾತು ಎತ್ತಿದರೆ ಚೌಕಿದಾರ್‌ ಎನ್ನುತ್ತಾರೆ. ಜೈಲಿಗೆ ಹೋಗಿಬಂದ ಯಡಿಯೂರಪ್ಪ, ಕಟ್ಟಾ ಸುಬ್ರಹ್ಮಣ್ಯ ನಾಯ್ಡು, ಜನಾರ್ದನ ರೆಡ್ಡಿ ಎಲ್ಲರೂ ಈಗ ಚೌಕಿದಾರ್‌ ಆಗಿದ್ದಾರೆ. ಅವರನ್ನು ಚೌಕಿದಾರ್‌ ಬದಲು ಭಾಗಿದಾರ್‌ ಎಂದು ಹೇಳಬೇಕು ಎಂದು ವ್ಯಂಗ್ಯ ಮಾಡಿದರು.