ಮೆಹುಲ್ ಚೋಕ್ಸಿ ವಿರುದ್ದ ಮೂರು ಹೊಸ ಎಫ್‌ಐಆರ್‌

•   Sun, Dec 18 2022 11:44:47 AM



• ನವದೆಹಲಿ, ಡಿ 18( DaijiworldNews/MS): 6,748 ಕೋಟಿ ರೂ.ಗಳನ್ನು 40 ಬ್ಯಾಂಕುಗಳಿಗೆ ವಂಚಿಸಿದ ಆರೋಪದ ಅನ್ವಯ ವಜ್ರದ ವ್ಯಾಪಾರಿ ಮೆಹುಲ್‌ ಚೋಕ್ಸಿ ವಿರುದ್ಧ ಸಿಬಿಐ ಮೂರು ಹೊಸ ಎಫ್‌ಐಆರ್‌ಗಳನ್ನು ದಾಖಲಿಸಿದೆ.

  2010ರಿಂದ 2018ರ ವರೆಗೆ ನಡೆದ ಹಗರಣವನ್ನು ಪತ್ತೆ ಮಾಡುವಲ್ಲಿ ವಿಫಲವಾದ ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌(ಪಿಎನ್‌ಪಿ) , ಕಳೆದ ಮಾರ್ಚ್ 21ರಂದು ಮೂರು ದೂರು ದಾಖಲಿಸಿತ್ತು. ಇದರಲ್ಲಿ ಮೆಹುಲ್ ಚೋಕ್ಸಿ ಮತ್ತು ಅವರ ಗೀತಾಂಜಲಿ ಜೆಮ್ಸ್ ಲಿಮಿಟೆಡ್, ನಕ್ಷತ್ರ ಬ್ರ್ಯಾಂಡ್ಸ್ ಲಿ. ಹಾಗೂ ಗಿಲಿ ಇಂಡಿಯಾ ಲಿ. ಗಳಿಂದ ಆದ ಹೆಚ್ಚು ನಷ್ಟವಾಗಿದೆ ಎಂದು ವರದಿಯಾಗಿತ್ತು.

  ಪಿಎನ್‌ಪಿಗೆ ಸುಮಾರು 13,000 ಕೋಟಿ ರೂ. ವಂಚಿಸಿದ್ದ ಚೋಕ್ಸಿ ದೇಶ ಬಿಟ್ಟು ಪರಾರಿಯಾಗಿದ್ದಾನೆ. 2018ರಲ್ಲಿ ಚೋಕ್ಸಿ ವಿರುದ್ಧ ಪ್ರಕರಣ ದಾಖಲಾಗಿತ್ತು. ಚೋಕ್ಸಿ 2017ರಲ್ಲಿ ಆಂಟಿಗುವಾ, ಬಾರ್ಬುಡಾ ದೇಶಗಳ ಪೌರತ್ವ ಪಡೆದು ಅಲ್ಲಿಯೇ ನೆಲೆಸಿದ್ದಾರೆ.

  ಹೊಸ ಎಫ್‌ಐಆರ್‌ಗಳ ಬಗೆಗೆ ಚೋಕ್ಸಿ ಪರ ವಕೀಲ ವಿಜಯ್‌ ಅಗರವಾಲ್‌ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ''ಒಂದು ಎಫ್‌ಐಆರ್‌ ದಾಖಲಾಗಿ, ಬ್ಯಾಂಕ್‌ಗಳಿಗೆ ಆಗಿರುವ ಒಟ್ಟು ನಷ್ಟಕ್ಕೆ ಆರೋಪಪಟ್ಟಿ ಸಲ್ಲಿಸಿರುವಾಗ ಪ್ರತಿ ಸಣ್ಣ ವಹಿವಾಟಿಗೂ ಪ್ರತ್ಯೇಕ ಎಫ್‌ಐಆರ್‌ ಹೇಗೆ ಬರುತ್ತದೆ?'' ಎಂದು ಪ್ರಶ್ನಿಸಿದ್ದಾರೆ.

  ಇದೇ ಪ್ರಕರಣದ ಇನ್ನೊಬ್ಬ ಆರೋಪಿ ನೀರವ್‌ ಮೋದಿ ಪ್ರಸ್ತುತ ಬ್ರಿಟನ್‌ನ ಜೈಲಿನಲ್ಲಿದ್ದಾನೆ.