ಹೊಲಕ್ಕಿಳಿದು 'ಗೋಧಿ ಕೊಯ್ಲು' ಮಾಡಿ ಪ್ರಚಾರ ಕಾರ್ಯ ಆರಂಭಿಸಿದ ನಟಿ ಹೇಮಾಮಾಲಿನಿ

•   Mon, Apr 01 2019 01:33:36 PM



• ಮಥುರಾ, ಏ 1 (MSP): ಇತ್ತೀಚೆಗಷ್ಟೇ ಬಿಜೆಪಿ ಸೇರ್ಪಡೆಗೊಂಡಿರುವ ಬಾಲಿವುಡ್ ತಾರೆ ಹೇಮಾಮಾಲಿನಿ ಮಥುರಾ ಕ್ಷೇತ್ರದಿಂದ ಕಣಕ್ಕಿಳಿದಿದ್ದು, ಭರ್ಜರಿಯಾಗಿಯೇ ಪ್ರಚಾರ ಕಾರ್ಯ ಪ್ರಾರಂಭಿಸಿದ್ದಾರೆ.

  

  ಗೋವರ್ಧನ ಕ್ಷೇತ್ರಕ್ಕೆ ಭೇಟಿ ನೀಡಿದ ನಟಿ ಹೇಮಾಮಾಲಿನಿ ರೈತ ಮಹಿಳೆಯರೊಂದಿಗೆ ಗದ್ದೆಗಿಳಿದು ಗೋಧಿ ಕಟಾವು ಮಾಡುವ ಮೂಲಕ ಪ್ರಚಾರ ಆರಂಭಿಸಿದರು. ಮಥುರಾದಲ್ಲಿ ರೈತರಿಗೆ ಗೋಧಿ ಕಟಾವು ಮಾಡುವ ಕಾಲವಿದು. ಕಟಾವು ನಿರತ ರೈತ ಮಹಿಳೆಯರ ಬಳಿ ತೆರಳಿ ತಾವು ಗೋಧಿ ಕಟಾವು ಮಾಡಿ ದನ್ನು ಸೂಡಿ ಕಟ್ಟಿ ಅವರೊಂದಿಗೆ ಮತ ಯಾಚನೆ ಮಾಡಿದರು.

  ಈ ಕುರಿತು ಟ್ವೀಟ್ ಮಾಡಿರುವ ನಟಿ, ಗೋಧಿ ಹೊಲಗಳಲ್ಲಿ ರೈತ ಮಹಿಳೆಯರನ್ನ ಭೇಟಿ ಮಾಡಿದ್ದು ನನಗೆ ತುಂಬಾ ಸಂತೋಷವಾಗಿದೆ.ರೈತ ಮಹಿಳೆಯೊಂದಿಗೆ ಮಾತನಾಡಲು ಉತ್ತಮ ಅವಕಾಶ ಸಿಕ್ಕಿತು ಎಂದು ಬರೆದುಕೊಂಡಿದ್ದಾರೆ.

  ಹೇಮಾಮಾಲಿನಿ ಅವರು ಮಥುರಾ ಮತ ಕ್ಷೇತ್ರದಿಂದ ಎರಡನೇ ಬಾರಿಗೆ ಸ್ಪರ್ಧೆ ಮಾಡುತ್ತಿದ್ದಾರೆ. 2004ರಲ್ಲಿ ಇದೇ ಮತ ಕ್ಷೇತ್ರದಿಂದ ಮೊದಲ ಬಾರಿ ಸ್ಪರ್ಧೆ ಮಾಡಿ 3 ಲಕ್ಷ 30 ಸಾವಿರ ಮತ ಪಡೆದು ಜಯ ಸಾಧಿಸಿದ್ದರು.