ಬೆಂಗಳೂರು, ಜ 15 ( DaijiworldNews/MS): ದೆಹಲಿಯಲ್ಲಿ ನಡೆಯುತ್ತಿದ್ದ ಸೇನಾ ಪರೇಡ್ ದಿನಾಚರಣೆಯು 1949ರ ನಂತರ ಇದೇ ಮೊದಲ ಬಾರಿಗೆ ರಾಷ್ಟ್ರ ರಾಜಧಾನಿಯಿಂದ ಬೇರೆಡೆಗೆ ಶಿಫ್ಟ್ ಆಗಿದ್ದು ಈ ಬಾರಿ ಕರ್ನಾಟಕದ ಬೆಂಗಳೂರಿನಲ್ಲಿ ಈ ವಿಶೇಷ ಪರೇಡ್ ನಡೆಯಲಿದೆ.
ಈ ಸಲದ 75ನೇ ಸೇನಾ ದಿನದ ಪರೇಡ್ ಬೆಂಗಳೂರಿನ ಎಂಇಜಿ ಮತ್ತು ಸೆಂಟರ್ ಪರೇಡ್ ಮೈದಾನದಲ್ಲಿ ಇಂದು ನಡೆಯಲಿದೆ. ೮ ರೆಜಿಮೆಂಟ್ಗಳ ಆಕರ್ಷಕ ಪಥ ಸಂಚಲನ, ದೇಶೀಯ ನಿರ್ಮಿತ ರಕ್ಷಣಾ ಉಪಕರಣ ಹಾಗೂ ಸೇನಾ ಸಾಮರ್ಥ್ಯ ಪ್ರದರ್ಶನವಿರುತ್ತದೆ. ಸೇನಾ ಮುಖ್ಯಸ್ಥ ಜನರಲ್ ಮನೋಜ್ ಪಾಂಡೆ ಪರೇಡ್ನಲ್ಲಿ ಪಾಲ್ಗೊಂಡು ಶೌರ್ಯ ಪ್ರಶಸ್ತಿ ಪ್ರದಾನ ಮಾಡಲಿದ್ದಾರೆ. ಇದರ ನಂತರ ಆರ್ಮಿ ಸರ್ವಿಸ್ ಕಾರ್ಪ್ಸ್ನಿಂದ ಮೋಟಾರ್ಸೈಕಲ್ ಪ್ರದರ್ಶನ, ಸ್ಕೈಡೈವಿಂಗ್ ಡಿಸ್ಪ್ಲೇ, ಆರ್ಮಿ ಕಾರ್ಪ್ಸ್ ಹೆಲಿಕಾಪ್ಟರ್ಗಳ ಮೂಲಕ ಫ್ಲೈ ಪಾಸ್ಟ್ ನಡೆಯಲಿದೆ.
ಪ್ರತಿ ವರ್ಷ ಜನವರಿ 15 ರಂದು ಭಾರತದಲ್ಲಿ ಭಾರತೀಯ ಸೇನಾ ದಿನ ವನ್ನು ಆಚರಣೆ ಮಾಡಲಾಗುತ್ತದೆ. ಬೆಂಗಳೂರು ಎಎಸ್ಸಿ ಸೆಂಟರ್ ಅಂಡ್ ಕಾಲೇಜ್ನಲ್ಲಿ ಜ 15ರ ಸಂಜೆ ನಡೆಯಲಿರುವ ಕಾರ್ಯಕ್ರಮದಲ್ಲಿ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಮುಖ್ಯ ಅತಿಥಿಯಾಗಿ ಪಾಲ್ಗೊಳ್ಳಲಿದ್ದಾರೆ.