ಸರ್ಕಾರದ ಹಣದಲ್ಲಿ ಪಕ್ಷದ ಜಾಹೀರಾತು ಪ್ರಕಟ-ಎಎಪಿಗೆ 163.62 ಕೋಟಿ ವಸೂಲಿ ನೋಟಿಸ್ ಜಾರಿ

•   Thu, Jan 12 2023 12:26:15 PM



• ನವದೆಹಲಿ, ಜ 12 (DaijiworldNews/DB): ಸರ್ಕಾರಿ ಹಣದಲ್ಲಿ ಪಕ್ಷದ ಜಾಹೀರಾತು ಪ್ರಕಟಿಸಿದ ಹಿನ್ನೆಲೆಯಲ್ಲಿ ದೆಹಲಿ ಮಾಹಿತಿ ಹಾಗೂ ಪ್ರಚಾರ ನಿರ್ದೇಶನಾಲಯವು ಆಮ್ ಆದ್ಮಿ ಪಕ್ಷಕ್ಕೆ 163.62 ಕೋಟಿ ರೂ.ಗಳ ವಸೂಲಿ ನೋಟಿಸ್ ಜಾರಿಗೊಳಿಸಿದ್ದು, ಮುಂದಿನ ಹತ್ತು ದಿನಗಳೊಳಗಾಗಿ ಈ ಹಣವನ್ನು ಪಾವತಿಸಬೇಕು ಎಂದು ನೋಟಿಸ್ ನಲ್ಲಿ ನಿರ್ದೇಶನ ನೀಡಲಾಗಿದೆ.

  99,31,10,053 ರೂ.ಗಳನ್ನು ಶೀಘ್ರ ಸರ್ಕಾರದ ಬೊಕ್ಕಸಕ್ಕೆ ಪಾವತಿಸಬೇಕು. ಉಳಿದ ಬಾಕಿ ಪಾವತಿಯ 7.11 ಕೋಟಿ ರೂ. ಮೊತ್ತವನ್ನು ಜಾಹೀರಾತು ಏಜೆನ್ಸಿ ಗಳಿಗೆ 10 ದಿನದೊಳಗೆ ಪಾವತಿಸಬೇಕು ಎಂದು ಸೂಚಿಸಲಾಗಿದೆ. ಪಾವತಿಗೆ ವಿಫಲವಾದಲ್ಲಿ ಲೆಫ್ಟಿನೆಂಟ್ ಗವರ್ನರ್ ಆದೇಶಾನುಸಾರ ಆಸ್ತಿ ಮುಟ್ಟುಗೋಲು ಮತ್ತು ಇತರ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಹೇಳಲಾಗಿದೆ.

  ಸರ್ಕಾರಿ ಜಾಹೀರಾತಿನ ಹೆಸರಿನಲ್ಲಿ ಪಕ್ಷದ ಜಾಹೀರಾತು ಪ್ರಕಟಿಸುತ್ತಿರುವುದಾಗಿ ಆಮ್ ಆದ್ಮಿ ಪಕ್ಷದ ವಿರುದ್ದ ಆರೋಪಿಸಿದ್ದ ದೆಹಿ ಲೆಫ್ಟಿನೆಂಟ್ ಗವರ್ನರ್ ವಿ.ಕೆ. ಸಕ್ಸೇನಾ ಅವರು ಈ ಕುರಿತು ತನಿಖೆಗೆ ಆದೇಶಿಸಿದ್ದರು. ಇದಾದ ಒಂದೇ ತಿಂಗಳಲ್ಲಿ ಪಕ್ಷಕ್ಕೆ ನೋಟಿಸ್ ಜಾರಿಯಾಗಿದೆ.