'ಏರ್ ಇಂಡಿಯಾದಲ್ಲಿ ಕಳಪೆ ಸೇವೆ'-ಬಿಜೆಪಿ ನಾಯಕಿ ಖುಷ್ಬು ಗಂಭೀರ ಆರೋಪ

•   Tue, Jan 31 2023 04:19:25 PM



• ನವದೆಹಲಿ, ಜ 31 (DaijiworldNews/DB): ಏರ್ ಇಂಡಿಯಾ ವಿಮಾನ ಯಾನ ಸಂಸ್ಥೆ ವಿರುದ್ದ ಬಿಜೆಪಿ ನಾಯಕಿ, ನಟಿ ಖುಷ್ಬು ಸುಂದರ್‍ ಕಿಡಿ ಕಾರಿದ್ದಾರೆ. ಏರ್ ಇಂಡಿಯಾದಲ್ಲಿ ಪ್ರಯಾಣಿಕರಿಗೆ ಕಳಪೆ ಮಟ್ಟದ ಸೇವೆ ಸಿಗುತ್ತಿದೆ. ವ್ಹೀಲ್ ಚಯರ್‌ ವ್ಯವಸ್ಥೆ ಕೂಡಾ ಅವರ ಬಳಿ ಇಲ್ಲ ಎಂದು ಹೇಳಿದ್ದಾರೆ.

  ಈ ಸಂಬಂಧ ಟ್ವೀಟ್ ಮಾಡಿರುವ ಅವರು, ಮೊಣಕಾಲಿನ ಗಂಭೀರ ಗಾಯಕ್ಕೊಳಗಾದ ನನಗೆ ನಡೆದಾಡಲು ಸಾಧ್ಯವಿಲ್ಲದ ಕಾರಣ ವ್ಹೀಲ್‌ಚೇರ್ ಕೇಳಿದ್ದಕ್ಕೆ ಏರ್ ಇಂಡಿಯಾದವರು ವ್ಹೀಲ್​ ಚೇರ್​ ಒದಗಿಸಲು ನನ್ನನ್ನು ಸುಮಾರು ಅರ್ಧ ಗಂಟೆ ಕಾಯಿಸಿದರು. ಬಳಿಕ ಇನ್ನೊಂದು ವಿಮಾನಯಾನ ಸಂಸ್ಥೆಯಿಂದ ಎರವಲು ಪಡೆದುಕೊಂಡು ನೀಡಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

  ಪ್ರಯಾಣಿಕರ ಅನುಕೂಲಕ್ಕಾಗಿ ತಮ್ಮಲ್ಲೇ ವ್ಹೀಲ್‌ಚೇರ್ ಸಹಿತ ಅಗತ್ಯ ಅವಶ್ಯಕತೆಗಳನ್ನು ಇಟ್ಟುಕೊಳ್ಳಬೇಕು. ಆದರೆ ಏರ್ ಇಂಡಿಯಾ ಈ ವಿಚಾರದಲ್ಲಿ ಕಳಪೆ ಸೇವೆ ನೀಡುತ್ತಿದೆ ಎಂದಿದ್ದಾರೆ.

  ಇನ್ನು ಖುಷ್ಬು ಟ್ವೀಟ್‌ಗೆ ಪ್ರತಿಕ್ರಿಯಿಸಿರುವ ಏರ್ ಇಂಡಿಯಾ ವಿಮಾನ ಯಾನ ಸಂಸ್ಥೆ, ನಮ್ಮಿಂದ ಪ್ರಮಾದವಾಗಿದೆ. ಈ ಸಂಬಂಧ ಚೆನ್ನೈ ವಿಮಾನ ನಿಲ್ದಾಣ ಸಿಬಂದಿಯಲ್ಲಿ ನಾವು ವಿಚಾರಿಸುತ್ತೇವೆ. ನಿಮಗಾದ ಅನಾನುಕೂಲತೆಗಾಗಿ ಕ್ಷಮೆ ಇರಲಿ ಎಂದಿದೆ.

  ಲೋಪಗಳಿಂದಾಗಿ ಆಗಾಗ ಏರ್ ಇಂಡಿಯಾ ವಿಮಾನ ಯಾನ ಸಂಸ್ಥೆ ಸುದ್ದಿಯಾಗುತ್ತಲೇ ಇದೆ. ಕಳೆದ ನವೆಂಬರ್ 26ರಂದು ಯುಎಸ್​ನಿಂದ ದೆಹಲಿಗೆ ಬರುತ್ತಿದ್ದ ಏರ್​ ಇಂಡಿಯಾ ವಿಮಾನದಲ್ಲಿ ಪ್ರಯಾಣಿಕನೊಬ್ಬ ಮದ್ಯಪಾನ ಮಾಡಿ ಸಹ ಪ್ರಯಾಣಿಕಳ ಮೇಲೆ ಮೂತ್ರ ವಿಸರ್ಜನೆ ಮಾಡಿದ್ದಕ್ಕಾಗಿ ಸಂಸ್ಥೆಗೆ 30 ಲಕ್ಷ ರೂಪಾಯಿ ದಂಡ ವಿಧಿಸಲಾಗಿತ್ತು. ಈ ವೇಳೆ ಸಿಬಂದಿಯ ನಿರ್ಲಕ್ಷ್ಯದ ಬಗ್ಗೆಯೂ ಸಹ ಪ್ರಯಾಣಿಕೆ ಕಿಡಿ ಕಾರಿದ್ದರು. ಪ್ಯಾರಿಸ್​ನಿಂದ ದೆಹಲಿಗೆ ಪ್ರಯಾಣಿಸುತ್ತಿದ್ದ ವಿಮಾನದಲ್ಲಿಯೂ ಪ್ರಯಾಣಿಕನೊಬ್ಬ ಮೂತ್ರ ವಿಸರ್ಜಿಸಿದ್ದಲ್ಲದೆ, ಶೌಚಾಲಯದಲ್ಲಿ ಸಿಗರೇಟ್ ಸೇದಿದ್ದ. ಘಟನೆಯನ್ನು ಇಂಡಿಯಾ ಮುಚ್ಚಿಟ್ಟಿತ್ತು. ಬಳಿಕ ವಿಚಾರ ಬೆಳಕಿಗೆ ಬಂದು ಡಿಜಿಸಿಎಯು ಸಂಸ್ಥೆಗೆ 10 ಲಕ್ಷ ರೂಪಾಯಿ ದಂಡ ವಿಧಿಸಿತ್ತು.

  Dear @airindiain you do not have basic wheelchair to take a passenger with a knee injury. I had to wait for 30mnts at chennai airport with braces for my ligament tear before they could get a wheelchair borrowed from another airline to take me in. I am sure you can do better.

  — KhushbuSundar (@khushsundar) January 31, 2023