8 ತಿಂಗಳಲ್ಲಿ 46 ಕೆಜಿ ತೂಕ ಇಳಿಸಿಕೊಂಡ ದೆಹಲಿ ಪೊಲೀಸ್ ಅಧಿಕಾರಿ!

•   Thu, Dec 29 2022 11:39:00 AM



• ನವದೆಹಲಿ, ಡಿ 29 (DaijiworldNews/DB): ಜೀವನಶೈಲಿ, ಆಹಾರಶೈಲಿಯಲ್ಲಿನ ಬದಲಾವಣೆ ಮತ್ತು ದೈನಂದಿನ ವ್ಯಾಯಾಮ ಮಾಡಿ ದೆಹಲಿಯ ಪೊಲೀಸ್ ಅಧಿಕಾರಿಯೊಬ್ಬರು 8 ತಿಂಗಳ ಅವಧಿಯಲ್ಲಿ ಬರೋಬ್ಬರಿ 46 ಕೆಜಿ ತೂಕ ಇಳಿಸಿಕೊಂಡಿದ್ದಾರೆ!

  ಡಿಸಿಪಿ ಜಿತೇಂದ್ರ ಮಣಿ ಅವರೇ ತೂಕ ಇಳಿಸಿಕೊಂಡ ಪೊಲೀಸಪ್ಪ. 130 ಕೆಜಿ ತೂಕ ಹೊಂದಿದ್ದ ಜಿತೇಂದ್ರ ಮಣಿ ಅವರು ಮಧುಮೇಹ, ಅತಿಯಾದ ರಕ್ತದೊತ್ತಡ ಮತ್ತು ಅಧಿಕ ಕೊಲೆಸ್ಟ್ರಾಲ್‌ನಿಂದ ಬಳಲುತ್ತಿದ್ದರು. ಹೇಗಾದರೂ ಮಾಡಿ ತೂಕ ಇಳಿಸಿಕೊಳ್ಳಲೇಬೇಕೆಂಬ ಅವರ ಛಲ ಇದೀಗ 46 ಕೆಜಿ ತೂಕ ಕಡಿಮೆಯಾಗಲು ಕಾರಣವಾಗಿದೆ. ಸದ್ಯ ಅವರು 84 ಕೆಜಿ ತೂಕ ಹೊಂದಿದ್ದಾರೆ. ಇನ್ನು ತೂಕ ಇಳಿಸಿಕೊಂಡ ಡಿಸಿಪಿಯವರಿಗೆ ಪೊಲೀಸ್ ಆಯುಕ್ತರು ಪ್ರಶಂಸನಾ ಪತ್ರ ನೀಡಿ ಗೌರವಿಸಿದ್ದಾರೆ.

  ಶಿಸ್ತಿನ ಜೀವನಕ್ರಮ ರೂಢಿಸಿಕೊಂಡಿರುವುದೇ ತೂಕ ಇಳಿಸಲು ಅವರಿಗೆ ಸಹಕಾರಿಯಾಯಿತು. ಎಂಟು ತಿಂಗಳ ಕಾಲ ಪ್ರತಿದಿನ 15 ಮೆಟ್ಟಿಲುಗಳನ್ನು ಹತ್ತಿ, ಇಳಿಯುತ್ತಿದ್ದರು. ತಿನ್ನಲು ಚಪಾತಿ, ಅನ್ನದ ಬದಲಾಗಿ ಸೂಪ್, ತರಕಾರಿ, ಹಣ್ಣು ಮಾತ್ರ ಆಯ್ಕೆ ಮಾಡಿಕೊಂಡಿದ್ದರು. ಪ್ರತಿದಿನ ವ್ಯಾಯಾಮ ಮಾಡುತ್ತಿದ್ದರು. ಎಂಟು ತಿಂಗಳಿಂದ ಕಠಿಣವಾದರೂ ಪಾಲನೆಯನ್ನು ಬಿಡಲಿಲ್ಲ. ಇದರಿಂದ ಅವರ ಸೊಂಟದ ಸುತ್ತಳತೆ 12 ಇಂಚು ಕಡಿಮೆಯಾಯಿತು. ತೂಕನಷ್ಟವೂ ಸಾಧ್ಯವಾಯಿತು.