ಬಸ್ತಿ, ಡಿ 22 (DaijiworldNews/DB): ಸಾರ್ವಜನಿಕ ಶೌಚಾಲಯವೊಂದರ ಒಂದೇ ಕೋಣೆಯಲ್ಲಿ ಅಡ್ಡಗೋಡೆ ನಿರ್ಮಿಸದೆ ಎರಡು ಶೌಚಾಸನಗಳನ್ನು ಹಾಕಿರುವ ವಿಚಿತ್ರ ಪ್ರಸಂಗ ಉತ್ತರಪ್ರದೇಶದಲ್ಲಿ ನಡೆದಿದ್ದು, ಇದರ ಚಿತ್ರ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಬಸ್ತಿ ಜಿಲ್ಲೆಯ ಗೌರಾ ಧುಂಢ ಗ್ರಾಮದ ಸಾರ್ವಜನಿಕ ಶೌಚಾಲಯದಲ್ಲಿ ಈ ರೀತಿ ಒಂದೆ ಕೊಠಡಿಯಲ್ಲಿ ಎರಡು ಶೌಚಾಸನಗಳನ್ನು ಒಟ್ಟಿಗೇ ಅಳವಡಿಸಲಾಗಿದೆ. 'ಮರ್ಯಾದಾ ಮನೆ' (ಇಜ್ಜತ್ ಘರ್) ಎಂಬ ಹೆಸರಿನಲ್ಲಿ ಈ ಶೌಚಾಲಯ ನಿರ್ಮಾಣಗೊಂಡಿದ್ದು, ಒಟ್ಟು 10 ಲಕ್ಷ ರೂ. ವೆಚ್ಚದಲ್ಲಿ ಶೌಚಾಲಯ ಸಂಕೀರ್ಣವನ್ನು ನಿರ್ಮಿಸಲಾಗಿದೆ. ಇನ್ನು ಇಷ್ಟು ಹಣವನ್ನು ವ್ಯಯಿಸಿದರೂ, ಕೆಲವು ಕೊಠಡಿಗಳಿಗೆ ಬಾಗಿಲುಗಳನ್ನೇ ನಿರ್ಮಿಸಿಲ್ಲ ಎಂದು ಬಳಕೆದಾರರು ಆರೋಪಿಸಿದ್ದಾರೆ.
ಇನ್ನು ಶೌಚಾಸನಗಳ ಚಿತ್ರ ವೈರಲ್ ಆಗಿರುವ ಬೆನ್ನಲ್ಲೇ ಜಿಲ್ಲಾಡಳಿತ ಪ್ರತಿಕ್ರಿಯಿಸಿ, ಈ ಸಂಬಂಧ ತನಿಖೆ ನಡೆಸಲಾಗುತ್ತಿದೆ. ಬಾಗಿಲು ಅಳವಡಿಸದಿರುವ ಬಗ್ಗೆ ಮತ್ತು ಅಡ್ಡಗೋಡೆ ನಿರ್ಮಿಸದೆ ಶೌಚಾಸನಗಳನ್ನು ಒಟ್ಟಿಗೇ ಅಳವಡಿಸಿರುವ ಬಗ್ಗೆ ಸಂಬಂಧಪಟ್ಟ ಪ್ರಾಧಿಕಾರದಿಂದ ಸ್ಪಷ್ಟನೆ ಕೋರಲಾಗಿದೆ ಎಂದು ತಿಳಿಸಿದೆ.