'ಇಂದಿರಾಗಾಂಧಿ ಕಾರ್ಯದರ್ಶಿ ಹುದ್ದೆಯಿಂದ ನನ್ನ ತಂದೆಯನ್ನು ಕಿತ್ತು ಹಾಕಿದ್ದರು'-ಸಚಿವ ಜೈಶಂಕರ್

•   Wed, Feb 22 2023 01:03:47 PM



• ನವದೆಹಲಿ, ಫೆ 22 (DaijiworldNews/DB): ಇಂದಿರಾ ಗಾಂಧಿಯವರು ಅಧಿಕಾರ ಪಡೆದ ಕೂಡಲೇ ನಮ್ಮ ತಂದೆಯನ್ನು ಉನ್ನತ ಸ್ಥಾನದಿಂದ ಕಿತ್ತು ಹಾಕಿದರೆ, ರಾಜೀವ್ ಗಾಂಧಿಯವರು ತಂದೆಗಿಂತಲೂ ಕಿರಿಯರನ್ನು ಸಂಪುಟ ಕಾರ್ಯದರ್ಶಿಯನ್ನಾಗಿ ನೇಮಿಸಿದ್ದರು ಎಂದು ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಆರೋಪಿಸಿದ್ದಾರೆ.

  ಸುದ್ದಿಸಂಸ್ಥೆಯೊಂದಕ್ಕೆ ಸಂದರ್ಶನ ನೀಡಿದ ಅವರು, ನನ್ನ ತಂದೆ ಒಬ್ಬ ಉತ್ತಮ ಅಧಿಕಾರಿಯಾಗಬೇಕೆಂಬ ಕನಸು ಕಂಡಿದ್ದರು. ವಿದೇಶಾಂಗ ಇಲಾಖೆಯ ಕಾರ್ಯದರ್ಶಿಯಾಗುವ ಗುರಿ ಅವರದಾಗಿತ್ತು. ಆದರೆ ಡಿಫೆನ್ಸ್ ಪ್ರೊಡಕ್ಷನ್ ಕಾರ್ಯದರ್ಶಿಯಾಗಿದ್ದ ನನ್ನ ತಂದೆಯನ್ನು 1980ರಲ್ಲಿ ಇಂದಿರಾ ಗಾಂಧಿ ಅಧಿಕಾರಕ್ಕೆ ಮರಳುತ್ತಿದ್ದಂತೆ ಆ ಸ್ಥಾನದಿಂದ ತೆಗೆದು ಹಾಕಿದರು. ಇನ್ನು ಪ್ರಧಾನಿಯಾದಂತೆ ರಾಜೀವ್ ಗಾಂಧಿಯವರು ನನ್ನ ತಂದೆಗಿಂತಲೂ ಕಿರಿಯರನ್ನು ಸಂಪುಟ ಕಾರ್ಯದರ್ಶಿ ಸ್ಥಾನಕ್ಕೆ ನೇಮಿಸಿಕೊಂಡರು ಎಂದು ಆಪಾದಿಸಿದರು.

  ನಮ್ಮ ಮನೆಯಲ್ಲಿ ಅತ್ಯುತ್ತಮ ಅಧಿಕಾರಿಯಾಗುವುದೆಂದರೆ ವಿದೇಶಾಂಗ ಕಾರ್ಯದರ್ಶಿಯಾಗುವುದು. ನಾನೂ ತಂದೆಯಂತೆಯೇ ಅತ್ಯುತ್ತಮ ಅಧಿಕಾರಿಯಾಗುವ ಕನಸು ಕಂಡಿದ್ದೆ. ಸದ್ಯ ಅದೇ ಇಲಾಖೆಯ ಸಚಿವನಾಗಿ ಪ್ರಾಮಾಣಿಕವಾಗಿ ಸೇವೆ ಸಲ್ಲಿಸುತ್ತಿದ್ದೇನೆ. ನನ್ನ ತಂದೆಯವರು ಕಾರ್ಯದರ್ಶಿಯಾಗಿದ್ದಾಗ ಅವರನ್ನು ಆ ಸ್ಥಾನದಿಂದ ತೆಗೆದು ಹಾಕಿದ್ದರು ಎಂದು ಸ್ಮರಿಸಿದರು.