ಎರಡನೇ ವಿವಾಹವಾದ ದಾವೂದ್ ಇಬ್ರಾಹಿಂ-ಖಚಿತಪಡಿಸಿದ ಸೋದರಳಿಯ

•   Tue, Jan 17 2023 02:00:11 PM



• ಕರಾಚಿ, ಜ 17 (DaijiworldNews/DB): ಭೂಗತ ಪಾತಕಿ ದಾವೂದ್ ಇಬ್ರಾಹಿಂ ಎರಡನೇ ವಿವಾಹವಾಗಿದ್ದಾನೆಂಬ ವಿಷಯವನ್ನು ರಾಷ್ಟ್ರೀಯ ತನಿಖಾ ದಳ ಬಹಿರಂಗಪಡಿಸಿದೆ. ಇನ್ನು ಈ ಮಾಹಿತಿಯನ್ನು ಆತನ ಸೋದರಳಿಯ ಖಚಿತಪಡಿಸಿದ್ದಾನೆ ಎಂದು ತಿಳಿದು ಬಂದಿದೆ.

  ದಾವೂದ್ ಇಬ್ರಾಹಿಂ ಕರಾಚಿಯಲ್ಲಿ ನೆಲೆಸಿದ್ದಾನೆ. ಆತ ಎರಡನೇ ಮದುವೆಯಾಗಿದ್ದಾನೆ. ಆದರೆ ಮೊದಲ ಪತ್ನಿ ಮೆಹಜಬೀನ್ ಶೇಖ್‌ಗೆ ವಿಚ್ಚೇದನ ನೀಡಿಲ್ಲ ಎಂದು ಎನ್‌ಐಎ ಬಹಿರಂಗಪಡಿಸಿದ ಮಾಹಿತಿಯಲ್ಲಿದೆ ಎಂದು ವರದಿಯಾಗಿದೆ.

  ದಾವೂದ್‌ ಮೊದಲ ಪತ್ನಿಯನ್ನು ತಾನು ಕಳೆದ ಜುಲೈನಲ್ಲಿ ಭೇಟಿಯಾಗಿದ್ದೆ. ಈ ವೇಳೆ ಆತ ಎರಡನೇ ವಿವಾಹವಾಗಿರುವ ವಿಷಯವನ್ನು ಸ್ವತಃ ಆತನ ಮೊದಲ ಪತ್ನಿ ಮೆಹಜಬೀನ್ ಶೇಖ್ ಹೇಳಿಕೊಂಡಿದ್ದಾಳೆ ಎಂದು ದಾವೋದ್ ಸೋದರಳಿಯ ಅಲಿ ಶಾ ಹೇಳಿಕೊಂಡಿದ್ದಾನೆ ಎನ್ನಲಾಗಿದೆ.

  ಇನ್ನು ದಾವೂದ್‌ನ ಸಂಬಂಧಿಕರು ಭಾರತದಲ್ಲಿದ್ದು, ಅವರೊಂದಿಗೆ ಆತನ ಮೊದಲ ಪತ್ನಿ ಸಂಪರ್ಕದಲ್ಲಿದ್ದಾಳೆ. ವಾಟ್ಸಾಪ್ ಕರೆಗಳನ್ನು ಮಾಡುತ್ತಾಳೆ ಎಂದು ಆತ ತಿಳಿಸಿದ್ದಾನೆ. ಆದರೆ ಆತನ ಎರಡನೇ ಪತ್ನಿ ಯಾರು ಮತ್ತು ವಾಸವಾಗಿರುವ ಸ್ಥಳ ಯಾವುದು ಎಂಬ ಬಗ್ಗೆ ಆತ ಮಾಹಿತಿ ನೀಡಿಲ್ಲ. ಮದುವೆ ಯಾವಾಗ ಆಯಿತು ಎಂಬ ಬಗ್ಗೆಯೂ ಮಾಹಿತಿ ಅಲಭ್ಯವಾಗಿದೆ ಎಂದು ತಿಳಿದು ಬಂದಿದೆ.

  ಮುಂಬೈ ಸೇರಿದಂತೆ ವಿವಿಧೆಡೆ ಇತ್ತೀಚೆಗೆ ಎನ್‌ಐಎ ದಾಳಿ ನಡೆಸಿ ದಾವೂದ್ ಇಬ್ರಾಹಿಂನ ಭಯೋತ್ಪಾದನಾ ಚಟುವಟಿಕೆ ಮತ್ತು ಅದರ ಜಾಲವನ್ನು ಬಹಿರಂಗಗೊಳಿಸಿತ್ತಲ್ಲದೆ, ದೋಷಾರೋಪಣ ಪಟ್ಟಿಯನ್ನೂ ನ್ಯಾಯಾಲಯಕ್ಕೆ ಸಲ್ಲಿಸಿತ್ತು.