ಗ್ಯಾಂಗ್ಟಾಕ್, ಡಿ 23 (DaijiworldNews/DB): ಭಾರತೀಯ ಸೇನಾ ವಾಹನವು ಉರುಳಿ ಬಿದ್ದು 16 ಮಂದಿ ಸೇನಾ ಯೋಧರು ಹುತಾತ್ಮರಾದ ಘಟನೆ ಉತ್ತರ ಸಿಕ್ಕಿಂ ಬಳಿ ನಡೆದಿದೆ. ಘಟನೆಯಲ್ಲಿ ನಾಲ್ವರು ಗಾಯಗೊಂಡಿದ್ದಾರೆ.
ವಾಹನವು ಝೀಮಾ ಮಾರ್ಗದಲ್ಲಿ ಕಡಿದಾದ ಇಳಿಜಾರಿನಲ್ಲಿ ಉರುಳಿದ ಕಾರಣ ಅಪಘಾತ ಸಂಭವಿಸಿದೆ. ಮೂರು ವಾಹನಗಳ ಬೆಂಗಾವಲು ಪಡೆಯ ಭಾಗವಾಗಿ ಚಾಟೆನ್ನಿಂದ ಥಾಂಗು ಕಡೆಗೆ ಇಂದು ಬೆಳಗ್ಗೆ ಈ ವಾಹನ ಸಂಚರಿಸುತ್ತಿತ್ತು.
ಅಪಘಾತ ಸಂಭವಿಸಿದ ಕೂಡಲೇ ರಕ್ಷಣಾ ಕಾರ್ಯಾಚರಣೆ ಕೈಗೊಳ್ಳಲಾಗಿದ್ದು, ಗಾಯಾಳು ಸೈನಿಕರನ್ನು ಆಸ್ಪತ್ರೆಗೆ ಸ್ಥಳಾಂತರಿಸಲಾಗಿದೆ. ಮೂವರು ಜೂನಿಯರ್ ಕಮಿಷನ್ಡ್ ಅಧಿಕಾರಿಗಳು ಹಾಗೂ 13 ಸೈನಿಕರು ಸೇರಿ ಒಟ್ಟು 16 ಮಂದಿ ಸೇನಾ ಯೋಧರು ಹುತಾತ್ಮರಾದರು ಎಂದು ಭಾರತೀಯ ಸೇನೆ ತಿಳಿಸಿದೆ. ಹೆಚ್ಚಿನ ಮಾಹಿತಿ ನಿರೀಕ್ಷಿಸಲಾಗುತ್ತಿದೆ.