National
3 ದಿನ, 7 ಖಂಡಗಳಿಗೆ ಸಂಚಾರ!-ಇಬ್ಬರು ಭಾರತೀಯರಿಂದ ವಿಶ್ವ ದಾಖಲೆ
- Tue, Jan 10 2023 04:27:39 PM
-
ನವದೆಹಲಿ, ಜ 10 (DaijiworldNews/DB): 3 ದಿನದಲ್ಲಿ ಏಳು ಖಂಡಗಳಿಗೆ ಪ್ರಯಾಣಿಸುವ ಮೂಲಕ ಭಾರತೀಯರಿಬ್ಬರು ಗಿನ್ನೆಸ್ ವಿಶ್ವ ದಾಖಲೆ ಮಾಡಿದ್ದಾರೆ.
ಡಾ. ಅಲಿ ಇರಾನಿ ಮತ್ತು ಸುಜೋಯ್ ಕುಮಾರ್ ಮಿತ್ರಾ ಅವರೇ ಮೂರೇ ದಿನಗಳಲ್ಲಿ ಏಳು ಖಂಡಗಳಿಗೆ ಪ್ರಯಾಣಿಸಿದ ಸಾಹಸಿಗರು. ಏಷ್ಯಾ, ಆಫ್ರಿಕಾ, ಯುರೋಪ್, ಉತ್ತರ ಅಮೇರಿಕಾ, ದಕ್ಷಿಣ ಅಮೇರಿಕಾ, ಅಂಟಾರ್ಟಿಕಾ ಮತ್ತು ಓಷಿಯಾನಿಯಾ ಖಂಡಗಳಿಗೆ ಅವರು ಭೇಟಿ ನೀಡಿದ್ದಾರೆ.
ಇವರ ಸಾಧನೆ ಬಗ್ಗೆ ಗಿನ್ನೆಸ್ ದಾಖಲೆ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಲಾಗಿದ್ದು, 3 ದಿನಗಳು, 1 ಗಂಟೆ, 5 ನಿಮಿಷಗಳು ಮತ್ತು 4 ಸೆಕೆಂಡುಗಳಲ್ಲಿ ಇವರಿಬ್ಬರೂ ಏಳು ಖಂಡಗಳಿಗೆ ಕ್ರಮಿಸಿದ್ದಾಗಿ ಬರೆಯಲಾಗಿದೆ. ಅಲಿ ಇರಾನಿ ಹಾಗೂ ಸುಜೋಯ್ ಕುಮಾರ್ ಅವರು ಪ್ರಯಾಣದಲ್ಲಿ ಹೆಚ್ಚಿನ ಆಸಕ್ತಿ ಹೊಂದಿದವರಾಗಿದ್ದು, ಈ ಹಿಂದಿನ ಎಲ್ಲಾ ದಾಖಲೆಗಳನ್ನು ಮುರಿದು ಹೊಸ ದಾಖಲೆ ಸೃಷ್ಟಿಸಲು ಯೋಜಿಸಿದ್ದರು. ಅದರಂತೆ ಅವರು ಮೂರೇ ದಿನದಲ್ಲಿ ಏಳು ಖಂಡಗಳನ್ನು ಸುತ್ತಿ ದಾಖಲೆ ಮಾಡಿದ್ದಾರೆ. ಗಿನ್ನೆಸ್ ವಿಶ್ವ ದಾಖಲೆಯ ಪ್ರಮಾಣಪತ್ರದ ಪ್ರತಿಯನ್ನು ಡಾ. ಅಲಿ ಅವರು ತಮ್ಮ ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾರೆ.
ಡಿಸೆಂಬರ್ 4ರಂದು ಅಂಟಾರ್ಟಿಕಾದಿಂದ ಪ್ರಯಾಣ ಆರಂಭಿಸಿದ ಅವರು, ಡಿಸೆಂಬರ್ 7ರಂದು ಆಸ್ಟ್ರೇಲಿಯಾದ ಮೆಲ್ಬೋರ್ನ್‌ನಲ್ಲಿ ಪ್ರಯಾಣ ಕೊನೆಗೊಳಿಸಿದರು.
ಇನ್ನು ಇದೇ ವೇಳೆ ತಮ್ಮ ಸಾಧನೆ ಬಗ್ಗೆ ಮಾತನಾಡಿದ ಡಾ. ಅಲಿ, ಇಂದು ನಾವು ಹಳೆಯ ದಾಖಲೆಗಳನ್ನು ಮುರಿದು ಹೊಸ ವಿಶ್ವ ದಾಖಲೆ ಮಾಡಿದ್ದೇವೆ. ಮುಂದಿನ ದಿನಗಳಲ್ಲಿ ಈ ದಾಖಲೆಯನ್ನು ಬೇರೆಯವರು ಮುರಿಯಲೂಬಹುದು. ಆದರೆ ನಮ್ಮ ಜೀವನದಲ್ಲಿ ಇದೊಂದು ಹೊಸ ಅನುಭವ ಎಂದರು.
ಚಾನಲ್ ಫಾಲೋ ಮಾಡಿ
