'ಗಂಗಾ ವಿಲಾಸ್ ಕುರಿತು ಬಿಜೆಪಿ ಸುಳ್ಳು ಮಾಹಿತಿ ಹರಡುತ್ತಿದೆ'-ಅಖಿಲೇಶ್ ಯಾದವ್

•   Sun, Jan 15 2023 06:04:38 PM



• ರಾಯ್‌ಬರೇಲಿ, ಜ 15 (DaijiworldNews/DB): ಗಂಗಾ ವಿಲಾಸ್ ಐಷಾರಾಮಿ ವಿಹಾರ ನೌಕೆಯ ಕುರಿತು ಬಿಜೆಪಿ ಸುಳ್ಳು ಮಾಹಿತಿಗಳನ್ನು ಹರಡುತ್ತಿದೆ ಎಂದು ಸಮಾಜವಾದಿ ಪಕ್ಷದ ಅಧ್ಯಕ್ಷ ಅಖಿಲೇಶ್ ಯಾದವ್ ಆರೋಪಿಸಿದ್ದಾರೆ.

  ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ನನಗೆ ಸಿಕ್ಕಿರುವ ಮಾಹಿತಿ ಪ್ರಕಾರ ಕಳೆದ 17 ವರ್ಷಗಳಿಂದ ಈ ವಿಹಾರ ನೌಕಾಸೇವೆ ಲಭ್ಯವಿದೆ. ಕೆಲವು ಭಾಗಗಳನ್ನಷ್ಟೇ ಹೊಸದಾಗಿ ಸೇರ್ಪಡೆ ಮಾಡಲಾಗಿದೆ. ಆದರೆ ಇಡೀ ನೌಕೆಯೇ ಹೊಸತೆಂಬಂತೆ ಬಿಜೆಪಿಯವರು ಬಿಂಬಿಸುತ್ತಿದ್ದಾರೆ. ಆ ಮೂಲಕ ಅವರೇ ಆರಂಭಿಸಿರುವುದೆಂಬಂತೆ ಕ್ರೆಡಿಟ್ ತೆಗೆದುಕೊಳ್ಳುತ್ತಿದ್ದಾರೆ ಎಂದರು.

  ಸುಳ್ಳು ಹೇಳುವುದು ಮತ್ತು ಪ್ರಚಾರ ಗಿಟ್ಟಿಸಿಕೊಳ್ಳುವುದರಲ್ಲಿ ಬಿಜೆಪಿಗರು ಸದಾ ಮುಂದಿದ್ದಾರೆ. ಆ ನೌಕೆಯಲ್ಲಿ ಬಾರ್ ಇದೆ ಎಂಬುದಾಗಿ ಪ್ರಧಾನಿ ಹೇಳಿರುವುದನ್ನು ಕೇಳಿದ್ದೇನೆ. ಬಾರ್ ಇದೆಯೇ ಇಲ್ಲವೇ ಎಂಬುದನ್ನು ಬಿಜೆಪಿಯವರೇ ಹೇಳಬೇಕು ಎಂದು ಇದೇ ವೇಳೆ ಹೇಳಿದರು.

  ವಿಶ್ವದ ಅತ್ಯಂತ ಉದ್ದದ ವಿಹಾರ ನೌಕೆ ಎಂವಿ ಗಂಗಾ ವಿಲಾಸ್‌ನ್ನು ಜನವರಿ 13ರಂದು ಪ್ರಧಾನಿ ನರೇಂದ್ರ ಮೋದಿಯವರು ಲೋಕಾರ್ಪಣೆ ಮಾಡಿದ್ದರು. ಉತ್ತರ ಪ್ರದೇಶದ ವಾರಾಣಸಿಯಿಂದ ಆರಂಭಗೊಳ್ಳುವ 51 ದಿನಗಳ ಯಾತ್ರೆಯು ಪೂರ್ವ ಅಸ್ಸಾಂನ ದಿಬ್ರೂಗಢ ತನಕ ಸಾಗಲಿದೆ.