ನವದೆಹಲಿ, ಡಿ 23 (DaijiworldNews/DB): ಮೊದಲ ಬಾರಿ ಗೆದ್ದ ಮಹಿಳಾ ಅಭ್ಯರ್ಥಿಯನ್ನು ದೆಹಲಿ ಪಾಲಿಕೆ ಗದ್ದುಗೆಗೇರಿಸಲು ಆಮ್ ಆದ್ಮಿ ಪಕ್ಷ ನಿರ್ಧರಿಸಿದೆ. ಪೂರ್ವ ಪಟೇಲ್ ನಗರ ವಾರ್ಡ್ನಿಂದ ಗೆದ್ದ ಕೌನ್ಸಿಲರ್ ಶೆಲ್ಲಿ ಒಬೆರಾಯ್ (39) ಅವರನ್ನು ದೆಹಲಿಯ ಮುನ್ಸಿಪಲ್ ಕಾರ್ಪೊರೇಷನ್ (ಎಂಸಿಡಿ) ಮೇಯರ್ ಅಭ್ಯರ್ಥಿಯಾಗಿ ಘೋಷಿಸಿದೆ.
ಎಎಪಿ ರಾಷ್ಟ್ರೀಯ ಸಂಚಾಲಕ ಮತ್ತು ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಅವರ ಅಧ್ಯಕ್ಷತೆಯಲ್ಲಿ ನಡೆದ ರಾಜಕೀಯ ವ್ಯವಹಾರಗಳ ಸಮಿತಿಯ ಸಭೆಯಲ್ಲಿ ಶೆಲ್ಲಿ ಅವರನ್ನು ಮೇಯರ್ ಅಭ್ಯರ್ಥಿಯಾಗಿ ಘೋಷಿಸಲು ತೀರ್ಮಾನಿಸಲಾಯಿತು. ಶೆಲ್ಲಿ ಅವರು ಮೊದಲ ಬಾರಿಗೆ ಗೆಲುವು ಸಾಧಿಸಿದ್ದರು. ಇನ್ನು ಉಪಮೇಯರ್ ಹುದ್ದೆಗೆ ಚಾಂದಿನಿ ಮಹಲ್ ವಾರ್ಡ್ನ ಕೌನ್ಸಿಲರ್ ಆಲೆ ಮೊಹಮ್ಮದ್ ಇಕ್ಬಾಲ್ ಅವರ ಹೆಸರನ್ನು ಪಕ್ಷದ ರಾಷ್ಟ್ರೀಯ ಕಾರ್ಯದರ್ಶಿ ಪಂಕಜ್ ಗುಪ್ತಾ ಘೋಷಿಸಿದರು.
ಸಂದರ್ಶಕ ಪ್ರಾಧ್ಯಾಪಕಿಯಾಗಿ ಸೇವೆ ಸಲ್ಲಿಸಿದ್ದ ಶೆಲ್ಲಿ ಒಬೆರಾಯ್ ಅವರು ಕಳೆದ ದೆಹಲಿ ಪಾಲಿಕೆ ಚುನಾವಣೆಗೆ ಸ್ಪರ್ಧಿಸಿ ಗೆಲುವು ಸಾಧಿಸಿದ್ದರು. ಎಎಪಿ ಶಾಸಕ ಶೋಯೆಬ್ ಇಕ್ಬಾಲ್ ಪುತ್ರ ಇಕ್ಬಾಲ್ ಉಪ ಮೇಯರ್ ಅಭ್ಯರ್ಥಿಯಾಗಿದ್ದು, ಅವರು ಎರಡನೇ ಬಾರಿಗೆ ಕೌನ್ಸಿಲರ್ ಆಗಿ ಆಯ್ಕೆಯಾಗಿದ್ದರು. ಎಂಸಿಡಿಯಲ್ಲಿ ಇದೇ ಮೊದಲ ಬಾರಿಗೆ ಮಹಿಳಾ ಕೌನ್ಸಿಲರ್ಗೆ ಮೇಯರ್ ಹುದ್ದೆ ಮೀಸಲಾಗಿದೆ.
ಇನ್ನು ಎಂಸಿಡಿಯ ಮೊದಲ ಸಭೆ ಜನವರಿ 6ರಂದು ನಡೆಯಲಿದೆ. ಇದರಲ್ಲಿ 250 ಮಂದಿ ಸದಸ್ಯರು ಪ್ರಮಾಣವಚನ ಸ್ವೀಕರಿಸಲಿದ್ದು, ಅವರು ಮೇಯರ್, ಉಪ ಮೇಯರ್ ಮತ್ತು ಸ್ಥಾಯಿ ಸಮಿತಿಗಳಿಗೆ ಆರು ಮಂದಿಯನರನು ಆಯ್ಕೆ ಮಾಡಲಿದ್ದಾರೆ. ಶ್ರೀರಾಮ ಕಾಲೋನಿಯಿಂದ ಮೊಹಮ್ಮದ್ ಅಮಿಲ್ ಮಲಿಕ್, ಫತೇ ನಗರದಿಂದ ರಮೀಂದರ್ ಕೌರ್, ಸುಂದರ್ ನಗರಿಯಿಂದ ಮೋಹಿನಿ ಜೀನ್ವಾಲ್ ಮತ್ತು ದರಿಯಾಗಂಜ್ನಿಂದ ಸಾರಿಕಾ ಚೌಧರಿಯವರ ಹೆಸರನ್ನು ಎಎಪಿಯು ಸ್ಥಾಯಿ ಸಮಿತಿಗೆ ಅಂತಿಮಗೊಳಿಸಿದೆ. ಮುಂದಿನ ಏಪ್ರಿಲ್ ತಿಂಗಳವರೆಗೆ ಮೇಯರ್ ಅಧಿಕಾರದಲ್ಲಿ ಇರಲಿದ್ದು, ಬಳಿಕ ಮತ್ತೊಮ್ಮೆ ಚುನಾವಣೆ ನಡೆಯಲಿದೆ.