ನವದೆಹಲಿ, ಡಿ 24 (DaijiworldNews/DB): ದೇಶಸೇವೆಗೆ ತನ್ನನ್ನು ಅರ್ಪಿಸಿದ ತಾಯಿಗೆ ಸೇನಾಧಿಕಾರಿಯೊಬ್ಬರು ತಮ್ಮ ನಿವೃತ್ತಿಗೂ ಮುನ್ನ ವಿಶೇಷವಾಗಿ ಗೌರವ ಸಲ್ಲಿಸಿದ್ದಾರೆ. ನಿವೃತ್ತಿಯಂಚಿನಲ್ಲಿದ್ದ ಸೇನಾಧಿಕಾರಿ ತನ್ನ ಕೊನೆಯ ಸೆಲ್ಯೂಟ್ನ್ನು ತಾಯಿಗೆ ನೀಡುವ ಮೂಲಕ ದೇಶಸೇವೆಗೆ ತಮ್ಮನ್ನು ನೀಡಿದ ತಾಯಿಗೆ ಧನ್ಯವಾದ ಅರ್ಪಿಸಿದ್ದಾರೆ.
ಸೇನಾಧಿಕಾರಿಯಾಗಿದ್ದ ಪುತ್ರ ನಿವೃತ್ತಿಗೂ ಮುನ್ನ ಮನೆಗೆ ಆಗಮಿಸಿ ಶಿಸ್ತಿನ ನಡಿಗೆಯ ಮೂಲಕ ತಾಯಿಯ ಬಳಿ ಹೋಗಿ ತಾಯಿಗೆ ಸೆಲ್ಯೂಟ್ ಹೊಡೆದಿದ್ದಾರೆ. ಈ ವೇಳೆ ಸೋಫಾದಲ್ಲಿ ಕುಳಿತುಕೊಂಡಿದ್ದ ತಾಯಿ ಎದ್ದು ನಿಂತಿ ಮಗನೆಡೆಗೆ ಸೆಲ್ಯೂಟ್ ಮಾಡಿದ್ದಾರೆ. ಬಳಿಕ ಇಬ್ಬರೂ ಅಪ್ಪಿಕೊಂಡು ತಾಯಿ-ಮಗನ ಪ್ರೀತಿಯನ್ನು ಜಗತ್ತಿಗೆ ತೋರಿಸಿಕೊಟ್ಟಿದ್ದಾರೆ. ಆ ಬಳಿಕ ತನ್ನ ತಾಯಿ ತನ್ನನ್ನು ದೇಶಸೇವೆಗೆ ಅರ್ಪಿಸಿದ್ದರಿಂದಾಗಿ ಸುದೀರ್ಘ 35 ವರ್ಷಗಳ ಕಾಲ ದೇಶವನ್ನು ಕಾಯುವ ಅವಕಾಶ ನನ್ನದಾಯಿತು. ಇದೀಗ ನಿವೃತ್ತಿಯಾಗುತ್ತಿದ್ದು, ಮುಂದೆಯೂ ಅವಕಾಶ ಸಿಕ್ಕರೆ ದೇಶಸೇವೆಗೆ ಸಿದ್ದ ಎಂದಿದ್ದಾರೆ.
ತಾಯಿ ಮಗನ ನಡುವಿನ ಈ ಬಾಂಧವ್ಯದ ವೀಡಿಯೋವನ್ನು ಮೇಜರ್ ಜನರಲ್ ರಂಜನ್ ಮಹಾಜನ್ ಅವರು ಡಿಸೆಂಬರ್ 13ರಂದು ಇನ್ಸ್ಟಾಗ್ರಾಮ್ನಲ್ಲಿ ಹಂಚಿಕೊಂಡಿದ್ದು, ಇದೀಗ ವೈರಲ್ ಆಗಿದೆ. ಇನ್ನು ಈ ವೀಡಿಯೋಗೆ ಸೆಲೆಬ್ರಿಟಿ ರಣವಿಜಯ್ ಸಂಘ ಸೇರಿದಂತೆ ಹಲವರು ಕಾಮೆಂಟ್ ಮಾಡಿದ್ದು, ಸೇನಾಧಿಕಾರಿ ಅವರ ನಡೆಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.