ಬ್ರಿಟಿಷ್ ಕೌನ್ಸಿಲ್ ಉದ್ಯೋಗ ಬಿಟ್ಟು ಟೀ ಸ್ಟಾಲ್ ತೆರೆದ ಇಂಗ್ಲಿಷ್ ಸ್ನಾತಕೋತ್ತರ ಪದವೀಧರೆ!

•   Mon, Jan 16 2023 04:20:25 PM



• ನವದೆಹಲಿ, ಜ 16 (DaijiworldNews/DB): ಬ್ರಿಟಿಷ್ ಕೌನ್ಸಿಲ್‌ನಲ್ಲಿ ಕೈತುಂಬ ಸಂಬಳದ ಉದ್ಯೋಗದಲ್ಲಿದ್ದ ಇಂಗ್ಲಿಷ್ ಸಾಹಿತ್ಯ ಸ್ನಾತಕೋತ್ತರ ಪದವೀಧರೆಯೊಬ್ಬಳು ಇದೀಗ ಉದ್ಯೋಗ ತೊರೆದು ಟೀ ಅಂಗಡಿ ತೆರೆದಿದ್ದಾರೆ. ಆ ಮೂಲಕ ಯಶಸ್ವಿ ಉದ್ಯಮಿಯಾಗಲು ಹೊರಟಿದ್ದಾರೆ.

  ಶಮಿಷ್ಠಾ ಎಂಬ ಯುವತಿಯೇ ಟೀ ಸ್ಟಾಲ್ ತೆರೆದವರು. ದೆಹಲಿಯ ಕಂಟೋನ್ಮೆಂಟ್ ಪ್ರದೇಶದ ಗೋಪಿನಾಥ್ ಬಜಾರ್‌ನಲ್ಲಿ ಇವರ ಟೀ ಅಂಗಡಿ ಇದ್ದು, ತಮ್ಮ ಕನಸಿನ ವ್ಯಾಪಾರ ಕ್ಷೇತ್ರಕ್ಕೆ ಧುಮುಕಿದ್ದಾರೆ. ಇನ್ನು ಶಮಿಷ್ಠಾ ಬಗ್ಗೆ ನಿವೃತ್ತ ಬ್ರಿಗೇಡಿಯರ್ ಸಂಜಯ್ ಖನ್ನಾ ಅವರು ಲಿಂಕ್ಡ್‌ಇನ್‌ನಲ್ಲಿ ಶೇರ್ ಮಾಡಿದ್ದಾರೆ.

  ಶರ್ಮಿಷ್ಠಾ ಬ್ರಿಟಿಷ್ ಕೌನ್ಸಿಲ್‌ನಲ್ಲಿ ಉತ್ತಮ ಸಂಬಳ ಬರುವ ಉದ್ಯೋಗದಲ್ಲಿದ್ದರು. ಇಂಗ್ಲಿಷ್ ಸಾಹಿತ್ಯದಲ್ಲಿ ಎಂಎ ಓದಿಕೊಂಡಿರುವ ಅವರು ಪ್ರತಿಭಾನ್ವಿತೆಯಾಗಿದ್ದರು. ಆದರೆ ಇದೀಗ ತಮ್ಮ ಉದ್ಯೋಗಕ್ಕೆ ಗುಡ್‌ಬೈ ಹೇಳಿ ಟೀ ಸ್ಟಾಲ್ ತೆರೆಯುವ ಮೂಲಕ ಸ್ವಂತ ಉದ್ಯಮಕ್ಕೆ ಇಳಿದಿದ್ದಾರೆ. ಟೀ ಸ್ಟಾಲ್‌ನ್ನು ಮುಂದೆ ವಿಸ್ತರಿಸುವ ಗುರಿಯನ್ನು ಅವರು ಹೊಂದಿದ್ದು, ಚಾಯೋಸ್ ರೀತಿಯಲ್ಲಿ ದೊಡ್ಡ ಪ್ರಮಾಣದಲ್ಲಿ ಉದ್ಯಮ ಬೆಳೆಸುವ ಗುರಿ ಹೊಂದಿದ್ದಾರೆ ಎಂದು ಖನ್ನಾ ಬರೆದುಕೊಂಡಿದ್ದಾರೆ.

  ಲುಫ್ತಾನ್ಸ್‌ನಲ್ಲಿ ಕೆಲಸ ಮಾಡುವ ಭಾವನಾ ರಾವ್ ಅವರು ಶಮಿಷ್ಠಾ ಜೊತೆ ಟೀ ಸ್ಟಾಲ್ ಪಾರ್ಟ್ನರ್ ಆಗಿದ್ದಾರೆ. ಇನ್ನು ತಮ್ಮ ಮನೆ ಕೆಲಸದಾಕೆಯನ್ನೇ ಟೀ ಅಂಗಡಿಯಲ್ಲಿಯೂ ಹೆಚ್ಚುವರಿ ಕೂಲಿ ನೀಡಿ ಶರ್ಮಿಷ್ಠಾ ಕೆಲಸಕ್ಕೆ ಬಳಸಿಕೊಂಡಿದ್ದಾರೆ.

  ಸದ್ಯ ಆರಂಭಿಕ ದಿನವಾಗಿರುವುದರಿಂದ ಸಂಜೆ ಬಂದು ಟೀ ಸ್ಟಾಲ್ ತೆರೆದು ಗ್ರಾಹಕರಿಗೆ ಸೇವೆ ನೀಡುತ್ತಾರೆ. ರಾತ್ರಿ ಹೊತ್ತು ವ್ಯಾಪಾರ ಮುಗಿಸಿಕೊಂಡು ಹೋಗುತ್ತಾರೆ. ಉದ್ಯಮದತ್ತ ಮನಸ್ಸು ಮಾಡಿರುವ ಈ ಯುವತಿಯ ಜಾಣ್ಮೆಗೆ ಸಾಕಷ್ಟು ಪ್ರಶಂಸೆ ವ್ಯಕ್ತವಾಗಿದೆ.