ಕೋಲ್ಕೊತಾ, ಜ 10 (DaijiworldNews/DB): 2ವರ್ಷ 9 ತಿಂಗಳಿಗೆ ಈ ಮಗು ಇಂಗ್ಲಿಷ್ ವರ್ಣಮಾಲೆಯ ಅಕ್ಷರಗಳನ್ನು ಸರಾಗವಾಗಿ ಹೇಳಬಲ್ಲಳು. ಅಲ್ಲದೆ ಅಕ್ಷರಗಳ ಸೂಚನಾರ್ಥಕ ಪದಗಳಾಗಿ ಅಟೋಮೊಬೈಲ್ ಸಂಸ್ಥೆಗಳ ಹೆಸರು ಹೇಳುತ್ತಾಳೆ!
ಹೌದು. ಪಶ್ಚಿಮ ಬಂಗಾಳದ ಹೂಗ್ಲಿ-ಚಿನ್ಸುರಾಹ್ ನಿವಾಸಿಗಳಾದ ಅಭಿಜಿತ್ ಬಿಸ್ವಾಸ್ ಮತ್ತು ರಾಜಕುಮಾರಿ ಬಿಸ್ವಾಸ್ ಅವರ ಪುತ್ರಿ ಅದಿಸ್ತಾತ್ರಿ ಬಿಸ್ವಾಸ್ ಎಂಬ ಎರಡು ವರ್ಷ 9 ತಿಂಗಳ ಮಗುವೇ ಇಂಗ್ಲಿಷ್ ವರ್ಣಮಾಲೆಯನ್ನು ಪಟಪಟನೆ ಹೇಳುವಾಕೆ. ಅವಳ ಈ ವಿಶೇಷ ಪ್ರತಿಭೆಗೆ ನ್ಯಾಷನಲ್ ಬುಕ್ ಆಫ್ ರೆಕಾರ್ಡ್ಸ್, ವರ್ಲ್ಡ್ ರೆಕಾರ್ಡ್ ಆಫ್ ಎಕ್ಸಲೆನ್ಸ್ ನಲ್ಲಿ ಹೆಸರು ದಾಖಲಾಗಿದೆ.
ಎ ಫಾರ್ ಆಪಲ್, ಬಿ ಫಾರ್ ಬಾಲ್ ಎನ್ನುವ ಬದಲು ಪ್ರತಿ ಅಕ್ಷರಗಳಿಗೆ ಈಕೆ ಆಟೋಮೊಬೈಲ್ ಸಂಸ್ಥೆಗಳ ಹೆಸರು ಹೇಳುತ್ತಾಳೆ. ಎ ಫಾರ್ ಆಡಿ, ಬಿ ಫಾರ್ ಬಾಷ..ಹೀಗೆ ಝಡ್ವರೆಗೆ ಎಲ್ಲಾ ಅಕ್ಷರಗಳಿಗೂ ಅಟೋಮೊಬೈಲ್ ಸಂಸ್ಥೆಗಳ ಹೆಸರು ಈಕೆಗೆ ಗೊತ್ತು. ಪ್ರಾಣಿ, ಸಸ್ಯಗಳ ವೈಜ್ಞಾನಿಕ ಹೆಸರನ್ನೂ ಈಕೆ ಹೇಳಬಲ್ಲಳು. ನಿಮಿಷವೊಂದರಲ್ಲಿ 100 ಸಾಮಾನ್ಯ ಜ್ಞಾನದ ಪ್ರಶ್ನೆಗಳಿಗೆ ಉತ್ತರಿಸುವ ಕೌಶಲ್ಯ ಈಕೆಗೆ ಸಿದ್ದಿಸಿದೆ. ಐಫೆಲ್ ಟವರ್, ಒಪೆರಾ ಹೌಸ್ ಇರುವ ಸ್ಥಳಗಳೂ ಈಕೆಗೆ ಗೊತ್ತು.
ತಂದೆ ಅಭಿಜಿತ್ ಕಾಲೇಜು ಉಪನ್ಯಾಸಕರಾದರೆ, ತಾಯಿ ರಾಜಕುಮಾರಿ ಟ್ಯೂಶನ್ ಟೀಚರ್. ಮಗಳು ಅದಿಸ್ತಾತ್ರಿಗೆ ತಾಯಿ ಆಟಗಳ ಮೂಲಕ ಆಟೋಮೊಬೈಲ್ ಸಂಸ್ಥೆಗಳ ಹೆಸರು ಹೇಳಿಕೊಟ್ಟಿದ್ದಾರೆ. ಎಳೆಯ ವಯಸ್ಸಿನಲ್ಲೇ ಆಕೆಯ ಅಪಾರ ಜ್ಞಾನವನ್ನು ನೋಡಿ ಇನ್ನಷ್ಟು ಹೊಸತನ್ನು ಕಲಿಸಿದ್ದು, ಅದನ್ನು ವೀಡಿಯೋ ಮಾಡಿಟ್ಟುಕೊಂಡು ಹಲವು ಸಂಸ್ಥೆಗಳಿಗೆ ಕಳುಹಿಸಿಕೊಟ್ಟಿದ್ದಾರೆ. ಇಂಗ್ಲಿಷ್ ವರ್ಣಮಾಲೆ ಅಕ್ಷರಗಳನ್ನು ತಪ್ಪಿಲ್ಲದೆ ವೇಗವಾಗಿ ಹೇಳುವುದಲ್ಲದೆ, ಎಯಿಂದ ಝಡ್ವರೆಗೆ ಆಟೋಮೊಬೈಲ್ ಸಂಸ್ಥೆಗಳ ಹೆಸರನ್ನು ಹೇಳುವ ಅವಳ ಕೌಶಲ್ಯದಿಂದ ನ್ಯಾಷನಲ್ ಬುಕ್ ಆಫ್ ರೆಕಾರ್ಡ್ಸ್, ವರ್ಲ್ಡ್ ರೆಕಾರ್ಡ್ ಆಫ್ ಎಕ್ಸಲೆನ್ಸ್ ನಲ್ಲಿ ಹೆಸರು ದಾಖಲಾಗಿದೆ.