ಸುದ್ದಿ ವಾಹಿನಿ ನೋಡುತ್ತಿದ್ದಾಗಲೇ ಬಂದೆರಗಿದ ಮಗಳ ಸಾವಿನ ಸುದ್ದಿ-ಮುಗಿಲು ಮುಟ್ಟಿದ ಹೆತ್ತವರ ಆಕ್ರಂದನ

•   Fri, Dec 23 2022 05:29:01 PM



• ಆಲಪ್ಪುಳ, ಡಿ 23 (DaijiworldNews/DB): ವಿಷಾಹಾರ ಸೇವನೆಯಿಂದ ರಾಷ್ಟ್ರೀಯ ಸೈಕಲ್ ಪೋಲೋ ಆಟಗಾರ್ತಿಯೊಬ್ಬರು ಸಾವನ್ನಪ್ಪಿದ ಘಟನೆ ಮಹಾರಾಷ್ಟ್ರದ ನಾಗ್ಪುರದಲ್ಲಿ ನಡೆದಿದೆ. ಮಗಳನ್ನು ನೋಡಲು ಆಕೆಯಿಂದಲ್ಲಿಗೆ ಹೋಗಲು ವಿಮಾನ ನಿಲ್ದಾಣಕ್ಕೆ ಆಗಮಿಸಿದ್ದ ತಂದೆ ಸುದ್ದಿ ವಾಹಿನಿ ವೀಕ್ಷಿಸುತ್ತಿದ್ದಾಗ ಮಗಳ ಸಾವಿನ ಸುದ್ದಿ ನೋಡಿ ಕುಸಿದು ಬಿದ್ದು ರೋಧಿಸುತ್ತಿದ್ದ ಘಟನೆ ನೆರೆದವರನ್ನೂ ಕಣ್ಣೀರಲ್ಲಿ ಮುಳುಗಿಸಿತು.

  ಕೇರಳದ ಆಲಪ್ಪುಳ ಮೂಲದ ರಾಷ್ಟ್ರೀಯ ಸೈಕಲ್​ ಪೋಲೋ ಆಟಗಾರ್ತಿ ಫಾತಿಮಾ ನಿದಾ ಅವರೇ ಸಾವನ್ನಪ್ಪಿದವರು. ವೃತ್ತಿಯಲ್ಲಿ ಚಾಲಕರಾಗಿರುವ ಫಾತಿಮಾ ತಂದೆ ಶಿಹಾಬುದ್ದೀನ್ ಅವರಿಗೆ ಮಗಳು ಫುಡ್ ಪಾಯಿಸನಿಂಗ್‌ನಿಂದಾಗಿ ಗಂಭೀರವಾಗಿರುವ ವಿಚಾರವನ್ನು ನಾಗ್ಪುರದಿಂದ ಕರೆ ಮಾಡಿ ತಿಳಿಸಲಾಗಿತ್ತು. ಕೂಡಲೇ ಮಗಳನ್ನು ನೋಡಲೆಂದು ನಾಗ್ಪುರಕ್ಕೆ ಹೋಗಲು ಶಿಹಾಬುದ್ದೀನ್ ಅವರು ಕೊಚ್ಚಿ ವಿಮಾನ ನಿಲ್ದಾಣಕ್ಕೆ ಆಗಮಿಸಿದರು. ವಿಮಾನ ನಿಲ್ದಾಣದಲ್ಲಿ ಸುದ್ದಿವಾಹಿನಿ ವೀಕ್ಷಿಸುತ್ತಿರುವಾಗ ಮಗಳು ಫಾತಿಮಾ ನಿದಾ ಸಾವನ್ನಪ್ಪಿರುವ ಸುದ್ದಿ ಪ್ರಸಾರವಾಗಿದ್ದನ್ನು ನೋಡಿ ಶಿಹಾಬುದ್ದೀನ್ ಅಲ್ಲೇ ಕುಸಿದು ಬಿದ್ದರು. ಅವರ ರೋಧನೆಯನ್ನು ನೋಡಿ ವಿಮಾನ ನಿಲ್ದಾಣದಲ್ಲಿ ನೆರೆದಿದ್ದ ಇತರ ಪ್ರಯಾಣಿಕರೂ ಕಂಬನಿ ಮಿಡಿದರು.

  ಇನ್ನು ಮಗಳು ಗಂಭೀರವಾಗಿರುವ ವಿಚಾರವನ್ನು ಪತ್ನಿ ಅನ್ಸಿಲಾ ಮತ್ತು ಮಗ ಮೊಹಮ್ಮದ್ ನಬೀಲ್‌ಗೆ ತಿಳಿಸದೇ ಶಿಹಾಬುದ್ದೀನ್ ನಾಗ್ಪುರಕ್ಕೆ ಹೊರಟಿದ್ದರು. ಆದರೆ ಸುದ್ದಿವಾಹಿನಿ ನೋಡಿ ಪತ್ನಿ ಮತ್ತು ಮಗನಿಗೂ ಆಕೆಯ ಸಾವಿನ ವಿಚಾರ ಗೊತ್ತಾಗಿದೆ. ಇದರಿಂದ ಇಡೀ ಕುಟುಂಬದ ಆಕ್ರಂದನ ಮುಗಿಲು ಮುಟ್ಟಿದೆ.

  ಇನ್ನು ಕೇರಳ ತಂಡಕ್ಕೆ ವಸತಿ ವ್ಯವಸ್ಥೆ ಮಾಡುವುದನ್ನು ರಾಷ್ಟ್ರೀಯ ಸೈಕಲ್ ಪೋಲೋ ಚಾಂಪಿಯನ್‌ಶಿಪ್‌ನ ಆಯೋಜಕರು ತಪ್ಪಿಸಿದ್ದಾರೆ. ಸಂಸ್ಥೆಯ ಕಚೇರಿ ಮತ್ತು ಇತರ ಕೊಠಡಿಗಳಲ್ಲಿ ತಾತ್ಕಾಲಿಕ ಸೌಲಭ್ಯಗಳನ್ನಷ್ಟೇ ಕೇರಳ ತಂಡಕ್ಕೆ ನೀಡಲಾಗಿತ್ತು. ಘಟನೆ ಸಂಭವಿಸಲು ಇದೇ ಕಾರಣ ಎಂದು ಇಂಡಿಯನ್ ಸೈಕಲ್ ಪೋಲೋ ತಂಡದ ಮಾಜಿ ನಾಯಕ ಪಿ. ಶಿವಕುಮಾರ್ ಆರೋಪಿಸಿದ್ದಾರೆ.

  ಗುರುವಾರ ವಿಷಾಹಾರ ಸೇವನೆಯಿಂದಾಗಿ ಫಾತಿಮಾ ನಿದಾ ವಾಕರಿಕೆ ಮತ್ತು ವಾಂತಿಯಿಂದ ಬಳಲುತ್ತಿದ್ದರು. ಹೀಗಾಗಿ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಆಕೆಯ ಆರೋಗ್ಯ ಸ್ಥಿತಿ ಹದಗೆಟ್ಟು ಚಿಕಿತ್ಸೆ ಫಲಕಾರಿಯಾಗದೇ ಆಕೆ ಮೃತಪಟ್ಟಿದ್ದಳು ಎಂದು ತಿಳಿದು ಬಂದಿದೆ.