ದಲೈಲಾಮಾ ವಿರುದ್ದ ಬೇಹುಗಾರಿಕೆಗೆ ಬಂದಿದ್ದ ಚೀನೀ ಮಹಿಳೆ ಅರೆಸ್ಟ್

•   Fri, Dec 30 2022 10:58:22 AM



• ನವದೆಹಲಿ, ಡಿ 30 (DaijiworldNews/DB): ಭಾರತದಲ್ಲಿ ಆಶ್ರಯ ಪಡೆದಿರುವ ಬೌದ್ದ ಧರ್ಮಗುರು ದಲೈಲಾಮಾ ಅವರ ಮೇಲೆ ಬೇಹುಗಾರಿಕೆ ನಡೆಸಲು ಬಂದಿದ್ದ ಚೀನೀ ಮಹಿಳೆಯನ್ನು ಕೊನೆಗೂ ಬಂಧಿಸಲಾಗಿದೆ.

  ಬಂಧಿತಳನ್ನು ಸಾಂಗ್ ಕ್ಸಿಯೋಲನ್ ಎಂದು ಗುರುತಿಸಲಾಗಿದೆ. ಕಾರ್ಯಕ್ರಮವೊಂದರಲ್ಲಿ ಭಾಗಿಯಾಗಲು ಬಿಹಾರದ ಗಯಾಕ್ಕೆ ದಲೈಲಾಮಾ ತೆರಳಿದ್ದಳು. ಅವರ ಮೇಲೆ ಬೇಹುಗಾರಿಕೆ ಮಾಡಲೆಂದು ಬಂದಿದ್ದ ಚೀನೀ ಮಹಿಳೆ ಗಯಾ ಬಳಿಯೇ ವಾಸವಾಗಿದ್ದಳು ಎಂಬ ಮಾಹಿತಿ ಗುಪ್ತಚರ ಸಂಸ್ಥೆಗಳಿಗೆ ಲಭಿಸಿದ ಹಿನ್ನೆಲೆಯಲ್ಲಿ ಮಹಿಳೆಗಾಗಿ ಪೊಲೀಸರು ಹುಡುಕಾಟ ನಡೆಸಿದ್ದರು. ಮಹಾರಾಣಿ ರಸ್ತೆಯ ಗೆಸ್ಟ್ ಹೌಸ್‌ವೊಂದರಲ್ಲಿ ಆಕೆ ಅಡಗಿಕೊಂಡಿದ್ದಳು. ಖಚಿತ ಮಾಹಿತಿ ಮೇರೆಗೆ ಅಲ್ಲಿಗೆ ತೆರಳಿದ್ದ ಪೊಲೀಸರು ಆಕೆಯನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

  ಇನ್ನು ಆಕೆ ವೀಸಾ ನಿಯಮ ಉಲ್ಲಂಘಿಸಿ 2019ರಿಂದಲೂ ಭಾರತದಲ್ಲೇ ವಾಸಿಸುತ್ತಿದ್ದಳು. 2020ರಲ್ಲಿ ನಾಲ್ಕು ದಿನಗಳ ಕಾಲ ನೇಪಾಳಕ್ಕೆ ಹೋಗಿದ್ದ ಆಕೆ ಮತ್ತೆ ಭಾರತಕ್ಕೆ ವಾಪಸ್ಸಾಗಿದ್ದು, ಬಳಿಕ ಮೆಕ್ಲಿಯೋಡ್‌ ಗಂಜ್‌ನಲ್ಲಿ ನೆಲೆ ನಿಂತಿದ್ದಳು. ಆ ಬಳಿಕ ಡಿಸೆಂಬರ್‍ 22ರಂದು ದಲೈಲಾಮಾ ಬೋಧಗಯಾಗೆ ತೆರಳಿದ್ದ ವೇಳೆ ಈಕೆಯೂ ಅಲ್ಲಿಗೆ ಹೋಗಿದ್ದಳು ಎನ್ನಲಾಗಿದೆ.

  ಇನ್ನು ಆಕೆಯೊಂದಿಗೆ ಬಂದಿದ್ದ ನೇಪಾಳಿ ಮಹಿಳೆಯನ್ನೂ ವಿಚಾರಣೆಗೆಂದು ಪೊಲೀಸರು ವಶಕ್ಕೆ ತೆಗೆದುಕೊಂಡಿದ್ದಾರೆ. ಚೀನೀ ಮಹಿಳೆಯ ವೀಸಾವನ್ನು ರದ್ದುಗೊಳಿಸಲಾಗಿದ್ದು, ಭಾರತ ತೊರೆಯುವಂತೆ ಆಕೆಗೆ ನೋಟಿಸ್ ನೀಡಲಾಗಿದೆ ಎಂದೂ ತಿಳಿದು ಬಂದಿದೆ.