ಆಗ್ರಾ, ಡಿ 20 (DaijiworldNews/DB): ಸಾಮಾಜಿಕ ಮಾಧ್ಯಮಗಳು ಅದೆಷ್ಟೋ ಕುಟುಂಬಗಳನ್ನು ಬೆಸೆದ ಉದಾಹರಣೆಗಳಿವೆ. ಇದಕ್ಕೆ ಪೂರಕವೆಂಬಂತೆ ಪರೀಕ್ಷೆಯಲ್ಲಿ ಕಡಿಮೆ ಅಂಕ ಬಂದಿದ್ದಕ್ಕೆ ಮನೆ ಬಿಟ್ಟು ಹೋದ ಸಹೋದರಿಯರಿಬ್ಬರೊಂದಿಗೆ ಸಾಮಾಜಿಕ ತಾಣದಲ್ಲೇ ಚಾಟಿಂಗ್ ನಡೆಸಿ ಪೊಲೀಸರು ಉಪಾಯವಾಗಿ ಅವರನ್ನು ಮರಳಿ ಹೆತ್ತವರೊಂದಿಗೆ ಸೇರಿಸಿದ್ದಾರೆ.
12ನೇ ತರಗತಿ ಮತ್ತು 10ನೇ ತರಗತಿಯಲ್ಲಿ ಓದುತ್ತಿರುವ ಸಹೋದರಿಯರಿಬ್ಬರು ಡಿಸೆಂಬರ್ 16ರಂದು ಬೆಳಗ್ಗೆ 7.30ಕ್ಕೆ ಶಾಲೆಗೆ ಹೋದವರು ವಾಪಾಸ್ ಬಂದಿರಲಿಲ್ಲ. ಇದರಿಂದ ಆತಂಕಕ್ಕೊಳಗಾದ ಪೋಷಕರು ಪೊಲೀಸ್ ಠಾಣೆಗೆ ದೂರು ನೀಡಿದ್ದರು. ದೂರಿನ ಆಧಾರದಲ್ಲಿ ಸಹೋದರಿಯರ ಪತ್ತೆಗೆ ಮುಂದಾದ ಪೊಲೀಸರು ಸಿಸಿಟಿವಿ ಮತ್ತು ಇಬ್ಬರ ಸಾಮಾಜಿಕ ತಾಣ ಖಾತೆಗಳನ್ನು ಪರಿಶೀಲಿಸಿದ್ದಾರೆ. ಬಳಿಕ ಹಿರಿಯ ಸಹೋದರಿಯ ಸಾಮಾಜಿಕ ತಾಣ ಖಾತೆ ಇರುವುದು ಗೊತ್ತಾದ ಕೂಡಲೇ ಅವರ ಸಂಬಂಧಿಕರೊಬ್ಬರ ಸಾಮಾಜಿಕ ತಾಣದ ಖಾತೆಯಿಂದ ಹಿರಿಯ ಸಹೋದರಿಯೊಂದಿಗೆ ಚಾಟ್ ಮಾಡಲು ಆರಂಭಿಸಿದ್ದಾರೆ.
ಪೊಲೀಸರು ಎಂಬುದು ತಿಳಿಯದೆ ಸಂಬಂಧಿಯೆಂದೇ ಆಕೆ ಪ್ರತಿಕ್ರಿಯೆ ನೀಡಿದ್ದಾಳೆ. ಬಳಿಕ ಸಂಪರ್ಕ ಸಂಖ್ಯೆ ಕಳುಹಿಸಿ ಹಣಕಾಸಿನ ನೆರವು ನೀಡುವುದಾಗಿ ತಿಳಿಸಲಾಯಿತು. ಇಬ್ಬರೂ ಉತ್ತರಾಖಂಡದ ರಿಷಿಕೇಶದಲ್ಲಿರುವುದು ಗೊತ್ತಾದ ಬಳಿಕ ಹಣ ಪಡೆದುಕೊಳ್ಳಲು ಮೀರತ್ಗೆ ಬರುವಂತೆ ಹೇಳಲಾಯಿತು. ಇದಕ್ಕೆ ಒಪ್ಪಿದ ಇಬ್ಬರೂ ಸಹೋದರಿಯರು ಪೊಲೀಸರು ತಿಳಿಸಿದಂತೆ ಮೀರತ್ ಕಡೆಗೆ ಬರುತ್ತಿದ್ದಾಗ ಇಬ್ಬರನ್ನೂ ಪತ್ತೆ ಹಚ್ಚಿ ಪೊಲೀಸರು ಕರೆ ತಂದಿದ್ದಾರೆ ಎಂದು ಉಪ ಪೊಲೀಸ್ ಆಯುಕ್ತ (ಪಶ್ಚಿಮ) ಸತ್ಯಜೀತ್ ಗುಪ್ತಾ ಹೇಳಿದ್ದಾರೆ.
ಬಳಿಕ ಬಾಲಕಿಯರನ್ನು ಪೋಷಕರಿಗೆ ಒಪ್ಪಿಸಲಾಯಿತು. ಪರೀಕ್ಷೆಯಲ್ಲಿ ಕಡಿಮೆ ಅಂಕ ಬಂದಿದ್ದಕ್ಕೆ ಮನೆ ಬಿಟ್ಟು ಹೋಗಿರುವುದಾಗಿ ಇಬ್ಬರೂ ಪೊಲೀಸರೆದುರು ಈ ವೇಳೆ ಹೇಳಿಕೊಂಡಿದ್ದಾರೆ. ಇನ್ನು ಹಿರಿಯಾಕೆ ತನ್ನ ಸಾಮಾಜಿಕ ಮಾಧ್ಯಮ ಖಾತೆಯಲ್ಲಿ ಐಪಿಎಸ್ ಅಧಿಕಾರಿಯಾಗುವ ಇಂಗಿತವನ್ನು ಬರೆದುಕೊಂಡಿದ್ದಳು ಎಂದು ಗುಪ್ತಾ ತಿಳಿಸಿದರು.