ನವದೆಹಲಿ, ಜ 13 (DaijiworldNews/DB): ಮನೆಯ ಸದಸ್ಯರಿಗೇ ಉಳಿದುಕೊಳ್ಳಲಾಗದ ಸಂಪೂರ್ಣ ಶಿಥಿಲಾವಸ್ಥೆಯಲ್ಲಿರುವ ಕಚ್ಚಾ ಮನೆಯಲ್ಲಿ ವಾಸ.. ಗ್ಯಾಸ್, ನೀರಿನ ಸಂಪರ್ಕ ಬಹುದೂರ..ಭರವಸೆಯಾಗಿಯೇ ಉಳಿದ ಅಧಿಕಾರಿಗಳ ಮಾತು..ಇದು ರಾಷ್ಟ್ರೀಯ ಹಾಕಿ ಆಟಗಾರರೊಬ್ಬರ ಮನೆಯ ದುಸ್ಥಿತಿ.
ಹೌದು. ಡಯಾನ್ ಪುರುಷರ ಹಾಕಿ ತಾರೆ ನೀಲಮ್ ಸಂಜೀಪ್ ಅವರು ತೀವ್ರ ಬಡತನದಲ್ಲಿ ದಿನಗಳೆಯುತ್ತಿದ್ದಾರೆ. ಒಡಿಶಾದಲ್ಲಿ ಕಚ್ಚಾ ಮನೆಯೊಂದರಲ್ಲಿ ವಾಸಿಸುತ್ತಿರುವ ಅವರು ತಮ್ಮ ಹಾಕಿ ಅಭ್ಯಾಸ ಬದಿಗೊತ್ತಿ ಮನೆ ನಿರ್ವಹಣೆಗೆ ಪರದಾಟ ನಡೆಸುವ ಸ್ಥಿತಿಯಲ್ಲಿದ್ದಾರೆ.
ಮನೆಗೆ ನೀರು, ಗ್ಯಾಸ್ ಸಂಪರ್ಕವೇ ಇಲ್ಲ. ಅಲ್ಲದೆ ದಿನನಿತ್ಯದ ಊಟಕ್ಕೂ ಮನೆಯಲ್ಲಿ ಪರದಾಡುವ ಸ್ಥಿತಿ ಇದೆ. ಮುಂದಿನ ಕೆಲವೇ ದಿನಗಳಲ್ಲಿ ಭಾರತೀಯ ಪುರುಷರ ಹಾಕಿ ತಂಡವು ಎಫ್ಐಎಚ್ ವಿಶ್ವಕಪ್ 2023 ಅಭಿಯಾನ ಆರಂಭಿಸಲಿದೆ. ಆದರೆ ಆಟಗಾರರಲ್ಲೊಬ್ಬರಾದ ನೀಲಮ್ ಅಭ್ಯಾಸ ಬಿಟ್ಟು ತಮ್ಮ ಮನೆಯ ಪರಿಸ್ಥಿತಿ ಸುಧಾರಿಸಲು ತೀವ್ರ ಪರದಾಟ ಎದುರಿಸುತ್ತಿದ್ದಾರೆ.
ಸುಂದರ್ಗಢ್ ಜಿಲ್ಲೆಯ ಕುರ್ಮುಂಡಾ ಬ್ಲಾಕ್ನ ಕಡೋಬಹಾಲ್ ಗ್ರಾಮದಲ್ಲಿ ನೀಲಮ್ ಅವರ ಮನೆ ಇದೆ. ಎರಡು ಕೋಣೆಗಳಿರುವ ಮನೆಯಲ್ಲಿ ಕುಟುಂಬದಲ್ಲಿರುವವರಿಗೆ ಬೇಕಾದಷ್ಟು ಜಾಗವೇ ಇಲ್ಲ. ಇನ್ನು ನೀಲಮ್ ಅವರಿಗೆ ಸಿಕ್ಕಿದ ಪದಕ, ಟ್ರೋಫಿ, ಪ್ರಮಾಣಪತ್ರಗಳನ್ನು ಇರಿಸಲು ಸ್ಥಳವಿಲ್ಲ. ನೀಲಮ್ ಮನೆಯ ಪರಿಸ್ಥಿತಿ ಅರಿತ ಕುರ್ಮುಂಡ ಬಿಡಿಒ ತೃಪ್ತಿ ಬರೇ, ಅಧಿಕಾರಿಗಳನ್ನು ಕಳುಹಿಸಿ ಸಹಾಯ ಮಾಡುವುದಾಗಿ ಹೇಳಿದ್ದರಾದರೂ, ಈ ಭರವಸೆ ಇನ್ನೂ ಈಡೇರಿಲ್ಲ.
ತಮ್ಮ ಮನೆಯ ಪರಿಸ್ಥಿತಿ ಬಗ್ಗೆ ಮಾತನಾಡಿದ ನೀಲಮ್ ತಂದೆ ಬಿಪಿನ್ ಕ್ಸೆಸ್, ಸರ್ಕಾರದಿಂದ ನಮಗೆ ಯಾವುದೇ ನೆರವು ಸಿಕ್ಕಿಲ್ಲ. ತುಂಬಾ ಕೆಟ್ಟ ಸ್ಥಿತಿಯಲ್ಲಿ ಮನೆ ಇದೆ. ಇದರಲ್ಲಿ ವಾಸಿಸಲೇಬೇಕಾದ ಅನಿವಾರ್ಯ ನಮ್ಮ ಮುಂದಿದೆ ಎಂದು ಅಳಲು ತೋಡಿಕೊಂಡಿದ್ದಾರೆ. ವಿರಾಮದ ದಿನಗಳಲ್ಲಿ ಮಗ ಮನೆಗೆ ಬಂದಾಗ ಇದೇ ಮನೆಯಲ್ಲಿ ವಾಸಿಸುತ್ತಾರೆ. ನಮಗೆ ಸರ್ಕಾರ ಪಕ್ಕಾ ಮನೆ ನೀಡಿದರೆ ನಾವು ಕೃತಜ್ಞರಾಗಿರುತ್ತೇವೆ ಎಂದು ತಾಯಿ ಜೀರಾ ಕ್ಸೆಸ್ ಹೇಳುತ್ತಾರೆ.
ಜನವರಿ 13ರಿಂದ ಭುವನೇಶ್ವರ-ರೂರ್ಕೆಲಾದಲ್ಲಿ ನಡೆಯಲಿರುವ ಮುಂಬರುವ ವಿಶ್ವಕಪ್ನಲ್ಲಿ ಚಿನ್ನದ ಪದಕ ಗೆದ್ದರೆ ಪ್ರತಿ ಆಟಗಾರನಿಗೆ 25 ಲಕ್ಷ ರೂ. ನಗದು ಬಹುಮಾನ ನೀಡುವುದಾಗಿ ಹಾಕಿ ಇಂಡಿಯಾ ಭರವಸೆ ನೀಡಿದೆ. ಸಹಾಯಕ ಸಿಬ್ಬಂದಿಗೆ ತಲಾ 5 ಲಕ್ಷ ರೂ. ನೀಡಲಾಗುವುದು ಎಂದಿದೆ. 1975ರಲ್ಲಿ ಮಲೇಷ್ಯಾದ ಕೌಲಾಲಂಪುರ್ನಲ್ಲಿ ನಡೆದ ಫೈನಲ್ನಲ್ಲಿ ಪಾಕಿಸ್ತಾನವನ್ನು ಸೋಲಿಸಿದ ಭಾರತವು ಕೊನೆಯ ಬಾರಿಗೆ ವಿಶ್ವಕಪ್ ವೇದಿಕೆಯ ಮೇಲೆ ನಿಂತಿತ್ತು.