'ಮಧ್ಯಾಹ್ನ 3ರಿಂದ ರಾತ್ರಿ 9ರ ನಡುವಿನ ರಸ್ತೆ ಸಂಚಾರ ಅಪಾಯಕಾರಿ'-ಸರ್ಕಾರದ ವರದಿ

•   Tue, Jan 03 2023 01:25:25 PM



• ನವದೆಹಲಿ, ಜ 03 (DaijiworldNews/DB): ಭಾರತೀಯ ರಸ್ತೆಗಳಲ್ಲಿ ಮಧ್ಯಾಹ್ನ 3ರಿಂದ ರಾತ್ರಿ 9 ಗಂಟೆಯವರೆಗಿನ ಸಂಚಾರ ಅಪಾಯಕಾರಿ ಮತ್ತು ಮಾರಣಾಂತಿಕವಾಗಿದೆ ಎಂದು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿಗಳ ಸಚಿವಾಲಯ ಬಿಡುಗಡೆಗೊಳಿಸಿದ ಸರ್ಕಾರದ ದತ್ತಾಂಶಗಳ ವಿಶ್ಲೇಷಣೆಯಲ್ಲಿ ತಿಳಿದು ಬಂದಿದೆ.

  2021ರಲ್ಲಿ ದಾಖಲಾದ ಒಟ್ಟು ರಸ್ತೆ ಅಪಘಾತಗಳ ಪೈಕಿ ಶೇ.40ರಷ್ಟು ಅಪಘಾತಗಳು ಮಧ್ಯಾಹ್ನ 3ರಿಂದ ರಾತ್ರಿ 9 ಗಂಟೆಯ ನಡುವೆ ನಡೆದಿವೆ. ಒಟ್ಟು 4.12 ಲಕ್ಷ ರಸ್ತೆ ಅಪಘಾತಗಳು 2021ರಲ್ಲಿ ಭಾರತದಲ್ಲಿ ಸಂಭವಿಸಿದ್ದು, ಈ ಪೈಕಿ 1.58 ಲಕ್ಷ ಮಧ್ಯಾಹ್ನ 3ರಿಂದ ರಾತ್ರಿ 9 ಗಂಟೆಯ ನಡುವೆ ನಡೆದ ಅಪಘಾತಗಳಾಗಿವೆ. ಮಧ್ಯರಾತ್ರಿ 12ರಿಂದ ಬೆಳಗ್ಗೆ 6 ಗಂಟೆಯವರೆಗೆ ಶೇ.10ಕ್ಕೂ ಕಡಿಮೆ ಅಪಘಾತಗಳು ನಡೆದಿರುವುದರಿಂದ ಈ ಸಮಯ ಸಂಚಾರಕ್ಕೆ ಸುರಕ್ಷಿತವಾಗಿದೆ ಎಂದು ಅಂಕಿಅಂಶ ಹೇಳಿದೆ. 2021 ಜನವರಿಯಲ್ಲಿ ಅತಿ ಹೆಚ್ಚು ಅಪಘಾತ ಸಂಭವಿಸಿವೆ ಎಂದೂ ಉಲ್ಲೇಖಿಸಲಾಗಿದೆ.

  ಇನ್ನು ಶೇ.21ರಷ್ಟು ಅಪಘಾತಗಳು ಸಂಜೆ 6ರಿಂದ ರಾತ್ರಿ 9ರವರೆಗಿನ ಅವಧಿಯಲ್ಲಿ ದಾಖಲಾಗಿದೆ. ಮಧ್ಯಾಹ್ನ 3ರಿಂದ ಸಂಜೆ 6 ಗಂಟೆಯ ನಡುವೆ ಶೇ.18ರಷ್ಟು ಅಪಘಾತ ಸಂಭವಿಸಿದೆ. ಇನ್ನು 4,996 ಅಪಘಾತಗಳು ಸಂಭವಿಸಿರುವ ಸಮಯ ಗೊತ್ತಾಗಿಲ್ಲ ಎಂದು ಅಂಕಿಅಂಶ ಹೇಳಿದೆ.