ದೌಸಾ, ಡಿ 19 (DaijiworldNews/DB): ಒಂದು ಕೈಯಲ್ಲಿ ಊರುಗೋಲು, ಮತ್ತೊಂದು ಕೈಯಲ್ಲಿ ತ್ರಿವರ್ಣ ಧ್ವಜ ಹಿಡಿದು ಮಧ್ಯಪ್ರದೇಶದ ಉಜ್ಜೈನ್ ನಿಂದ ಜಮ್ಮು ಮತ್ತು ಕಾಶ್ಮೀರದ ಲಾಲ್ಚೌಕ್ವರೆಗೆ ನಡೆಯುತ್ತಿದ್ದಾರೆ 88ರ ಹರೆಯದ ಈ ತಾತ. ಆ ಮೂಲಕ ವಯಸ್ಸು ಕೇವಲ ಸಂಖ್ಯೆ ಎಂಬುದನ್ನು ನಿರೂಪಿಸಿದ್ದಾರೆ.
88ರ ವಯೋವೃದ್ಧ ಕರುಣಾ ಪ್ರಸಾದ್ ಮಿಶ್ರಾ ಅವರೇ ಉಜ್ಜೈನ್ ನಿಂದ ಜಮ್ಮು ಮತ್ತು ಕಾಶ್ಮೀರದ ಲಾಲ್ಚೌಕ್ವರೆಗೆ ಹೆಜ್ಜೆ ಹಾಕಿದವರು. ಅಷ್ಟಕ್ಕೂ ಅವರು ಇಷ್ಟೊಂದು ದೂರ ಕ್ರಮಿಸಿರುವುದು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ನೇತೃತ್ವದಲ್ಲಿ ನಡೆಯುತ್ತಿರುವ ಭಾರತ್ ಜೋಡೋ ಯಾತ್ರೆಯಲ್ಲಿ. ಯುವಕರನ್ನೇ ನಾಚಿಸುವಂತೆ ಕರುಣಾ ಪ್ರಸಾದ್ ಅವರು ಹೆಜ್ಜೆ ಹಾಕಿದ್ದಾರೆ. ಭಾರತ್ ಜೋಡೋ ಯಾತ್ರೆ ಮಧ್ಯಪ್ರದೇಶದಲ್ಲಿ ಸಾಗಿದಾಗ ಯಾತ್ರೆಯೊಂದಿಗೆ ಸೇರಿಕೊಂಡ ಮಿಶ್ರಾ ಅವರು ತಮ್ಮ ನಡಿಗೆಯನ್ನು ಇನ್ನೂ ನಿಲ್ಲಿಸದೆ ಹೆಜ್ಜೆ ಹಾಕುತ್ತಲೇ ಇದ್ದಾರೆ.
ಇನ್ನು ಇಳಿ ವಯಸ್ಸಿನಲ್ಲಿ ಇಷ್ಟೊಂದು ದೂರ ಕ್ರಮಿಸುತ್ತಿರುವ ಮಿಶ್ರಾ ಅವರನ್ನು ಮಾತನಾಡಿಸಿದಾಗ, ಕಾರಲ್ಲಿ ಕುಳಿತುಕೊಳ್ಳಿ ಎಂದು ಹಲವು ಕಾರ್ಯಕರ್ತರು ನನಗೆ ಸಲಹೆ ಮಾಡಿದರು. ಆದರೆ ನಾನು ಕಾಶ್ಮೀರದವರೆಗೂ ಯಾತ್ರೆಯಲ್ಲಿ ಪಾಲ್ಗೊಳ್ಳುತ್ತೇನೆಂದು ಉಜ್ಜೈನ್ ಮಹಾಕಾಲೇಶ್ವರ ದೇವಸ್ಥಾನದಲ್ಲಿ ಶಪಥ ಮಾಡಿದ್ದೇನೆ. ಲಾಲ್ಚೌಕ್ನಲ್ಲಿ ತ್ರಿವರ್ಣ ಧ್ವಜ ಹಾರಿಸುವವರೆಗೂ ನಾನು ನಡೆಯುತ್ತೇನೆ. ಬಳಿಕ ಪೂರ್ವದಿಂದ ಪಶ್ಚಿಮಕ್ಕೆ ಯಾತ್ರೆ ನಡೆಸುವ ಸಂಕಲ್ಪವನ್ನೂ ಮಾಡುತ್ತೇನೆ ಎಂದಿದ್ದಾರೆ.
1960ರಿಂದಲೂ ಪಕ್ಷದಲ್ಲಿ ಸಕ್ರಿಯನಾಗಿರುವ ನಾನು ಕಾಂಗ್ರೆಸ್ನ ಹಳೆಯ ಯುದ್ದ ಕುದುರೆ. 1935-36ರಲ್ಲಿ ಜಬಲ್ಪುರದಿಂದ ಅಲಹಾಬಾದ್ವರೆಗೆ ಗಾಂಧೀಜಿಯವರೊಂದಿಗೆ ನಡೆದಿದ್ದೇನೆ. ನೆಹರೂ, ವಿನೋಬಾ ಭಾವೆ ಅವರೊಂದಿಗೂ ನಡಿಗೆಯಲ್ಲಿ ಪಾಲ್ಗೊಂಡಿದ್ದೇನೆ. ನನಗೆ ನಡೆದು ಅಭ್ಯಾಸವಿದೆ ಎಂದು ಇದೇ ವೇಳೆ ಅವರು ತಮ್ಮ ಹುಮ್ಮಸ್ಸಿನ ಹಿಂದಿನ ಕತೆಯನ್ನು ವಿವರಿಸಿದರು.