ಜೋಧಪುರ, ಜ 08 (DaijiworldNews/DB): ವಿದೇಶದಲ್ಲಿ ನಡೆಯುವ ಸಮರಾಭ್ಯಾಸದಲ್ಲಿ ಇದೇ ಮೊದಲ ಬಾರಿಗೆ ಭಾರತದ ಮಹಿಳಾ ಫೈಟರ್ ಭಾಗವಹಿಸಲಿದ್ದಾರೆ. ಆ ಮೂಲಕ ದೇಶದ ಮಹಿಳಾಶಕ್ತಿಯ ಪ್ರದರ್ಶನ ವಿದೇಶೀ ನೆಲದಲ್ಲಾಗಲಿದೆ.
ದೇಶದ ಮೊದಲ ಯುದ್ದ ವಿಮಾನ ಫೈಟರ್ ಪೈಲಟ್ ಖ್ಯಾತಿಯ ಸ್ಕ್ವಾಡ್ರನ್ ಲೀಡರ್, ಸುಖೋಯ್ 30ಎಂಕೆಐನ ಪೈಲರ್ ಅವನಿ ಚತುರ್ವೇದಿ ಅವರು ಜಪಾನ್ನಲ್ಲಿ ನಡೆಯುವವ ವೀರ್ ಗಾರ್ಡಿಯನ್ 2023 ಸಮರಾಭ್ಯಾಸದಲ್ಲಿ ಭಾಗವಹಿಸಲಿದ್ದಾರೆ. ಈ ಸಮರಾಭ್ಯಾಸವು
ಜಪಾನ್ನ ಒಮಿತಾಮಾ ಮತ್ತು ಸಯೇಮಾ ಏರ್ಬೇಸ್ನ ಸುತ್ತಮುತ್ತ ಜನವರಿ16ರಿಂದ 26ರವರೆಗೆ ನಡೆಯಲಿದೆ. ಭಾರತದ ಸುಖೋಯ್ 30 ಎಂಕೆಐ, ಎರಡು ಸಿ-17 ಗ್ಲೋಬ್ಮಾಸ್ಟರ್ ಮತ್ತು ಒಂದು ಐಎಲ್-78 ಟ್ಯಾಂಕರ್ ಯುದ್ದ ವಿಮಾನಗಳು ಈ ಏರಿಯಲ್ ವಾರ್ ಗೇಮ್ನಲ್ಲಿ ಪಾಲ್ಗೊಳ್ಳಲಿವೆ.
ಈ ಹಿಂದೆ ಇಂತಹ ಸಮರಾಭ್ಯಾಸಗಳು ಭಾರತದ ನೆಲದಲ್ಲಿ ನಡೆದಾಗ ವಿದೇಶಿ ಮಹಿಳಾ ಫೈಟರ್ ಪೈಲಟ್ಗಳು ಭಾಗವಹಿಸಿದ್ದರು. ಆದರೆ ಭಾರತದ ಮಹಿಳಾ ಫೈಟರ್ ಪೈಲಟ್ವೊಬ್ಬರು ವಿದೇಶಿ ನೆಲದಲ್ಲಿ ಭಾಗವಹಿಸುತ್ತಿರುವುದು ಇದೇ ಮೊದಲು.
ಮೂಲತಃ ಮಧ್ಯಪ್ರದೇಶದ ರೇವಾ ಜಿಲ್ಲೆಯವರಾದ 29 ವರ್ಷದ ಅವನಿ ಟೇಬಲ್ ಟೆನ್ನಿಸ್ ಮತ್ತು ಚೆಸ್ ಆಟಗಾರ್ತಿ. ಬಿಇ ಮುಗಿಸಿದ ಬಳಿಕ ಹೈದರಾಬಾದ್ನ ಏರ್ಫೋರ್ಸ್ ಅಕಾಡೆಮಿಯಲ್ಲಿ ತರಬೇತಿ ಪಡೆದು 2016ರಲ್ಲಿ ವಾಯುಪಡೆಗೆ ನೇಮಕಗೊಂಡರು. ಅವನಿ ಸಹೋದರ ಕೂಡಾ ಸೇನೆಯಲ್ಲಿದ್ದಾರೆ.