ಗುಜರಿ ವಸ್ತುವಿನಿಂದ 5 ಟನ್ ತೂಕದ ಬೃಹತ್ ರುದ್ರ ವೀಣೆ ತಯಾರು..!

•   Sat, Dec 17 2022 04:07:15 PM



• ಭೋಪಾಲ್, ಡಿ 17 (DaijiworldNews/HR): 15 ಮಂದಿ ಕಲಾವಿದರ ಗುಂಪೊಂದು ಗುಜರಿ ವಸ್ತುವಿನಿಂದ ಬರೋಬ್ಬರಿ ಐದು ಟನ್ ಗಳಷ್ಟು ತೂಕದ ರುದ್ರ ವೀಣೆಯನ್ನು ತಯಾರಿಸಿರುವ ಘಟನೆ ಮಧ್ಯಪ್ರದೇಶದ ರಾಜಧಾನಿ ಭೋಪಾಲ್ ನಲ್ಲಿ ನಡೆದಿದೆ.

  15 ಮಂದಿ ಕಲಾವಿದರ ಗುಂಪು ತಯಾರಿಸಿರುವ ವೀಣೆ 28 ಅಡಿ ಉದ್ದವಿದ್ದು, 10 ಅಡಿ ಅಗಲ ಹಾಗೂ 12 ಅಡಿ ಎತ್ತರ ಹೊಂದಿದ್ದು,ಇದನ್ನು ತಯಾರಿಸಲು ಕಲಾವಿದರ ಗುಂಪು 10 ಲಕ್ಷ ರೂಪಾಯಿಯನ್ನು ವ್ಯಯಿಸಿದ್ದು, ಆರು ತಿಂಗಳಲ್ಲಿ ವೀಣೆಯ ಕೆಲಸವನ್ನು ಪೂರ್ಣವಾಗಿರುವುದಾಗಿ ವರದಿಯಾಗಿದೆ.

  ವಾಹನಗಳ ಹಳೆಯ ವಯರ್, ಚೈನು, ಗಿಯರ್ ಮತ್ತು ಬಾಲ್ ಬೇರಿಂಗ್ ಗಳನ್ನು ಉಪಯೋಗಿಸಿ ರುದ್ರ ವೀಣೆಯನ್ನು ತಯಾರಿಸಲಾಗಿದ್ದು, ನಾವು 15 ಮಂದಿ ಈ ಕಾರ್ಯದಲ್ಲಿ ತೊಡಗಿಕೊಂಡಿದ್ದೆವು ಎಂದು ಕಲಾವಿದರಲ್ಲಿ ಒಬ್ಬರಾದ ಪವನ್ ದೇಶಪಾಂಡೆ ಹೇಳಿದ್ದಾರೆ.

  ಇನ್ನು ರುದ್ರ ವೀಣೆ ತನ್ನದೇ ಆದ ವೈಶಿಷ್ಟ್ಯ ಹೊಂದಿದ್ದು, ನಾವು ಈ ವೀಣೆಯನ್ನು ಜನರಿಗೆ ಸೆಲ್ಫಿ ತೆಗೆದುಕೊಳ್ಳಲು ಅನುಕೂಲವಾಗುವಂತೆ ನಗರದಲ್ಲಿ ಸ್ಥಾಪಿಸುತ್ತಿದ್ದು, ಅದಕ್ಕೆ ಮತ್ತಷ್ಟು ಮೆರುಗು ನೀಡಲು ಬೆಳಕಿನ ವ್ಯವಸ್ಥೆಯನ್ನು ಮಾಡಲಾಗುವುದು ಎಂದು ತಿಳಿಸಿದ್ದಾರೆ.