ಬಿಹಾರ, ಜ 16 (DaijiworldNews/DB): ಜೈಲಿನೊಳಗಿರುವ ಯುವಕನೊಬ್ಬನ ಸುಮಧುರ ಧ್ವನಿಯಿಂದಾಗಿ ಅವನ ಅದೃಷ್ಟ ಖುಲಾಯಿಸಿದೆ. ಯುವಕನ ಧ್ವನಿಗೆ ಮನಸೋತ ಗಾಯಕ ಅಂಕಿತ್ ತಿವಾರಿ ಅವರು ತಮ್ಮ ಸಂಗೀತ ಕಂಪೆನಿಗೆ ಹಾಡಲು ಆತನನ್ನು ಆಹ್ವಾನಿಸಿದ್ದಾರೆ!
ಮದ್ಯದ ಅಮಲಿನಲ್ಲಿ ಉತ್ತರ ಪ್ರದೇಶದಿಂದ ಗಡಿ ಜಿಲ್ಲೆಗೆ ಪ್ರವೇಶಿಸಿದ ಆರೋಪದ ಮೇಲೆ ಅಮನ್ನ ಕನ್ಹಯ್ಯಾಕುಮಾರ್ (24) ಎಂಬಾತನನ್ನು ಬಿಹಾರ ಪೊಲೀಸರು ಬಂಧಿಸಿದ್ದರು. ಆದರೆ ಜೈಲಿನಲ್ಲಿದ್ದುಕೊಂಡೇ ಯುವಕ "ದರೋಗಾ ಜಿ ಹೋ" ಭೋಜ್ಪುರಿ ಹಾಡನ್ನು ಸುಮಧುರವಾಗಿ ಹಾಡಿದ್ದಾನೆ. ಇತ್ತ ಆತನ ಹಾಡು ಕೇಳಿಸಿಕೊಂಡ ಪೊಲೀಸರು ಅದನ್ನು ವೀಡಿಯೋ ಮಾಡಿದ್ದಲ್ಲದೆ, ಆತನ ಪ್ರತಿಭೆಗೆ ಭೇಷ್ ಎಂದಿದ್ದಾರೆ.
ಇನ್ನು ಈತ ಬಿಹಾರದ ಜೈಲಿನಲ್ಲಿದ್ದುಕೊಂಡೇ ಹಾಡಿದ ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಇದನ್ನು ನೋಡಿದ ಗಲ್ಲಿಯನ್ ಗಾಯಕ ಅಂಕಿತ್ ತಿವಾರಿ ಅವರು ತಮ್ಮ ಮಿಸ್ಟ್ ಮ್ಯೂಸಿಕ್ ಪ್ರೈವೆಟ್ ಲಿಮಿಟೆಡ್ ಸಂಗೀತ ಕಂಪೆನಿಗೆ ಹಾಡಲು ಆತನನ್ನು ಆಹ್ವಾನಿಸಿದ್ದಾರೆ. ಅಲ್ಲದೆ ವ್ಯಸನವೊಂದು ಸಾಮಾಜಿಕ ಅನಿಷ್ಠ. ಕಲೆಗೆ ಈ ದುಷ್ಟ ವ್ಯಸನವನ್ನು ಸೋಲಿಸುವ ಶಕ್ತಿ ಇದೆ ಎಂದೂ ತಮ್ಮ ಟ್ವಿಟರ್ ಖಾತೆಯಲ್ಲಿ ಅಂಕಿತ್ ಬರೆದುಕೊಂಡಿದ್ದಾರೆ. ಆತನಿಗೆ ಹಾಡಲು ನಮ್ಮ ಸಂಗೀತ ಕಂಪೆನಿಯಲ್ಲಿ ಅವಕಾಶ ನೀಡುವುದಾಗಿಯೂ ಅವರು ಬರೆದುಕೊಂಡಿದ್ದಾರೆ.