ಮಹಾರಾಷ್ಟ್ರ, ಡಿ 19 (DaijiworldNews/DB): ಮೌಂಟ್ ಎವರೆಸ್ಟ್ ಏರುವ ಹಲವರ ಕನಸು ಕನಸಾಗಿಯೇ ಉಳಿಯುತ್ತದೆ. ಆದರೆ ಜೀವನದಲ್ಲಿ ಒಂದು ಬಾರಿ ಮೌಂಟ್ ಎವರೆಸ್ಟ್ ಶಿಖರ ನೋಡಲೇಬೇಕೆಂದು ಶಪಥ ಮಾಡಿದ ವೃದ್ದ ದಂಪತಿ ಬದುಕಿನ ಸಂಧ್ಯಾ ಕಾಲದಲ್ಲಿ ಅದನ್ನು ನನಸಾಗಿಸಿಕೊಂಡಿದ್ದಾರೆ.
ಮಹಾರಾಷ್ಟ್ರದ ವೃದ್ದ ದಂಪತಿಯೊಂದು ವಿಶ್ವದ ಅತಿ ಎತ್ತರದ ಮೌಂಟ್ ಎವರೆಸ್ಟ್ ಶಿಖರವನ್ನು ಅತೀ ಹತ್ತಿರದಿಂದ ಕಣ್ತುಂಬಿಕೊಂಡಿದ್ದಾರೆ. ಆ ಮೂಲಕ ಜೀವಮಾನದ ಕನಸು ನನಸಾದ ಖುಷಿಯಲ್ಲಿದ್ದಾರೆ.
ವೃದ್ದ ದಂಪತಿಯು ಶಿಖರ ಏರುವ ವೀಡಿಯೋವನ್ನು ಆಂಡಿ ಥಾಪಾ ಎಂಬವರು ತಮ್ಮ ಇನ್ಸ್ಟಾಗ್ರಾಂನಲ್ಲಿ ಪೋಸ್ಟ್ ಮಾಡಿದ್ದಾರೆ. ಇದರಲ್ಲಿ ವೃದ್ದೆಯು ಸುಮಾರು 85 ವರ್ಷದ ತನ್ನ ಪತಿಗೆ ಶಿಖರ ಏರಲು ಸಹಾಯ ಮಾಡುವುದನ್ನು ಕಾಣಬಹುದು. ವಾಕಿಂಗ್ ಸ್ಟಿಕ್ ಹಿಡಿದು ವೃದ್ದ ದಂಪತಿ ಶಿಖರ ಏರುತ್ತಾ ಮೇಲೇರಲಾಗದಿದ್ದರೂ, ಸನಿಹದಿಂದ ಮೌಂಟ್ ಎವರೆಸ್ಟ್ನ್ನು ಕಣ್ತುಂಬಿಕೊಂಡಿದ್ದಾರೆ. ಇನ್ನು ಈ ವೀಡಿಯೋ ಅಕ್ಟೋಬರ್ 16ರಂದು ಪೋಸ್ಟ್ ಆಗಿದ್ದು, ಹಲವರು ವೃದ್ದ ದಂಪತಿಯ ಸಾಹಸಕ್ಕೆ ಮನಸೋತಿದ್ದಾರೆ.