'ಸಾಂಕ್ರಾಮಿಕ ಸನ್ನದ್ದತೆ ನಾವೀನ್ಯತೆ ಕೇಂದ್ರ ಸ್ಥಾಪನೆಗೆ ಚಿಂತನೆ'-ಅಶ್ವಥ್ ನಾರಾಯಣ

•   Thu, Feb 09 2023 02:52:17 PM



• ಬೆಂಗಳೂರು, ಫೆ 09 (DaijiworldNews/DB): ಮನುಷ್ಯರು, ಪರಿಸರ ಮತ್ತು ಪ್ರಾಣಿಗಳಿಗೆ ಅಪಾಯಕಾರಿಯಾಗಿ ಪರಿಣಮಿಸಬಲ್ಲ ಸೋಂಕುಗಳ ವಿರುದ್ದ ಹೋರಾಡಲು ನೆರವಾಗುವ ದೃಷ್ಟಿಯಿಂದ ಭಾರತ್ ಬಯೋಟೆಕ್ ಮತ್ತು ವಿಸ್ಕಾನ್ಸಿಸ್ ವಿಶ್ವವಿದ್ಯಾಲಯಗಳೊಂದಿಗೆ ರಾಜ್ಯ ಸರ್ಕಾರ ಒಪ್ಪಂದ ಮಾಡಿಕೊಳ್ಳಲಿದೆ. ಅಲ್ಲದೆ ಇದಕ್ಕಾಗಿ ಸಾಂಕ್ರಾಮಿಕ ಸನ್ನದ್ದತೆ ನಾವೀನ್ಯತೆ ಕೇಂದ್ರ ಸ್ಥಾಪನೆಗೆ ಚಿಂತನೆ ನಡೆಸಲಾಗಿದೆ ಎಂದು ಐಟಿ ಬಿಟಿ ಖಾತೆ ಸಚಿವ ಡಾ. ಸಿ.ಎನ್. ಅಶ್ವಥ್ ನಾರಾಯಣ ತಿಳಿಸಿದ್ದಾರೆ.

  ಬೆಂಗಳೂರಿನ ವಿಕಾಸಸೌಧದಲ್ಲಿ ಗುರುವಾರ ನಡೆದ ಕರ್ನಾಟಕ ರಾಜ್ಯ ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆ ಸಚಿವರು ಹಾಗೂ ಅಧಿಕಾರಿಗಳು ಮಹತ್ವದ ಸಭೆಯಲ್ಲಿ ಈ ವಿಚಾರ ತಿಳಿಸಿದ ಅವರು, ಈ ಎರಡೂ ಸಂಸ್ಥೆಗಳು ಲಸಿಕೆಗಳ ತಯಾರಿಕೆಯಲ್ಲಿ ಮುಂಚೂಣಿಯಲ್ಲಿವೆ. ಎರಡೂ ಸಂಸ್ಥೆಗಳ ಪ್ರಮುಖರೊಂದಿಗೆ ಚರ್ಚಿಸಿ ನಿರ್ಧಾರ ಕೈಗೊಳ್ಳಲಾಗಿದೆ ಎಂದರು.

  ವಿವಿಧ ತಳಿಗಳ ಸೋಂಕುಗಳಿಂದ ಜೀವರಾಶಿಗಳೂ ಸೇರಿದಂತೆ ಪರಿಸರಕ್ಕೆ ಕೂಡಾ ಅಪಾಯ ಹೆಚ್ಚಾಗುತ್ತಿದೆ. ಇದನ್ನು ಸಮರ್ಥವಾಗಿ ಎದುರಿಸಬೇಕಿದೆ. ಅದಕ್ಕಾಗಿ ಸಾಂಕ್ರಾಮಿಕ ಸನ್ನದ್ದತೆ ನಾವೀನ್ಯತೆ ಕೇಂದ್ರ ಸ್ಥಾಪನೆಗೆ ಸರ್ಕಾರ ಚಿಂತನೆ ನಡೆಸಿದೆ ಎಂದು ತಿಳಿಸಿದರು.

  ಕೋವಿಡ್‌ ನಂತರ ಅನೇಕ ಹೊಸ ಬಗೆಯ ವೈರಾಣು, ಸೋಂಕುಗಳು ಮನುಷ್ಯ ಸಹಿತ ಜೀವರಾಶಿಗಳಿಗೆ ಅಪಾಯ ಒಡ್ಡುತ್ತಲೇ ಇವೆ. ಹೀಗಾಗಿ ಸಾಂಕ್ರಾಮಿಕ ಸನ್ನದ್ದತೆ ನಾವೀನ್ಯತೆ ಕೇಂದ್ರದ ಅಗತ್ಯವಿದೆ. ಜನರ ಆರೋಗ್ಯ ರಕ್ಷಣೆ ಮತ್ತು ಸುಸ್ಥಿರ ಪರಿಸರ ನಿರ್ಮಾಣಕ್ಕೆ ಸರ್ಕಾರದ ಆದ್ಯತೆ ಎಂದವರು ವಿವರಿಸಿದರು.