ನವದೆಹಲಿ, ಡಿ 24 (DaijiworldNews/DB): ವಿಮಾನ ಪ್ರಯಾಣದ ವೇಳೆ ಪ್ರಯಾಣಿಕರು ಕಾಯ್ದಿರಿಸಿದ್ದ ಟಿಕೆಟ್ನ ವರ್ಗ ಬದಲಾವಣೆಯಾದಲ್ಲಿ ಅಂತಹ ಪ್ರಯಾಣಿಕರ ಟಿಕೆಟ್ ದರ ಮರು ಪಾವತಿ ಅಥವಾ ಉಚಿತ ಪ್ರಯಾಣ ಕಲ್ಪಿಸುವ ನಿಟ್ಟಿನಲ್ಲಿ ನಿಯಮಗಳಿಗೆ ತಿದ್ದುಪಡಿ ತರಲು ನಾಗರಿಕ ವಿಮಾನಯಾನ ನಿರ್ದೇಶನಾಲಯವು ಮುಂದಾಗಿದೆ.
ಆಯ್ದುಕೊಂಡ ವರ್ಗಕ್ಕಿಂತ ಕಡಿಮೆ ದರ್ಜೆಗೆ ವಿಮಾನ ಸಂಸ್ಥೆಯೇ ಬದಲಾಯಿಸಿದ್ದಲ್ಲಿ ಅಂತಹ ಪ್ರಯಾಣಿಕರಿಗೆ ಈ ನಿಯಮ ಅನ್ವಯವಾಗಲಿದೆ. ಸದ್ಯ ಇದು ಸಮಾಲೋಚನೆಯ ಹಂತದಲ್ಲಿದ್ದು, ಶೀಘ್ರ ಅಂತಿಮ ನಿರ್ಧಾರ ಪ್ರಕಟಗೊಳ್ಳಲಿದೆ. ಆ ಬಳಿಕವಷ್ಟೇ ನಿಯಮ ಅನ್ವಯವಾಗಲಿದೆ ಎಂದು ಡಿಜಿಸಿಎ ತಿಳಿಸಿರುವುದಾಗಿ ವರದಿಯಾಗಿದೆ.
ಈ ನಿಯಮ ಜಾರಿಗೊಂಡಲ್ಲಿ ಒಂದು ವೇಳೆ ಸ್ವಯಂಪ್ರೇರಿತವಾಗಿ ವಿಮಾನ ಸಂಸ್ಥೆಯು ಪ್ರಯಾಣಿಕ ಕಾಯ್ದಿರಿಸಿದ ವರ್ಗವನ್ನು ಕೆಳ ವರ್ಗಕ್ಕೆ ಬದಲಾಯಿಸಿದಲ್ಲಿ ಆತನ ಟಿಕೆಟ್ ಹಣವನ್ನು ಸಂಪೂರ್ಣವಾಗಿ ಮರು ಪಾವತಿ ಮಾಡಿ ಆತನಿಗೆ ಉಚಿತ ಪ್ರಯಾಣ ಕಲ್ಪಿಸಬೇಕಾಗುತ್ತದೆ. ಆ ಮೂಲಕ ತೆರಿಗೆ ಸೇರಿದಂತೆ ಟಿಕೆಟ್ ಹಣವನ್ನು ಸಂಪೂರ್ಣ ಹಣವನ್ನು ವಿಮಾನಯಾನ ಸಂಸ್ಥೆ ಮರುಪಾವತಿ ಮಾಡಬೇಕಾಗುತ್ತದೆ.
ನಿರ್ದಿಷ್ಟ ವರ್ಗದ ಟಿಕೆಟ್ಗಳನ್ನು ಪ್ರಯಾಣಿಕರು ಕಾಯ್ದಿರಿಸಿದ ಹೊರತಾಗಿಯೂ ವಿಮಾನ ಯಾನ ಸಂಸ್ಥೆಗಳು ಪ್ರಯಾಣ ವರ್ಗವನ್ನು ಬದಲಾವಣೆ ಮಾಡುತ್ತಿರುವ ಬಗ್ಗೆ ಪ್ರಯಾಣಿಕರಿಂದ ದೂರುಗಳು ಬಂದ ಹಿನ್ನೆಲೆಯಲ್ಲಿ ಡಿಜಿಸಿಎಯು ನಿಯಮಗಳಿಗೆ ತಿದ್ದುಪಡಿ ತರಲು ಮುಂದಾಗಿದೆ. ವರ್ಗ ಬದಲಾವಣೆಗೆ ಪ್ರಯಾಣಿಕರ ದಟ್ಟಣೆಯೂ ಕಾರಣವಾಗಿದೆ. ವಿಮಾನ ಬದಲಾವಣೆ, ಹೆಚ್ಚುವರಿ ಬುಕ್ಕಿಂಗ್ ಸೇರಿದಂತೆ ಇತರ ಕಾರಣಗಳೂ ಇರುತ್ತವೆ. ವಿಮಾನಯಾನ ಸಂಸ್ಥೆಗಳ ಈ ಬದಲಾವಣೆಗಳು ಪ್ರಯಾಣಿಕರಲ್ಲಿ ಸಾಕಷ್ಟು ಗೊಂದಲಕ್ಕೆ ಕಾರಣವಾಗಿದೆ. ಪ್ರಥಮ ದರ್ಜೆ, ವ್ಯಾಪಾರ ವರ್ಗ ಅಥವಾ ಪ್ರೀಮಿಯಂ ಆರ್ಥಿಕತೆಯಲ್ಲಿ ಟಿಕೆಟ್ ಕಾಯ್ದಿರಿಸಿದ ಪ್ರಯಾಣಿಕರನ್ನು ಕೆಳ ದರ್ಜೆಗೆ ಇಳಿಸಿರುವ ಬಗ್ಗೆ ದೂರುಗಳಿದ್ದವು ಎನ್ನಲಾಗಿದೆ.