ಕನ್ಯಾಕುಮಾರಿ, ಡಿ 22 (DaijiworldNews/DB): ಒಂದೆರಡು ಕೆಜಿ ತೂಗುವ ಗೆಣಸುಗಳನ್ನು ನೋಡಿದ್ದೇವೆ. ಆದರೆ ಇಲ್ಲೊಬ್ಬ ಕೃಷಿಕ ಬರೋಬ್ಬರಿ ದೈತ್ಯಾಕಾರದ ಗೆಣಸು ಬೆಳೆದಿದ್ದಾರೆ. ಇದರ ಒಟ್ಟು ತೂಕ 60 ಕೆಜಿ!
ತಮಿಳುನಾಡಿನ ಕನ್ಯಾಕುಮಾರಿ ಜಿಲ್ಲೆಯ ವರ್ಕಿಝಾಂಬಿ ಕಲ್ಲಂಗುಝಿ ಪ್ರದೇಶದ 72ರ ಹರೆಯದ ವಿಲ್ಸನ್ ಅವರೇ ತಮ್ಮ ಕೃಷಿ ತೋಟದಲ್ಲಿ ಬೃಹದಾಕಾರದ ಗೆಣಸು ಬೆಳೆದವರು. ಜಂಬೂ ಗೆಣಸು ಇದಾಗಿದ್ದು, ಇದು ಅವರ ಶ್ರಮದ ಪ್ರತಿಫಲವಾಗಿದೆ.
ಒಂದು ಸಸ್ಯದಲ್ಲಿ ದೈತ್ಯಾಕಾರದ 60 ಕೆಜಿ ಗೆಣಸು ಮತ್ತೊಂದು ಸಸ್ಯದಲ್ಲಿ 55 ಕೆಜಿ ಗೆಣಸು ಅವರ ಕೃಷಿ ತೋಟದಲ್ಲಿ ಸಿಕ್ಕಿದೆ. ಇನ್ನು ಈ ಬೃಹತ್ ಗಾತ್ರದ ಗೆಣಸುಗಳನ್ನು ನೋಡಿ ಜನರೇ ದಂಗಾಗಿದ್ದಾರೆ. ಈ ಹಿಂದೆ ಕೇರಳದ ರೈತರೊಬ್ಬರು ದೈತ್ಯಾಕಾರದ 45 ಕೆಜಿ ಗೆಣಸು ಬೆಳೆದು ಸುದ್ದಿಯಾಗಿದ್ದರು. ಆ ವಿಚಾರ ಅರಿತ ವಿಲ್ಸನ್ ಅವರ ದಾಖಲೆಯನ್ನು ಮುರಿಯುವ ಪ್ರಯತ್ನದಲ್ಲಿ ಸಿಹಿಗೆಣಸು ಬೆಳೆಸಲು ಆರಂಭಿಸಿ ಇದೀಗ ಕೊಯ್ಲು ಮಾಡಿದ್ದಾರೆ.
ಪ್ರಾದೇಶಿಕ ಅಭಿವೃದ್ಧಿ ಅಧಿಕಾರಿಯಾಗಿದ್ದ ವಿಲ್ಸನ್ ನಿವೃತ್ತರಾದ ಬಳಿಕ ಕೃಷಿಯೊಂದಿಗೆ ಸಮಯ ಕಳೆಯುತ್ತಿದ್ದಾರೆ. ಗೆಣಸು ಮಾತ್ರವಲ್ಲದೆ, ಬಾಳೆ, ತೆಂಗು ಮತ್ತಿತರ ಬೆಳಗಳನ್ನೂ ಬೆಳೆಸುತ್ತಿದ್ದಾರೆ. ಇನ್ನು ತಾವು ಬೆಳೆದ ಗೆಣಸನ್ನು ದಾಖಲೆ ಪಟ್ಟಿಯಲ್ಲಿ ಸೇರಿಸುವಂತೆ ತಮಿಳುನಾಡು ತೋಟಗಾರಿಕಾ ಇಲಾಖೆ ಅಧಿಕಾರಿಗಳಲ್ಲಿ ಅವರು ವಿನಂತಿಸಿಕೊಂಡಿದ್ದಾರೆ ಎನ್ನಲಾಗಿದೆ.