ಎಸ್‌ಐ ಹುದ್ದೆಗಾಗಿ ತಾಯಿ-ಮಗಳ ಪೈಪೋಟಿ - ಸ್ಪೂರ್ತಿದಾಯಕ ಸ್ಟೋರಿ ಇಲ್ಲಿದೆ.!

•   Sat, Dec 17 2022 12:27:58 PM



• ತೆಲಂಗಾಣ, ಡಿ 17 (DaijiworldNews/DB): ಅಮ್ಮ-ಮಗಳಿಬ್ಬರು ಸಬ್ ಇನ್ಸ್‌ಪೆಕ್ಟರ್‍ ಹುದ್ದೆಗೆ ಪೈಪೋಟಿ ನಡೆಸುತ್ತಿದ್ದು, ದೈಹಿಕ ಪರೀಕ್ಷೆಯಲ್ಲಿ ತೇರ್ಗಡೆಯಾಗಿ ಲಿಖಿತ ಪರೀಕ್ಷೆಗೆ ಅರ್ಹತೆ ಪಡೆದಿದ್ದಾರೆ. ತೆಲಂಗಾಣದ ಈ ತಾಯಿ-ಮಗಳ ಸಾಧನೆಯ ಕನಸು ಜನರನ್ನು ಚಕಿತಗೊಳಿಸಿದೆ.

  37 ವರ್ಷದ ದರೆಲ್ಲಿ ನಾಗಮಣಿ ಹಾಗೂ ಆಕೆಯ ಪುತ್ರಿ 21 ವರ್ಷದ ತ್ರಿಲೋಕಿಣಿ ಅವರೇ ಎಸ್‌ಐ ಹುದ್ದೆಗೆ ಪೈಪೋಟಿ ನಡೆಸುತ್ತಿರುವ ತಾಯಿ ಮಗಳು. ಪರಿಶಿಷ್ಟ ಕುಟುಂಬಕ್ಕೆ ಸೇರಿದ ಆರ್ಥಿಕ ಶ್ರೀಮಂತರಲ್ಲದ ನಾಗಮಣಿ ಅವರು ಖಮ್ಮಂ ಜಿಲ್ಲೆಯ ನೆಲಕೊಂಡಪಲ್ಲಿ ಮಂಡಲದ ಚೆನ್ನಾರಂ ಗ್ರಾಮದವರು. ಕೃಷಿ ಕಾರ್ಮಿಕ ತೋಳ್ಳ ವೆಂಕಣ್ಣ ಅವರನ್ನು 1999ರಲ್ಲಿ ವಿವಾಹವಾದ ಬಳಿಕ 2005ರಲ್ಲಿ ಅಂಗನವಾಡಿ ಶಿಕ್ಷಕಿಯಾಗಿ ಸೇವೆ ಸಲ್ಲಿಸಿದರು. ಕ್ರೀಡಾ ಕ್ಷೇತ್ರದಲ್ಲಿಯೂ ತೊಡಗಿಸಿಕೊಂಡಿದ್ದ ನಾಗಮಣಿಗೆ ಪತಿಯ ಪ್ರೋತ್ಸಾಹದಿಂದಾಗಿ ಖೋ ಖೋ, ಕಬಡ್ಡಿ, ಹ್ಯಾಂಡ್‌‌ಬಾಲ್, ವಾಲಿಬಾಲ್ ಪಂದ್ಯಗಳಲ್ಲಿ ರಾಜ್ಯ ಹಾಗೂ ರಾಷ್ಟ್ರ ಮಟ್ಟದಲ್ಲಿಯೂ ಸೈ ಎನಿಸಿಕೊಂಡರು. 10 ಪದಕಗಳು, 5 ಟ್ರೋಫಿಗಳು ಮತ್ತು ಅನೇಕ ಪ್ರಮಾಣಪತ್ರಗಳು ಅವರದಾಯಿತು. 2007ರಲ್ಲಿ ಗೃಹರಕ್ಷಕರಾಗಿ ಪೊಲೀಸ್ ಇಲಾಖೆಗೆ ಸೇರಿದ ಅವರು, 2020ರಲ್ಲಿ ಪೊಲೀಸ್ ಕಾನ್‌ಸ್ಟೇಬಲ್ ಹುದ್ದೆಗೆ ಆಯ್ಕೆಯಾಗಿ ಪ್ರಸ್ತುತ ಮುಲುಗುವಿನಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ.

  ಅಮ್ಮನಂತೆಯೇ ಪೊಲೀಸ್ ಸಮವಸ್ತ್ರ ಧರಿಸಿ ಜನಸೇವೆಗಿಳಿಯುವ ಕನಸು ಕಂಡ ಮಗಳು ತ್ರಿಲೋಕಿಣಿಯೂ ಅಮ್ಮನೊಂದಿಗೆ ಪೈಪೋಟಿಗಿಳಿದಿದ್ದಾರೆ. ಇದೀಗ ಸಬ್ ಇನ್ಸ್‌ಪೆಕ್ಟರ್‍ ಹುದ್ದೆಗಾಗಿ ಅಮ್ಮ ಮಗಳು ಪೈಪೋಟಿ ನಡೆಸುತ್ತಿದ್ದು, ನೂರಾರು ಆಕಾಂಕ್ಷಿಗಳೊಂದಿಗೆ ಇವರಿಬ್ಬರೂ ಸೇರಿದ್ದಾರೆ. ಖಮ್ಮಮ್‌ನ ಪೊಲೀಸ್ ಪರೇಡ್ ಮೈದಾನದಲ್ಲಿ ನಡೆದ ದೈಹಿಕ ಪರೀಕ್ಷೆಗಳಲ್ಲಿ ಇಬ್ಬರೂ ಉತ್ತೀರ್ಣರಾಗಿದ್ದು, ಲಿಖಿತ ಪರೀಕ್ಷೆಗೆ ಅರ್ಹತೆ ಪಡೆದಿದ್ದಾರೆ.