ನವದೆಹಲಿ, ಜ 16 (DaijiworldNews/DB): ಚುನಾವಣಾ ಆಯೋಗ ಪ್ರಸ್ತಾಪಿಸಿದ ರಿಮೋಟ್ ವೋಟಿಂಗ್ ಮೆಷಿನ್ಗೆ ವಿರೋಧ ಪಕ್ಷಗಳ ವಿರೋಧವಿದೆ ಎಂದು ಕಾಂಗ್ರೆಸ್ ನಾಯಕ ದಿಗ್ವಿಜಯ್ ಸಿಂಗ್ ಹೇಳಿದ್ದಾರೆ.
ವಲಸೆ ಮತದಾರರಿಗೆ ತಾವಿರುವ ಸ್ಥಳದಿಂದಲೇ ಮತದಾನ ಮಾಡಲು ಅವಕಾಶ ಕಲ್ಪಿಸುವ ರಿಮೋಟ್ ವೋಟಿಂಗ್ ಮೆಷಿನ್ನ ಮೂಲ ಮಾದರಿಯನ್ನು ರಾಜಕೀಯ ಪಕ್ಷಗಳ ಪ್ರತಿನಿಧಿಗಳಿಗೆ ಇಂದು ಚುನಾವಣಾ ಆಯೋಗ ಪ್ರದರ್ಶಿಸಲಿದ್ದು, ಇದಕ್ಕೂ ಮೊದಲೇ ರಿಮೋಟ್ ಎಲೆಕ್ಟ್ರಾನಿಕ್ ಮತಯಂತ್ರಕ್ಕೆ ವಿರೋಧ ವ್ಯಕ್ತಪಡಿಸಲು ಹೆಚ್ಚಿನ ವಿಪಕ್ಷಗಳು ಸಜ್ಜಾಗಿವೆ ಎಂದು ಅವರು ತಿಳಿಸಿದ್ದಾರೆ.
ಕಾಂಗ್ರೆಸ್, ಜೆಡಿಯು, ಸಿಪಿಐ, ಸಿಪಿಐ(ಎಂ), ನ್ಯಾಶನಲ್ ಕಾನ್ಫರೆನ್ಸ್, ಜೆಎಂಎಂ ಸೇರಿದಂತೆ ವಿವಿಧ ವಿಪಕ್ಷಗಳು ಸಭೆ ನಡೆಸಿದ ನಂತರ ಸಿಂಗ್ ಅವರು ಈ ಹೇಳಿಕೆ ನೀಡಿದ್ದಾರೆ.
ಆರ್ವಿಎಂ ಪ್ರದರ್ಶನದ ಭಾಗವಾಗಿ ಮಾನ್ಯತೆ ಪಡೆದ 8 ರಾಷ್ಟ್ರೀಯ ಪಕ್ಷಗಳು ಮತ್ತು 57 ರಾಜ್ಯ ಪಕ್ಷಗಳ ಪ್ರತಿನಿಧಿಗಳನ್ನು ಚುನಾವಣಾ ಸಮಿತಿಯು ಸೋಮವಾರ ಆಹ್ವಾನಿಸಿದೆ.