ಲಖನೌ, ಡಿ 23 (DaijiworldNews/DB): ಮದ್ಯವ್ಯಸನಿ ಪತಿಯ ಮರಣಾನಂತರ ಹೆಗಲ ಮೇಲಿದ್ದ ಮಕ್ಕಳ ಜವಾಬ್ದಾರಿ ನಿರ್ವಹಿಸಲು ದಾರಿ ಹುಡುಕಿದ ಮಹಿಳೆಯೊಬ್ಬರು ಸರ್ಕಾರಿ ಬಸ್ನಲ್ಲಿ ಚಾಲಕಿಯಾಗಿ ಜೀವನ ನೊಗವನ್ನು ಸಮರ್ಥವಾಗಿ ಮುನ್ನಡೆಸುತ್ತಿದ್ದಾರೆ. ಅಲ್ಲದೆ ಉತ್ತರ ಪ್ರದೇಶದ ಮೊದಲ ಮಹಿಳಾ ಬಸ್ ಚಾಲಕಿ ಎಂಬ ಖ್ಯಾತಿಗೆ ಪಾತ್ರರಾಗಿದ್ದಾರೆ.
ಪ್ರಿಯಾಂಕಾ ಶರ್ಮಾ ಎಂಬಾಕೆಯೇ ಚಾಲಕಿಯಾಗಿ ಬಸ್ ಮುನ್ನಡೆಸುತ್ತಿರುವವರು. ಉತ್ತರ ಪ್ರದೇಶ ಸರ್ಕಾರದಿಂದ ನೇಮಕವಾದ 26 ಸರ್ಕಾರಿ ಮಹಿಳಾ ಬಸ್ ಚಾಲಕಿಯರಲ್ಲಿ ಶರ್ಮಾ ಮೊದಲ ಸ್ಥಾನದಲ್ಲಿದ್ದಾರೆ. ಈ ಉದ್ಯೋಗ ಪಡೆಯುವಲ್ಲಿ ಶರ್ಮಾ ಸವೆದ ದಾರಿ ಕಠಿಣವಾಗಿತ್ತು. ಆದರೆ ಛಲಬಿಡದ ಅಡೆತಡೆ ಮೆಟ್ಟಿನಿಂತು ಸಾಧಿಸುವ ಮೂಲಕ ಇತರರರಿಗೆ ಸ್ಪೂರ್ತಿಯಾಗಿದ್ದಾರೆ.
ಪ್ರಿಯಾಂಕಾ ಅವರ ಪತಿ ಅತಿಯಾದ ಮದ್ಯವ್ಯಸನಿಯಾಗಿದ್ದು, ವಿವಾಹವಾದ ಕೆಲವೇ ವರ್ಷಗಳಲ್ಲಿ ಕುಡಿತದಿಂದಾಗಿ ಸಾವನ್ನಪ್ಪಿದ್ದರು. ಪತಿಯ ಸಾವಿನಿಂದ ಇಬ್ಬರು ಮಕ್ಕಳ ಸಂಪೂರ್ಣ ಜವಾಬ್ದಾರಿ ಪ್ರಿಯಾಂಕಾ ಅವರ ಮೇಲಿತ್ತು. ಆದರೆ ಬಡ ಕುಟುಂಬದವರಾದ ಅವರಿಗೆ ಹಣ ಹೊಂದಿಸುವುದೇ ಸವಾಲಾಗಿತ್ತು. ಜೀವನದ ನೊಗ ಸಾಗಿಸುವ ದಾರಿ ತಿಳಿಯದೆ ಹೈರಾಣಾಗಿದ್ದ ಪ್ರಿಯಾಂಕಾ ಅವಕಾಶ ಹುಡುಕಿ ರಾಷ್ಟ್ರ ರಾಜಧಾನಿಗೆ ವಾಸ ಬದಲಿಸಿದ್ದರು. ಅಲ್ಲಿ ಕಾರ್ಖಾನೆಯೊಂದರಲ್ಲಿ ಸಹಾಯಕಳಾಗಿ ಕೆಲಸಕ್ಕೆ ಸೇರಿಕೊಂಡು ಬಳಿಕ ಚಾಲನಾ ತರಬೇತಿಯನ್ನೂ ಪಡೆದುಕೊಂಡರು. ತರಬೇತಿ ಮುಗಿಯುತ್ತಿದ್ದಂತೆ ಮುಂಬೈಗೆ ಸ್ಥಳಾಂತರಗೊಂಡರು. ಮುಂಬೈ, ಪಶ್ಚಿಮ ಬಂಗಾಳ, ಅಸ್ಸಾಂ ಸೇರಿದಂತೆ ವಿವಿಧೆಡೆ ಹೋಗಿ ಚಾಲಕಿಯಾಗಿ ಕೆಲಸ ಮಾಡಿದರು.
ಇನ್ನು 2020ರಲ್ಲಿ ಸರ್ಕಾರಿ ಬಸ್ಗಳಿಗೆ ಮಹಿಳಾ ಚಾಲಕರ ನೇಮಕಾತಿಗೆ ಉತ್ತರ ಪ್ರದೇಶ ಸರ್ಕಾರ ಅರ್ಜಿ ಆಹ್ವಾನಿಸಿತ್ತು. ಅವಕಾಶಗಳ ಹುಡುಕಾಟದಲ್ಲಿದ್ದ ಪ್ರಿಯಾಂಕಾ ಅವರೂ ಅರ್ಜಿ ಸಲ್ಲಿಸಿದ್ದರು. 2022ರಲ್ಲಿ ನೇಮಕಾತಿ ಆದೇಶ ಪ್ರಿಯಾಂಕಾ ಕೈ ಸೇರಿತು. ಕಳೆದ ಮೇ ತಿಂಗಳಲ್ಲಿ ತರಬೇತಿ ಪಡೆದು, ಸೆಪ್ಟಂಬರ್ನಲ್ಲಿ ಪೋಸ್ಟಿಂಗ್ ಪಡೆದುಕೊಂಡರು. ಇದೀಗ ಯಶಸ್ವಿಯಾಗಿ ಬಸ್ ಚಲಾಯಿಸುವುದರೊಂದಿಗೆ ಬದುಕಿನ ಪಯಣಕ್ಕೆ ಹೊಸ ದಾರಿ ಕಂಡುಕೊಂಡ ಉತ್ಸಾಹದಲ್ಲಿ ಅವರಿದ್ದಾರೆ.