ಸ್ನೇಹಿತನ ಬದಲಿಗೆ ಪರೀಕ್ಷೆ ಬರೆಯಲು ಬಂದು ಸಿಕ್ಕಿಬಿದ್ದ ಯುವತಿ

•   Tue, Dec 27 2022 02:51:12 PM



• ಗುಜರಾತ್, ಡಿ 27 (DaijiworldNews/DB): ಸ್ನೇಹಿತ ಉತ್ತರಾಖಂಡಲ್ಲಿ ಮೋಜು ಮಾಡುತ್ತಿದ್ದರೆ, ಸ್ನೇಹಿತೆ ಆತನ ಪರವಾಗಿ ಪರೀಕ್ಷೆ ಬರೆಯಲು ಬಂದು ಸಿಕ್ಕಿ ಬಿದ್ದ ಘಟನೆ ಗುಜರಾತ್‌ನಲ್ಲಿ ನಡೆದಿದೆ.

  24 ವರ್ಷದ ಯುವತಿ ಗೆಳೆಯನನ್ನು ಪರೀಕ್ಷೆಯಲ್ಲಿ ಪಾಸು ಮಾಡಿಸುವ ಉದ್ದೇಶದಿಂದ ಆತನ ಬದಲಿಗೆ ಪರೀಕ್ಷೆ ಬರೆಯಲು ಬಂದು ಸಿಕ್ಕಿಬಿದ್ದಾಕೆ. ಆಕೆಯ ಸ್ನೇಹಿತ ಉತ್ತರಾಖಂಡದಲ್ಲಿ ಮೋಜು ಮಸ್ತಿಯಲ್ಲಿ ತೊಡಗಿದ್ದ. ಈತ ತೃತೀಯ ವರ್ಷದ ಬಿಕಾಂ ವಿದ್ಯಾರ್ಥಿಯಾಗಿದ್ದು, ಪರೀಕ್ಷೆಗಳಲ್ಲಿ ನಾಪಾಸಾಗಿದ್ದ. ಆತನನ್ನು ಹೇಗಾದರು ಮಾಡಿ ಪಾಸ್ ಮಾಡಿಸಬೇಕೆಂಬ ಉದ್ದೇಶದಿಂದ ಆತನ ಸ್ನೇಹಿತೆ ಆತನ ಪರವಾಗಿ ಪರೀಕ್ಷೆ ಬರೆಯಲು ಬಂದಿದ್ದಾಳೆ. ಕಂಪ್ಯೂಟರ್ ಸಹಾಯದಿಂದ ಹಾಲ್‌ಟಿಕೆಟ್‌ನಲ್ಲಿ ಸ್ನೇಹಿತನ ಫೋಟೋವಿದ್ದ ಜಾಗದಲ್ಲಿ ತನ್ನ ಫೋಟೋ ಅಂಟಿಸಿ ಪರೀಕ್ಷೆ ಹಾಲ್‌ನೊಳಗೆ ಪ್ರವೇಶಿಸಿದ್ದಾಳೆ. ಆದರೆ ಆಕೆ ಪರೀಕ್ಷೆ ಬರೆಯುತ್ತಿದ್ದ ವೇಳೆ ಸಿಬಂದಿಗೆ ಅನುಮಾನ ಬಂದಿದ್ದು, ಆಕೆಯನ್ನು ವಿಚಾರಿಸಿದಾಗ ನಿಜಾಂಶ ಬಯಲಾಗಿದೆ.

  ಕೂಡಲೇ ಆಕೆಯ ಸ್ನೇಹಿತನಿಗೆ ಕರೆ ಮಾಡಿದಾಗ ಆತ ಉತ್ತರಾಖಂಡದಲ್ಲಿರುವ ವಿಷಯ ಗೊತ್ತಾಗಿದೆ. ಇಬ್ಬರೂ ಬಾಲ್ಯಸ್ನೇಹಿತರೆಂದು ತಿಳಿದು ಬಂದಿದೆ. ವೀರ್ ನರ್ಮದ್ ದಕ್ಷಿಣ ಗುಜರಾತ್ ವಿಶ್ವ ವಿದ್ಯಾಲಯವು ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ್ದು, ಇದು ಯುವತಿಯ ಭವಿಷ್ಯದ ಮೇಲೆ ಭಾರೀ ಪರಿಣಾಮ ಬೀರಲಿದೆ ಎನ್ನಲಾಗಿದೆ.