ಶ್ರೀನಗರ, ಜ 07 (DaijiworldNews/DB): ಮನೆಯೊಂದಕ್ಕೆ ದಾಳಿ ಮಾಡಲು ಬಂದ ಉಗ್ರರನ್ನು ನೋಡಿ ಬೊಗಳಲಾರಂಭಿಸಿದ ಸಾಕು ನಾಯಿಯೊಂದು ತನ್ನ ಮಾಲಕನ ಕುಟುಂಬವನ್ನು ಉಗ್ರರಿಂದ ರಕ್ಷಿಸಿದ ಪ್ರಸಂಗ ಜಮ್ಮು ಮತ್ತು ಕಾಶ್ಮೀರದ ರಾಜೌರಿಯಲ್ಲಿ ನಡೆದಿದೆ.
ಇಲ್ಲಿನ ನಿರ್ಮಲಾ ದೇವಿ ಎಂಬವರ ಮನೆ ಮೇಲೆ ಉಗ್ರರು ದಾಳಿ ಮಾಡಲು ಬಂದಿದ್ದಾರೆ. ಉಗ್ರರು ಬಂದ ಸುಳಿವು ಸಿಕ್ಕಿದ ಸಾಕು ನಾಯಿ ಮಿಚೆಲ್ ಜೋರಾಗಿ ಬೊಗಳಲಾರಂಭಿಸಿದೆ. ನಾಯಿಯ ವಿಚಿತ್ರ ಬೊಗಳುವಿಕೆಯಿಂದ ಅನುಮಾನಗೊಂಡ ಮೊಮ್ಮಗಳೊಂದಿಗೆ ಅಡುಗೆ ಮನೆಯಲ್ಲಿದ್ದ ನಿರ್ಮಲಾ ದೇವಿ ಕೂಡಲೇ ರೂಂನೊಳಗೆ ಓಡಿದ್ದು, ಪತಿ ಹಾಗೂ ಮೊಮ್ಮಗಳ ಜೊತೆ ರೂಂನೊಳಗೆ ಚಿಲಕ ಹಾಕಿಕೊಂಡು ಅವಿತುಕೊಂಡಿದ್ದಾರೆ.
ಈ ನಡುವೆ ಶ್ವಾನ ಮಿಚೆಲ್ಗೆ ಉಗ್ರರು ಗುಂಡೇಟು ನೀಡಲೆತ್ನಿಸಿದರೂ ಅದು ತಪ್ಪಿಸಿಕೊಂಡು ಬಚಾವಾಗಿದೆ. ಆದರೆ ಮನೆಯ ಟಿವಿ ಸೇರಿದಂತೆ ಇತರ ಸಾಮಾಗ್ರಿಗಳಿಗೆ ಉಗ್ರರು ಗುಂಡು ಹಾರಿಸಿ ಹಾನಿ ಮಾಡಿ ಹಿಂತಿರುಗಿದ್ದಾರೆ. ಇನ್ನು ಮಿಚೆಲ್ ಬೊಗಳಿದ್ದರಿಂದಾಗಿ ಪಕ್ಕದ ಮನೆಯವರೂ ಬಾಗಿಲು ಹಾಕಿಕೊಂಡು ಉಗ್ರರಿಂದ ರಕ್ಷಿಸಿಕೊಂಡಿದ್ದಾರೆ ಎಂದು ನಿರ್ಮಲಾ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.