ದೆಹಲಿ, ಡಿ 31 (DaijiworldNews/HR): 2020ರಲ್ಲಿ ದೆಹಲಿಯಲ್ಲಿ ನಡೆದ ಹಿಂಸಾಚಾರಕ್ಕೆ ಸಂಬಂಧಿಸಿದಂತೆ ಯುಎಪಿಎ ಪ್ರಕರಣ ಎದುರಿಸುತ್ತಿರುವ ಹೋರಾಟಗಾರ ಉಮರ್ ಖಾಲಿದ್ ತಮ್ಮ ಸಹೋದರಿಯ ಮದುವೆಯಲ್ಲಿ ಪಾಲ್ಗೊಂಡ ನಂತರ ಇಂದು ಮತ್ತೆ ಜೈಲಿಗೆ ಮರಳಿದ್ದಾರೆ ಎಂದು ವರದಿಯಾಗಿದೆ.
ಎಂಟು ನೂರು ದಿನಗಳಿಗೂ ಹೆಚ್ಚು ಸಮಯ ಜೈಲಿನಲ್ಲಿದ್ದ ಖಾಲಿದ್ ಅವರಿಗೆ ಸೋದರಿಯ ವಿವಾಹದಲ್ಲಿ ಪಾಲ್ಗೊಳ್ಳಲು ಏಳು ದಿನಗಳ ಕಾಲಾವಕಾಶ ಒದಗಿಸಿ ಬಿಡುಗಡೆಗೊಳಿಸಲಾಗಿತ್ತು.
ಇನ್ನು ಸೆಪ್ಟೆಂಬರ್ 2020 ರಿಂದ ಜೈಲಿನಲ್ಲಿರುವ ಖಾಲಿದ್ ಅವರಿಗೆ ಅಕ್ಟೋಬರ್ 18 ರಂದು ದಿಲ್ಲಿ ಹೈಕೋರ್ಟ್ ಜಾಮೀನು ನಿರಾಕರಿಸಿದ್ದು, ನವೆಂಬರ್ 18 ರಂದು ಹಿರಿಯ ವಕೀಲರೊಬ್ಬರ ಮುಖಾಂತರ ಮಧ್ಯಂತರ ಜಾಮೀನಿಗಾಗಿ ಉಮರ್ ಖಾಲಿದ್ ಅರ್ಜಿ ಸಲ್ಲಿಸಿದ್ದರು ಹಾಗೂ ಖಾಲಿದ್ ಅವರ ಸೋದರಿಯ ವಿವಾಹ ಡಿಸೆಂಬರ್ ತಿಂಗಳಿನಲ್ಲಿ ನಡೆಯಲಿರುವುದರಿಂದ ಅವರಿಗೆ ಜಾಮೀನು ಒದಗಿಸಬೇಕೆಂದು ಅವರ ವಕೀಲರು ಕೋರಿದ್ದರು.