ಎನ್ ಪಿ ಎಸ್ ವಿರುದ್ಧ ಪ್ರತಿಭಟನೆ-ಸರ್ಕಾರಿ ಉದ್ಯೋಗಿಗಳು ಪಾಲ್ಗೊಂಡರೆ ಶಿಸ್ತುಕ್ರಮ-ಕೇಂದ್ರ ಸರಕಾರ ಎಚ್ಚರಿಕೆ!

•   Thu, Mar 07 2019 12:20:06 AM



• ನವದೆಹಲಿ,ಮಾ.07(AZM):ಮಾರ್ಚ್ 13ರಂದು ನೂತನ ಪಿಂಚಣಿ ಯೋಜನೆಯ ವಿರುದ್ಧ ಪ್ರತಿಭಟನೆ ನಡೆಯಲಾಗುತ್ತದೆ ಎನ್ನಲಾಗಿದ್ದು, ಈ ಪ್ರತಿಭಟನೆಯಲ್ಲಿ ಸರಕಾರಿ ಉದ್ಯೋಗಿಗಳು ಪಾಲ್ಗೊಳ್ಳುವುದನ್ನು ಕೇಂದ್ರ ಸರಕಾರ ನಿಷೇಧಿಸಿದೆ.

  

  ನ್ಯಾಶನಲ್ ಜಾಯಿಂಟ್ ಕೌನ್ಸಿಲ್ ಆಫ್ ಆಯಕ್ಷನ್ ನೂತನ ಪಿಂಚಣಿ ಯೋಜನೆ ವಿರುದ್ಧ ಮಾರ್ಚ್ 13ರಂದು ದೇಶಾದ್ಯಂತ ಪ್ರತಿಭಟನೆ ನಡೆಸಲಿರುವುದು ಸಚಿವಾಲಯದ ಗಮನಕ್ಕೆ ಬಂದಿದ್ದು,ಪ್ರತಿಭಟನೆ ರೂಪದ ಯಾವುದೇ ಕ್ರಮಗಳನ್ನು ಕೈಗೊಳ್ಳುವುದು ಸಹಿತ ಯಾವುದೇ ಮಾದರಿಯ ಮುಷ್ಕರದಲ್ಲಿ ಸರಕಾರಿ ಉದ್ಯೋಗಿಗಳು ಪಾಲ್ಗೊಳ್ಳುವುದನ್ನು ನಿಷೇಧಿಸಲಾಗಿದೆ. ಯಾವುದೇ ಉದ್ಯೋಗಿಗಳು ಮುಷ್ಕರದಲ್ಲಿ ಪಾಲ್ಗೊಂಡರೆ, ವೇತನ ಕಡಿತ, ಶಿಸ್ತು ಕ್ರಮ ಒಳಗೊಂಡಂತೆ ಪರಿಣಾಮಗಳನ್ನು ಎದುರಿಸಬೇಕಾಗುತ್ತದೆ.

  ಪ್ರಸ್ತಾಪಿತ ಮುಷ್ಕರದ ಅವಧಿಯಲ್ಲಿ ಕ್ಯಾಶುವಲ್ ರಜೆ ಅಥವಾ ಇತರ ಯಾವುದೇ ರಜೆ ನೀಡಬೇಡಿ ಹಾಗೂ ಆಸಕ್ತ ಉದ್ಯೋಗಿಗಳು ಯಾವುದೇ ಅಡಚಣೆ ಇಲ್ಲದೆ ಕಚೇರಿಯ ಆವರಣಕ್ಕೆ ಪ್ರವೇಶಿಸಲು ಅವಕಾಶ ನೀಡಿ ಎಂದು ಎಲ್ಲ ಅಧಿಕಾರಿಗಳಿಗೆ ಆದೇಶದಲ್ಲಿ ಸೂಚಿಸಲಾಗಿದೆ. ಮುಷ್ಕರಕ್ಕೆ ತೆರಳುವ ಉದ್ಯೋಗಿಗಳ ಬಗೆಗಿನ ವರದಿಯನ್ನು ಎಲ್ಲ ವಿಭಾಗೀಯ ಮುಖ್ಯಸ್ಥರಿಂದ ಕೋರಲಾಗಿದೆ. ಮುಷ್ಕರದ ದಿನ ಹಾಜರಾಗದ ಉದ್ಯೋಗಿಗಳ ಸಂಖ್ಯೆ ಹಾಗೂ ವಿವರಗಳ ವರದಿ ಸಲ್ಲಿಸಲು ಅವರಿಗೆ ಸೂಚಿಸಲಾಗಿದೆ ಎಂದು ಸಚಿವಾಲಯ ತಿಳಿಸಿದೆ.