ಬಿಜೆಪಿಯ ಸಂಸ್ಥಾಪನಾ ದಿನದಂದೇ ಪಕ್ಷ ತೊರೆದು ಕಾಂಗ್ರೆಸ್ ಸೇರಿದ ಶತ್ರುಘ್ನಾ ಸಿನ್ನಾ

•   Sat, Apr 06 2019 02:16:04 PM



• ಬಿಹಾರ, ಎಂ6(SS): ಬಿಜೆಪಿಯ ಸಂಸ್ಥಾಪನಾ ದಿನದಂದೇ ಭಾರತೀಯ ಜನತಾ ಪಕ್ಷದ ಬಂಡಾಯ ಮುಖಂಡ, ಬಾಲಿವುಡ್ ನಟ, ಪಾಟ್ನ ಸಾಹಿಬ್ ಸಂಸದ ಶತ್ರುಘ್ನಾ ಸಿನ್ನಾ ಅಧಿಕೃತವಾಗಿ ಕಾಂಗ್ರೆಸ್ ಪಕ್ಷಕ್ಕೆ ಸೇರ್ಪಡೆಯಾಗಿದ್ದಾರೆ.

  

  ಬಿಜೆಪಿ ಪಕ್ಷ ತೊರೆದು ಕಾಂಗ್ರೆಸ್ ಪಕ್ಷವನ್ನು ಸೇರ್ಪಡೆಯಾಗುವುದಾಗಿ ಕಳೆದ ವಾರವಷ್ಟೇ ಸಿನ್ನಾ ಘೋಷಿಸಿದ್ದರು. ಪದೇ ಪದೇ ಬಿಜೆಪಿ ಪಕ್ಷದ ಧೋರಣೆ, ಪ್ರಧಾನಿ ನರೇಂದ್ರ ಮೋದಿ ಮತ್ತು ಅಮಿತ್ ಶಾ ವಿರುದ್ಧ ಸಿನ್ನಾ ಬಹಿರಂಗವಾಗಿ ಅಸಮಾಧಾನ ಹೊರಹಾಕುತ್ತಿದ್ದರು. ಇದೀಗ ಬಿಜೆಪಿ ತೊರೆದು ಶತ್ರುಘ್ನಾ ಸಿನ್ನಾ ಅಧಿಕೃತವಾಗಿ ಕಾಂಗ್ರೆಸ್ ಪಕ್ಷಕ್ಕೆ ಸೇರ್ಪಡೆಯಾಗಿದ್ದಾರೆ.

  ಈ ವಿಚಾರವಾಗಿ ಟ್ವೀಟ್ ಮಾಡಿರುವ ಶತ್ರುಘ್ನಾ ಸಿನ್ನಾ, ತುಂಬಾ ಭಾರವಾದ ಹೃದಯದಿಂದ, ನೋವಿನಿಂದ ಕೊನೆಗೂ ನಾನು ನನ್ನ ಹಳೆ ಪಕ್ಷಕ್ಕೆ ಗುಡ್ ಬೈ ಹೇಳಿದ್ದೇನೆ. ಅದಕ್ಕೆ ಕಾರಣ ಏನೆಂದು ಎಲ್ಲರಿಗೂ ಗೊತ್ತಿದೆ. ಏಪ್ರಿಲ್ 06 ಬಿಜೆಪಿಯ ಸಂಸ್ಥಾಪನಾ ದಿನದಂದು ನಾನು ಕಾಂಗ್ರೆಸ್ ಸೇರ್ಡೆಗೊಂಡಿದ್ದೇನೆ ಎಂದು ಹೇಳಿದ್ದಾರೆ.

  ಭಾರತೀಯ ಜನತಾ ಪಕ್ಷದ ಧ್ರುವತಾರೆಯಾಗಿದ್ದ ಭಾರತ್ ರತ್ನ ನಾನಾಜಿ ದಶಮುಖ್, ದಿವಂಗತ ಅಟಲ್ ಬಿಹಾರಿ ವಾಜಪೇಯಿ ಹಾಗೂ ನನ್ನ ಆಪ್ತ ಗೆಳೆಯರು, ಗುರು, ಹಿತೈಷಿಯಾದ ಎಲ್ ಕೆ ಅಡ್ವಾಣಿ ಅವರ ಮಾರ್ಗದರ್ಶನ, ಆಶೀರ್ವಾದದೊಂದಿಗೆ ಬಿಜೆಪಿಯಲ್ಲಿ ಬೆಳೆದಿದ್ದೇನೆ ಎಂದು ಸಿನ್ನಾ ಮತ್ತೊಂದು ಟ್ವೀಟ್ ಮಾಡಿ ಹೇಳಿದ್ದಾರೆ.