ಆಗ್ರಾ, ಡಿ 20 (DaijiworldNews/DB): ಪ್ರಣಯ ಪಕ್ಷಿಗಳನ್ನು ತನ್ನತ್ತ ಆಕರ್ಷಿಸುವ ಪ್ರೇಮದ ಸಂಕೇತ ಐತಿಹಾಸಿಕ ತಾಜ್ ಮಹಲ್ಗೆ ಇದೀಗ ತೆರಿಗೆ ಸಂಕಷ್ಟ ಎದುರಾಗಿದೆ. ಕೋಟ್ಯಾಂತರ ರೂ. ಮನೆ ತೆರಿಗೆ ಬಾಕಿ ಪಾವತಿ ಮಾಡದಿದ್ದಲ್ಲಿ ತಾಜ್ ಮಹಲ್ನ್ನು ಸೀಜ್ ಮಾಡುವುದಾಗಿ ಆಗ್ರಾ ಪುರಸಭೆ ಅಧಿಕಾರಿಗಳು ನೋಟಿಸ್ ಜಾರಿ ಮಾಡಿದ್ದಾರೆ.
1.9 ಕೋಟಿ ರೂ. ನೀರಿನ ತೆರಿಗೆ, 1.5 ಲಕ್ಷ ರೂ. ಆಸ್ತಿ ತೆರಿಗೆಯನ್ನು ಪಾವತಿಸಬೇಕು. ಮುಂದಿನ 15 ದಿನದೊಳಗೆ ಬಾಕಿ ಹಣವನ್ನು ಪಾವತಿ ಮಾಡದೇ ಇದ್ದಲ್ಲಿ ತಾಜ್ ಮಹಲ್ನ್ನು ಸೀಜ್ ಮಾಡಲಾಗುವುದು ಎಂದು ನೋಟಿಸ್ನಲ್ಲಿ ತಿಳಿಸಲಾಗಿದೆ.
ಆದರೆ ಪುರಸಭೆಯ ಈ ನೋಟಿಸ್ ನೋಡಿ ಪುರಾತತ್ವ ಸರ್ವೇಕ್ಷಣಾ ಇಲಾಖೆ ಅಧಿಕಾರಿಗಳಿಗೆ ಆಶ್ಚರ್ಯವಾಗಿದೆ. ಐತಿಹಾಸಿಕ ಹಾಗೂ ಕಲಾತ್ಮಕ ಕಟ್ಟಡವಾಗಿರುವ ತಾಜ್ ಮಹಲ್ಗೆ ಮನೆ ತೆರಿಗೆ ಕಟ್ಟುವುದಕ್ಕೆ ಇಲ್ಲ. ಹೀಗಿರುವಾಗ ಮನೆ ತೆರಿಗೆ ಕಟ್ಟುವುದಕ್ಕೆ ನೋಟಿಸ್ ನೀಡಿರುವುದಕ್ಕೆ ಕಾರಣವೇನು ಎಂದು ಅಚ್ಚರಿಗೊಂಡಿದ್ದಾರೆ. ಇದೇ ಮೊದಲು ಈ ರೀತಿ ನೋಟಿಸ್ ಬಂದಿದೆ ಎಂದು ಎಎಸ್ಐ ಸೂಪರಿಂಟೆಂಡೆಂಟ್ ರಾಜ್ಕುಮಾರ್ ಪಟೇಲ್ ಹೇಳಿದ್ದಾರೆ.
ಇಡೀ ದೇಶದಲ್ಲಿ ಐತಿಹಾಸಿಕ ಸ್ಮಾರಕಗಳಿಗೆ ತೆರಿಗೆ ಕಟ್ಟುವ ಪದ್ದತಿ ಇಲ್ಲ. ಆದರೆ ತಾಜ್ಮಹಲ್ಗೆ ನೋಟಿಸ್ ನೀಡಿರುವುದು ಅಧಿಕಾರಿಗಳ ತಪ್ಪಿನಿಂದ ಆಗಿದೆ ಎಂದವರು ಇದೇ ವೇಳೆ ತಿಳಿಸಿದ್ದಾರೆ.